CAB. II

1As loayr y Chiarn rish Moses, as rish Aaron, gra, 2Nee dy chooilley ghooinney jeh cloan Israel grunt y ghoaill son e chabbane liorish yn cowrey-caggee echey hene, lesh cullee thie nyn ayrey; wheesh shen dy ghrunt ver ad magh mygeayrt cabbane-agglish y cheshaght.

3As er y cheu-har lesh irree ny greiney, nee adsyn ta fo cowrey-caggee champ Yudah goaill grunt trooid magh nyn armeeyn: as bee Nahshon mac Amminadab captan cloan Yudah. 4As va e heshaght-chaggee, as yn earroo oc, three-feed as kiare thousaneyn jeig as shey cheead. 5As adsyn sniessey dasyn nee goaill grunt, vees tribe Issachar: as bee Nethaneel mac Zuar captan cloan Issachar. 6As va e heshaght-chaggee, as yn earroo oc, kiare thousaneyn jeig as da-eed as kiare cheead. 7Eisht tribe Zebulun: as bee Eliab mac Helon captan cloan Zebulun. 8As va e heshaght-chaggee, as yn earroo oc, shiaght thousaneyn jeig as da-eed as kiare cheead. 9Ooilley ny va er ny earroo ayns camp Yudah, va keead thousane as kiare-feed as shey thousaneyn as kiare cheead, trooid ny sheshaghtyn-caggee oc: ad shoh hed ’sy toshiaght.

10My-yiass vees cowrey-caggee champ Reuben, cordail rish nyn sheshaghtyn-caggee: as captan cloan Reuben, vees Elizur mac Shedeur. 11As va e heshaght-chaggee, as yn earroo oc, shey thousaneyn as da-eed as queig cheead. 12As adsyn nee grunt y ghoaill liorishyn, vees tribe Simeon: as captan cloan Simeon vees Shelumiel mac Zurishaddai. 13As va e heshaght-chaggee, as yn earroo oc, nuy thousaneyn jeig as da-eed as three cheead. 14Eisht tribe Ghad: as captan mee Ghad vees Eliasaph mac Reuel. 15As va e heshaght-chaggee, as yn earroo oc, queig thousaneyn as da-eed as shey cheead as jeih as da-eed. 16Ooilley ny va er ny earroo ayns camp Reuben, va shiaght-feed thousane as un thousane jeig as kiare cheead as jeih as da-eed, trooid nyn sheshaghtyn-caggee: as nee ad goll magh ayns yn nah rank.

17Eisht hed cabbane-agglish y cheshaght er y hoshiaght marish cabbaneyn ny Leviteyn, ayns mean y champ: myr t’ad campal, hed ad er nyn doshiaght, dagh dooinney ayns e ynnyd liorish ny culleeyn oc. 18Er y cheu-heear vees cullee champ Ephraim, cordail rish ny armeeyn oc: as captan mec Ephraim vees Elishama mac Ammihud; 19As va e heshaght-chaggee, as yn earroo oc, da-eed thousane as queig cheead. 20As my-niessey dasyn vees tribe Vanasseh: as captan cloan Vanasseh, vees Gamaliel mac Pedahzur. 21As va e heshaght-chaggee, as yn earroo oc, daa housane jeig as feed as daa cheead. 22Eisht tribe Venjamin, as captan mec Venjamin, vees Abidan mac Gideoni. 23As va e heshaght-chaggee, as yn earroo oc, queig thousaneyn as feed as kiare cheead. 24Va slane coontey champ Ephraim, queig-feed as hoght thousaneyn as un cheead, trooid magh nyn sheshaghtyn-caggee; as nee ad goaill toshiaght ’sy trass rank. 25Bee cullee champ Dan my-hwoaie, cordail rish ny sheshaghtyn oc: as captan cloan Dan vees Ahiezer mac Ammishaddai. 26As va e heshaght-chaggee, as yn earroo oc, three-feed as daa housane as shiaght cheead. 27As adsyn sniessey da hoie-ys nyn gamp, vees tribe Asher: as captan cloan Asher vees Pagiel mac Ocran. 28As va e heshaght-chaggee, as yn earroo oc, un thousane as da-eed as queig cheead. 29Eisht tribe Naphtali: as bee captan cloan Naphtali Ahira mac Enan. 30As va e heshaght-chaggee, as yn earroo oc, three thousaneyn jeig as da-eed as kiare cheead. 31Adsyn ooilley v’er nyn earroo ayns camp Dan v’ad shiaght-feed as shiaght thousaneyn jeig as shey cheead, ad shoh hed er-jerrey lesh ny culleeyn oc.

32Shoh adsyn va er nyn earroo jeh cloan Israel, rere thie nyn ayrey; ooilley adsyn v’er nyn earroo jeh ny campyn trooid nyn sheshaghtyn-caggee, va shey cheead as three thousaneyn as queig cheead as jeih as da-eed. 33Agh cha row ny Leviteyn er nyn earroo mastey cloan Israel; myr hug y Chiarn sarey da Moses. 34As ren cloan Israel, myr va’n Chiarn er choyrt sarey da Moses: shen myr ghow ad grunt, liorish ny culleeyn oc, as myr shen scugh ad er nyn doshiaght, dagh unnane myr va nyn lught-thie, rere thie nyn ayrey.