CAB. XX

1Eisht haink cloan Israel, eer yn slane cheshaght, gys faasagh Zin, ’sy chied vee: as ren y pobble tannaghtyn ayns Kadesh; as hooar Miriam baase ayns shen, as shen y raad v’ee oanluckit. 2As cha row veg yn ushtey ec y pobble [ayns shen]: as haggil ad dy cheilley ad hene, noi Moses as noi Aaron. 3As dirree’n pobble magh noi Moses, as loayr ad, gra, Dy baillish Jee dy beagh shin er gheddyn baase, marish nyn mraaraghyn fenish y Chiarn. 4As cre’n-fa ta shiu er choyrt lhieu seose pobble y Chiarn gys yn aasagh shoh, dy stroie shin hene as nyn maase? 5As cre haink erriu dy chur orrin cheet magh ass Egypt, dy chur lhieu shin gys y boayl feïe shoh? raad nagh vel arroo, ny figgyn, ny biljyn-feeyney, ny pomegranateyn, chamoo ta ushtey ain dy iu. 6As hie Moses as Aaron veih fenish y pobble, gys dorrys y chabbane-agglish, as huitt ad er nyn eddin: as va gloyr y Chiarn er ny hoilshaghey.

7As loayr y Chiarn rish Moses, gra, 8Gow’n lorg, as chaggil y pobble cooidjagh, uss as Aaron dty vraar, as loayr-jee rish y chreg kiongoyrt roo, as ver eh magh ushtey, as ver oo daue ushtey ass y chreg: myr shen ver oo ushtey daue hene, as da’n maase oc. 9As ghow Moses y lorg veih roish y Chiarn, myr doardee eh da. 10As ren Moses as Aaron chaglym y pobble cooidjagh roish eddin y chreg, as dooyrt eh roo, Clasht-jee nish, shiuish mee-viallee; nee ass y chreg shegin dooin ushtey ’chur diu? 11As hrog Moses e laue, as lesh e lorg woaill eh yn chreg daa cheayrt: as roie yn ushtey magh dy palchey, as ren y pobble giu, as nyn maase myrgeddin. 12As loayr y Chiarn rish Moses as Aaron, Er-yn-oyr nagh ren shiu m’y chredjal, dy m’y chasherickey ayns sooillyn cloan Israel; shen-y-fa cha nee shiuish ver lhieu yn pobble shoh gys y cheer ta mee er yialdyn daue. 13Shoh ushtey Meribah, er-yn-oyr dy ren cloan Israel streeu noi’n Chiarn: as v’eh er ny chasherickey ayndoo.

14As hug Moses chaghteryn veih Kadesh, gys ree Edom, Myr shoh ta dty vraar Israel gra, Ta fys ayd er ooilley yn seaghyn t’er jeet orrin. 15Kys hie ny ayraghyn ain sheese gys Egypt as ta shin er vaghey ayns Egypt rish foddey dy hraa: as ren ny Egyptianee tranlaase orrinyn, as er nyn ayraghyn. 16As tra deïe shin gys y Chiarn, cheayll eh yn coraa ain, as hug eh ainle (veih niau), as t’eh er chur lesh shin magh ass Egypt; as cur-my-ner ta shin ayns Kadesh, ard-valley ayns dty ardjyn sodjey magh. 17Lhig dooin goll er nyn doshiaght, ta mee guee ort, trooid y cheer ayd’s; cha jem mayd trooid ny magheryn, ny garaghyn-feeyney, chamoo nee mayd giu jeh ushtey ny chibbraghyn: gow mayd raad-mooar y ree, cha jyndaa mayd gys y laue yesh, ny gys yn laue chiare, derrey vees mayd er n’aagail dty ardjyn. 18As dooyrt Edom rish, Cha jig oo my raad’s, er-aggle dy jig-ym magh dt’oï lesh y chliwe. 19As dooyrt cloan Israel rish, Gow mayd er y raad-mooar: as my neem’s as my vaase giu jeh dty ushtey, eisht eeck-ym er y hon: hem trooid rish my chosh, fegooish assee erbee sodjey. 20Agh dooyrt eh, Cha jig lhiat dy gholl trooid. As haink Edom magh n’oï lesh weight sleih, as lesh laue lajer. 21Myr shoh ren Edom gobbal dy chur raad dy Israel trooid y cheer echey: shen-y-fa ghow Israel raad elley.

22As ghow slane sheshaght cloan Israel nyn yurnah veih Kadesh, as haink ad gys cronk Hor. 23As loayr y Chiarn rish Moses as Aaron, ayns cronk Hor, liorish oirr cheer Edom, gra, 24Bee Aaron er ny haglym gys e phobble: son cha jed eh stiagh ’sy cheer ta mish er yialdyn da cloan Israel, son dy row shiu mee-viallagh da my ghoo ec ushtey Meribah. 25Gow mayrt Aaron as Eleazar e vac, as cur lhiat ad seose er cronk Hor: 26As rooisht Aaron jeh e choamraghyn [casherick] as cur ad er Eleazar e vac: as bee Aaron er ny haglym gys e phobble, as ayns shen yiow eh baase. 27As ren Moses myr doardee’n Chiarn; as hie ad seose er cronk Hor, ayns fakin ooilley’n cheshaght. 28As ghow Moses e choamraghyn jeh Aaron, as hug eh ad er Eleazar e vac; as hooar Aaron baase ayns shen er mullagh y chronk: as haink Moses as Eleazar neose jeh’n chronk. 29As tra honnick ooilley’n pobble dy row Aaron marroo, ren ad dobberan son Aaron jeih laa as feed, eer slane thie Israel.