CAB. XXI

1AS tra ren ree Arad yn Canaanite, va reill lesh y jiass, clashtyn imraa dy row Israel cheet seose, goaill raad ny brialtee; eisht ren eh caggey noi Israel, as ghow eh paart jiu nyn bryssoonee. 2As ren Israel breearrey gys y Chiarn, as dooyrt ad, My nee uss dy jarroo livrey yn pobble shoh gys my laue, eisht stroie-ym dy bollagh ny ard-valjyn oc. 3As hug y Chiarn clashtyn da coraa Israel, as livrey eh seose ny Canaaniteyn: as ren ad dy bollagh stroie ad hene as ny ard-valjyn oc; as denmys eh yn ynnyd cheddin Hormah.

4As ghow ad nyn yurnah veih cronk Hor, lesh raad yn Aarkey Jiarg, dy gholl mygeayrt cheer Edom: as va’n pobble dy mooar seaghnit ayns nyn aigney, kyndagh rish y raad. 5As loayr y pobble noi Jee, as noi Moses; Cre’n-fa ta shiu er chur lhieu shin seose ass Egypt, dy herraghtyn ’syn aasagh shoh? son cha vel arran ny ushtey ain, as ta’n annym ain jiooldey’n arran shoh dyn vree. 6As hug y Chiarn ard-nieughyn ailagh mastey’n pobble; as lhott ad y pobble, as hooar ymmodee jeh pobble Israel baase.

7Shen-y-fa haink y pobble gys Moses, as dooyrt ad, Ta shin er n’yannoo peccah, son ta shin er loayrt noi’n Chiarn, as dt’oï’s; guee gys y Chiarn dy ghoaill ersooyl ny ard-nieughyn voïn: as ghow Moses padjer son y pobble. 8As dooyrt y Chiarn rish Moses, Jean ard-nieu ailagh, as soie seose eh er croan: as hig eh gy-kione, dy chooilley er ta lhottit, tra nee eh jeeaghyn er, nee eh coural. 9As ren Moses ard-nieu dy phrash, as hoie eh eh er croan: as haink eh gy-kione, my va dooinney erbee lhottit liorish yn ard-nieu, tra yeeagh eh er yn ard-nieu prashey, dy dooar eh couyr,

10As hie cloan Israel er nyn doshiaght, as ren ad campal ayns Oboth. 11As ghow ad nyn yurnah veih Oboth, as ren ad campal ec Ije-abarim, ayns yn aasagh, ta er raad Voab, lesh irree ny greïney.

12Veih shen scugh ad, as ren ad campal ayns coan Zared. 13Veih shen scugh ad, as ren ad campal er y cheu elley jeh Arnon, ta ’syn aasagh, myr t’ou cheet veih ardjyn ny Amoriteyn: son ta Arnon y chagliagh eddyr Moab as ny Amoriteyn. 14Shen-y-fa te er ny imraa ayns lioar caggaghyn y Chiarn, Cre v’eh er n’yannoo ’syn Aarkey Jiarg, as ayns strooanyn Arnon, 15As ec ny hawinyn ta roie sheese gys ard-valley Ar, as lhie rish cagliagh Voab. 16As veih shen hie ad gys Beer: shen y chibbyr my-e-chione loayr y Chiarn rish Moses, Chaggil y pobble dy cheilley, as ver-yms ushtey daue.

17Eisht ghow Israel yn arrane shoh, Geill seose, O hibbyr, ass y farrane; gow-jee mygeayrt lesh yn arrane: 18Chleiy ny princeyn y chibbyr lesh nyn luirg, ren deiney ooasle y pobble y chleiy eh, er oardagh nyn ard-leeideilagh. As veih’n aasagh jimmee ad gys Mattanah: 19As veih Mattanah gys Nahaliel: as veih Nahaliel gys Bamoth: 20As veih Bamoth ayns y choan, t’ayns cheer Voab, gys mullagh Pisgah, ta jeeaghyn lesh Jeshimon.

21As hug Israel chaghteryn gys Sihon ree ny Amoriteyn, gra, 22Lhig dou goll trooid y cheer ayd’s; cha jem mayd trooid ny magheryn, ny garaghyn-feeyney, cha n’iu mayd jeh ushtaghyn y chibbyr: agh gow mayd raad-mooar y ree, derrey vees mayd shaghey dty ardjyn. 23As cha lhiggagh Sihon da Israel goll trooid y cheer echey: agh haggil Sihon ooilley e gheiney-caggee dy cheilley, as hie eh magh noi Israel gys yn aasagh: as haink eh gys Jahaz, as ren eh caggey noi Israel. 24As woaill Israel eh lesh foyr y chliwe, as ghow ad yn cheer echey veih Arnon gys Jabbok, eer choud as cloan Ammon: son va cagliagh lajer ec cloan Ammon. 25As ghow Israel ooilley ny ard-valjyn shoh: as ren Israel cummal ayns ooilley ard-valjyn ny Amoriteyn, ayns Heshbon, as ayns ooilley e valjyn-cheerey. 26Son va Heshbon ard-valley Sihon ree ny Amoriteyn, va er chaggey noi’n ree va roish shen ayns Moab, as er n’ghoaill ooilley’n cheer echey voish, eer gys Arnon. 27Shen-y-fa t’adsyn, ta loayrt ayns raaghyn-dorraghey, gra, Tar-jee gys Heshbon, lhig da ard-valley Sihon ve troggit, as coamrit ass-y-noa. 28Son ta aile er gholl magh ass Heshbon, lossey veih ard-valley Sihon: te er lostey Ar ayns Moab, as chiarnyn cashtallyn lajer Arnon. 29Smerg dhyt’s, Voab; ta’n chragh er jeet ort, O phobble Chemosh; t’eh er choyrt e vec ren scapail, as e inneenyn, ayns cappeeys, da Sihon ree ny Amoriteyn. 30Ta shin er chur ad fo-chosh; ta Heshbon er cherraghtyn, eer gys Dibon, as ta shin er choyrt naardey ad, eer gys Nophah, ta roshtyn gys Medeba.

31Myr shoh ren Israel cummal ayns cheer ny Amoriteyn. 32As hug Moses magh brialtee gys Jaazer, as ghow ad ny baljyn echey, as deiyr ad magh ny Amoriteyn v’ayndoo.

33As hyndaa ad, as hie ad seose raad Vashan; as hie Og ree Vashan magh nyn ’oï, eh hene, as ooilley e phobble, gys y chaggey ec Edrei. 34As dooyrt y Chiarn rish Moses, Ny gow aggle roish: son ta mish er livrey eh gys dty laue, as ooilley e phobble, as y cheer echey: as nee uss jannoo rishyn myr ren oo rish Sihon ree ny Amoriteyn, va cummal ec Heshbon. 35Myr shen stroie ad eh, as e vec, as ooilley e phobble, derrey nagh row veg jeu faagit bio; as ghow ad y cheer echey daue hene.