CAB. XXII

1As hie cloan Israel er nyn doshiaght, as hoie ad nyn gamp ayns cheer rea Voab, er y cheu shoh dy Yordan, liorish Jericho.

2As honnick Balak mac Zippor ooilley ny va Israel er n’yannoo rish ny Amoriteyn. 3As va Moab fo aggle trome roish y pobble, son dy row ad ymmodee: as va Moab seaghnit, kyndagh rish cloan Israel. 4As dooyrt Moab rish shanstyr Vidian, Nish nee’n cheshaght shoh sliee seose ooilley ny ta mygeayrt-y-mooin, myr ta’n dow sliee seose faiyr y vagher. As va Balak mac Zippor ree ny Moabiteyn ec y traa cheddin. 5Hug eh chaghteryn er-y-fa shen gys Balaam mac Beor, gys Pethor, ta liorish awin cheer cloan e phobble, dy eamagh er, gra, Cur-my-ner, ta pobble er jeet veih Egypt; as t’ad coodaghey eaghtyr y thallooin, as t’ad er champal er-gerrey dou. 6Tar nish, ta mee guee ort, er-y-fa shen, cur dty vollaght er y pobble shoh er my hon; son t’ad ro niartal dou; foddee dy voym y varriaght orroo, dy vod shin ad y woalley, as ad y chlo ass y cheer: son er-lhiam dy vel eshyn bannit t’ou uss dy vannaghey, as dy bee eshyn mollaghtagh, t’ou uss coyrt dty vollaght er. 7As hie shanstyr Voab, as shanstyr Vidian rhymboo lesh y leagh dy obbeeys ayns nyn laue; as haink ad gys Balaam, as livrey ad chaghteraght Valak. 8As dooyrt eh roo, Gow-jee aaght ayns shoh noght, as ver-yms lhiam fys hiu, cre nee’n Chiarn gra rhym: as duirree ard-gheiney Voab marish Balaam. 9As haink Jee gys Balaam [ayns ashlish] as dooyrt eh, Quoi ny deiney shoh ta mayrt? 10As dooyrt Balaam rish Jee, Ta Balak mac Zippor, ree Voab, er chur chaghteraght hym, gra, 11Cur-my-ner, ta pobble er jeet ass Egypt, ta coodaghey eaghtyr y thallooin: Tar nish, gwee mollaght orroo er my hon; foddee dy voddym barriaght y gheddyn orroo, as ad y imman ersooyl. 12As dooyrt Jee rish Balaam, Cha jed oo mâroo, cha der oo mollaght er y pobble: son t’ad bannit. 13As dirree Balaam ’sy voghrey, as dooyrt eh rish ard-gheiney Valak, Immee-jee reue gys y cheer eu hene: son ta’n Chiarn gobbal kied dou, dy gholl mêriu. 14As hrog ard-gheiney Voab orroo, as hie ad gys Balak, as dooyrt ad, Ta Balaam gobbal dy heet mârin.

15As hug Balak reesht princeyn ny shlee, as ny s’ooasle na’n chied eallagh. 16As haink ad gys Balaam, as dooyrt ad rish, Shoh myr ta Balak mac Zippor gra, Ny lhig da nhee erbee, ta mee guee ort, dty lhiettal veih cheet hym’s: 17Son nee’m oo y hroggal gys ooashley feer ard, as cre-erbee hirrys oo orrym, nee’m er dty hon: ’Tar, er-y-fa shen, ta mee guee ort, cur mollaght er y pobble shoh er my hon. 18As dreggyr Balaam, as dooyrt eh rish chaghteryn Valak, Dy jinnagh Balak cur dooys lane e hie dy argid, as dy airh, cha voddym goll noi goo yn Chiarn my Yee, dy yannoo ny sloo, ny ny smoo. 19Nish, er-y-fa shen, ta mee guee erriu, fuirree-jee mârym yn oie shoh myrgeddin, dy vod fys ’ve aym, cre nee’n Chiarn gra ny-sodjey rhym. 20As haink Jee gys Balaam ’syn oie, as dooyrt eh rish, My hig ny deiney shoh dy eamagh ort, trog ort, as immee mâroo: agh ny-yeih, cre-erbee jir-ym rhyt, shen nee oo loayrt. 21As dirree Balaam ’sy voghrey, as hug eh er yn assyl ve jeeltit, as hie eh marish princeyn Voab.

22As va corree Yee brasnit, son dy jagh eh: as hass ainle y Chiarn ’sy raad, dy lhiettal eh. Nish v’eh markiagh er e assyl, as va e ’ghaa er-mooinjerey mârish. 23As honnick yn assyl ainle y Chiarn ny hassoo ayns y raad, as e chliwe lommyrtagh ayns e laue; as hyndaa yn assyl dy lhiattee jeh’n raad, as ghow ee yn magher; as woaill Balaam yn assyl, dy chur ee er y raad. 24Agh hass ainle y Chiarn ayns raad ny garaghyn-feeyney, lesh voalley er dagh cheu. 25As tra honnick yn assyl ainle y Chiarn, ren ee chionney gys y voalley, as vroo ee cass Valaam noi’n voalley; as woaill eh ee reesht. 26As hie ainle y Chiarn ny-sodjey, as hass eh ayns ynnyd coon, ayn cha row raad erbee dy hyndaa, edyr gys y laue yesh, ny gys y laue chiare. 27As tra honnick yn assyl ainle y Chiarn, huitt ee sheese fo Balaam: as va corree Valaam er ny ghreesaghey, as woaill eh yn assyl lesh e lorg. 28As ren y Chiarn fosley beeal yn assyl, as dooyrt ee rish Balaam, Cre ta mish er n’yannoo rhyt, dy vel oo er m’y woalley ny three keayrtyn shoh? 29As dooyrt Balaam rish yn assyl, Son dy vel oo er ve roonagh rhym: baillym, dy beagh cliwe ayns my laue, son nish varrin oo. 30As dooyrt yn assyl rish Balaam, Nagh nee mish dty assyl, orrym t’ou er varkiagh rieau neayr’s va mee lhiat, gys y laa jiu? row mee rieau cliaghtey dy yannoo myr shoh rhyt? As dooyrt eh, Cha row. 31Eisht doshil y Chiarn sooillyn Valaam, as honnick eh ainle y Chiarn ny hassoo ayns y raad, as e chliwe lommyrtagh ayns e laue; as chroym eh sheese e chione, lesh e eddin gys y thalloo. 32As dooyrt ainle y Chiarn rish, Cre’n-oyr t’ou er woalley dty assyl ny three keayrtyn shoh? cur-my-ner, hie mish magh dy hassoo dt’oï, son dy vel dty raad camlaagagh ayns my hilley: 33As honnick yn assyl mee, as hyndaa ee voym ny three keayrtyn shoh: er-be dy hyndaa ee voym, son shickyrys, eer nish, va mee er varroo uss, as er hauail ish bio. 34As dooyrt Balaam rish ainle y Chiarn, Ta mee er n’yannoo peccah; son ve gyn-yss dou, dy row uss dty hassoo ’sy raad roym: nish er-y-fa shen, my te noi dt’aigney, chyndaa-ym thie reesht. 35As dooyrt ainle y Chiarn rish Balaam, Immee marish ny deiney: agh shen ny-lomarcan, jir-ym rhyt, nee oo loayrt. Myr shen hie Balaam marish princeyn Valak.

36As tra cheayll Balak, dy row Balaam er roshtyn, hie eh magh ny whail, gys ard-valley Voab, ta er oirr Arnon, ta shen ’syn ard sodjey magh. 37As dooyrt Balak rish Balaam, Nagh dug mee chaghteraght jeean, dy eamagh ort? Cre’n-fa nagh daink oo hym? Nagh vel eh ayns y phooar aym’s dy dty hroggal seose gys ard-ooashley? 38As dooyrt Balaam rish Balak, Cur-my-ner, nish dy vel mee er jeet hood: vel eh ayns y phooar aym’s nish dy ghra nhee erbee? yn fockle ver Jee ayns my veeal, shen nee’m loayrt. 39As hie Balaam marish Balak, as haink ad gys Kirjath-huzoth. 40As ren Balak chebbal dew as kirree, as hug eh fys er Balaam, as ny princeyn va mârish. 41As haink eh gy-kione laa-ny-vairagh, dy ghow Balak Balaam, as hug eh lesh eh seose gys ynnydyn ard Vaal, dy voddagh eh veih shen fakin yn ayrn sodjey magh jeh’n pobble.