CAB. XXIII

1AS dooyrt Balaam rish Balak, Trog dou ayns shoh shiaght altaryn, as fow aarloo dou ayns shoh shiaght dew, as shiaght reaghyn. 2As ren Balak myr va Balaam er ghra; as ren Balak as Balaam chebbal dow as rea er dagh altar. 3As dooyrt Balaam rish Balak, Shass liorish dty oural-losht, as hem’s dy lhiattee; foddee dy der y Chiarn meeiteil dou: as cre-erbee nee eh soilshaghey dou, insh-ym dhyt. As hie eh gys boayl er-lheh. 4As haink Jee gys Balaam; as dooyrt eh rish, Ta mee er droggal shiaght altaryn, as er jebbal er dagh altar dow as rea. 5As hug y Chiarn fockle ayns beeal Valaam, as dooyrt eh, Chyndaa reesht gys Balak, as shoh myr nee oo loayrt. 6As haink eh reesht huggey, as cur-my-ner, v’eh ny hassoo liorish e oural-losht, eh hene, as ooilley princeyn Voab mârish. 7As hie eh lesh e choraa-dorraghey, as dooyrt eh, Ta Balak ree Voab er chur fys orrym veih Aram, ass sleityn y niar, gra, Tar, gwee mollaght er my hon er Jacob, as tar, cur y-lane fo Israel. 8Kys oddym’s mollaght y choyrt ersyn, nagh vel Jee er choyrt e vollaght? ny kys oddym’s y-lane y choyrt fosyn, nagh vel y Chiarn er choyrt y-lane fo?

9Son veih mullagh ny creggyn hee-ym eh, as veih ny croink ta mee fakin eh: cur-my-ner, nee’n pobble cummal orroo hene, as cha bee ad er nyn goontey mastey ny ashoonyn. 10Quoi oddys coontey joan Yacob, as earroo yn chiarroo ayrn jeh Israel? Lhig dooys baase y dooinney cairagh y gheddyn, as lhig da jerrey my vea ve casley rish yn jerrey echeysyn. 11As dooyrt Balak rish Balaam, Cre shoh t’ou er n’yannoo rhym? ghow mee oo dy ghwee mollaght er my noidyn, as cur-my-ner, t’ou ooilley-cooidjagh er vannaghey ad. 12As dreggyr eh, as dooyrt eh, Nagh negin dou goaill tastey, dy loayrt shen ny ta’n Chiarn er choyrt ayns my veeal? 13As dooyrt Balak rish, Tar, ta mee guee ort mârym, gys boayl elley, raad yiow shilley jeu: cha jean oo fakin agh yn ayrn sodjey magh jeu, as cha vaik oo ad ooilley: as cur mollaght orroo er my hon veih shen.

14As hug eh lesh eh gys magher Zophim, gys mullagh Pisgah, as hrog eh shiaght altaryn, as heb eh dow as rea er dagh altar. 15As dooyrt eh rish Balak, Shass uss ayns shoh liorish dty oural-losht, choud as hem’s quail y Chiarn ayns shid. 16As hug y Chiarn meeiteil da Balaam, as hug eh fockle ayns e veeal, as dooyrt eh, Immee reesht gys Balak, as abbyr myr shoh. 17As tra haink eh huggey, cur-my-ner, v’eh ny hassoo liorish e oural-losht, as princeyn Voab mârish. As dooyrt Balak rish, Cre ta’n Chiarn er loayrt? 18As hie eh lesh e choraa-dorraghey, as dooyrt eh, Irree seose, Valak, as clasht; eaisht rhym, uss vac Zippor: 19Cha vel Jee myr dooinney, dy yannoo foalsaght, chamoo myr mac dooinney, dy chaghlaa e aigney: vel eh er ghra, as nagh jean eh cooilleeney? ny vel eh er loayrt, as nagh jean eh mie jeh? 20Cur-my-ner, ta mee er my harey dy vannaghey; as t’eh er vannaghey, as cha voddym’s caghlaa eh. 21Cha surr eh aggair erbee ’ve jeant da Jacob, ny seaghyn dy huittym er Israel: ta’n Chiarn e Yee mârish, as yn coraa dy varriaght reeoil ny-vud oc. 22Hug Jee lesh ad ass Egypt; ta echey, myr dy beagh eh, niart yn unicorn. 23Son shickyrys cha vel obbeeys erbee noi Jacob, chamoo ta faishnys erbee noi Israel: ayns yn imbagh cooie, vees er ny hoilshaghey mychione Jacob as Israel, Cre ta Jee er n’yannoo! 24Cur-my-ner, nee’n pobble girree seose myr lion mooar, as troggal seose eh hene myr y lion aeg; cha lhie eh sheese, derrey vees eh er n’ee jeh’n chragh, as er n’iu fuill y varroo.

25As dooyrt Balak rish Balaam, Chamoo gwee mollaght orroo, ny bannaght orroo. 26Agh dreggyr Balaam, as dooyrt eh rish Balak, Nagh dinsh mee dhyt, gra, Ooilley ny ta’n Chiarn dy harey, shegin dou jannoo.

27As dooyrt Balak rish Balaam, Tar mârym, ta mee guee ort; as ver-ym lhiam oo gys ynnyd elley; foddee dy gooidsave lesh Jee, dy vod oo gwee mollaght orroo er my hon veih shen. 28As hug Balak lesh Balaam gys mullagh Peor, ta jeeaghyn lesh Jeshimon. 29As dooyrt Balaam rish Balak, Trog dou ayns shoh shiaght altaryn, as fow aarloo dou ayns shoh shiaght dew, as shiaght reaghyn. 30As ren Balak myr va Balaam er ghra, as heb eh dow as rea er dagh altar.