CAB. XXIV

1As tra honnick Balaam, dy row eh aigney’n Chiarn dy vannaghey Israel, cha jagh eh, myr ren eh roïe, dy vriaght liorish obbeeys, agh hyndaa eh e eddin lesh yn aasagh. 2As hrog Balaam seose e hooillyn, as honnick eh Israel tannaghtyn ayns e chabbaneyn, cordail rish ny tribeyn oc, as haink spyrryd Yee er. 3As hie eh lesh e choraa-dorraghey, as dooyrt eh, Ta Balaam mac Beor er ghra, as ta’n dooinney, ta ny sooillyn echey foshlit, er ghra: 4t’eshyn er ghra, cheayll goan Yee, eh honnick ashlish yn ooilley-niartal, tuittym ayns cadley dowin, agh e hoilshey foshlit: 5Cre cha aalin ta dty chabbaneyn, O Yacob, as dty chummallyn, O Israel! 6Myr ny coanyn t’ad er nyn skeayley magh, myr garaghyn liorish oirr ny hawinyn, myr ny biljyn lign-aloes ta’n Chiarn er hoiaghey, as myr ny biljyn-cedar liorish ny ushtaghyn. 7Nee ny siyn echey roie harrish lesh ushtey, as bee reill ec e luight harrish ymmodee ellanyn, as bee’n ree echey ny syrjey na Agag, as bee e reeriaght er ny hoiaghey seose dy niartal. 8Hug Jee lesh eh magh ass Egypt, t’echey, myr dy beagh eh, niart yn unicorn: nee eh stroie ny ashoonyn e noidyn, as brishey ny craueyn oc, as ad y hoylley lesh e hideyn. 9Hie eh gys fea, lhie eh sheese myr lion, as myr lion aeg: quoi s’loys da eh y ghoostey? bannit t’eshyn ta dy dty vannaghey, as mollaghtagh t’eshyn ta gwee mollaght dhyt.

10As va corree Valak er ny vrasnaghey noi Balaam, as woaill eh e vassyn dy cheilley: as dooyrt Balak rish Balaam, Hug mee fys ort dy ghwee mollaght er my noidyn, as cur-my-ner, t’ou dy slane er vannaghey ad, ny three keayrtyn shoh. 11Shen-y-fa nish, cosne royd gys dt’ynnyd hene: va mee kiarit dy hroggal oo gys ard-ooashley: agh cur-my-ner, ta’n Chiarn er dty reayll veih ooashley. 12As dooyrt Balaam rish Balak, Nagh loayr mee myrgeddin rish dty haghteryn, gra, 13Dy jinnagh Balak cur dou lane e hie dy argid as d’airh, cha voddyms goll noi sarey’n Chiarn, dy yannoo edyr mie ny sie jeh my aigney hene: agh ny ta’n Chiarn dy ghra, shen nee’m loayrt? 14As cur-my-ner, ta mee nish goll gys my phobble hene, tar, er-y-fa shen, as soilshee-ym dhyt, cre nee’n pobble shoh rish y pobble ayd’s, ayns ny earishyn ta ry-heet. 15As hie eh lesh e choraa-dorraghey, as dooyrt eh, Ta Balaam mac Beor er ghra, as ta’n dooinney ta e hooillyn foshlit, er ghra: 16T’eh er ghra, ren clashtyn goan Yee, as va toiggal aigney’n fer smoo syrjey, honnick ashlish yn Ooilley-niartal, tuittym ayns cadley dowin, agh e hoilshey foshlit: 17Neem’s fakin eh, agh cha nee nish: ver-ym eh my-ner, agh cha nee dy gerrit: hig Rollage ass Jacob, as nee Lorg-reill troggal ass Israel; as nee eh bwoalley corneilyn Voab, as reill harrish ooilley cloan Sheth. 18As bee Edom son eiraght, bee Seir myrgeddin son cummal da e noidyn, as nee Israel gymmyrkey eh hene dy dunnal. 19Ass Jacob hig yn ard-fer-reill, as nee eh stroie eshyn t’er-mayrn jeh’n ard-valley. 20As tra yeeagh eh er Amalek, hie eh lesh e choraa-dorraghey, as dooyrt eh, Ta Amalek ayns toshiaght ny ashoonyn, agh bee’n jerrey echey, dy jean eh cherraghtyn son dy bragh. 21As yeeagh eh er ny Keniteyn; as hie eh lesh e choraa-dorraghey, as dooyrt eh, S’lajer ta dty ynnyd-vaghee, as t’ou jannoo dty edd ayns y chreg. 22Ny-yeih, bee’n Kenite er ny choyrt naardey, derrey ver Ashur lesh oo ersooyl ayns cappeeys. 23As hie eh lesh e choraa-dorraghey, as dooyrt eh, Aless, quoi vees bio tra nee Jee shoh ’yannoo! 24As nee lhongyn cheet veih ardjyn Chittim, as seaghney Ashur, as seaghney Eber, as nee eshyn myrgeddin cherraghtyn son dy bragh. 25As hrog Balaam er, as jimmee eh, as hyndaa eh gys e ynnyd hene: as hie Balak myrgeddin roish.