CAB. XXVII

1Eisht haink inneenyn Zelophehad, mac Hepher, mac Ghilead, mac Machir, mac Vanasseh, jeh kynneeyn Vanasseh mac Yoseph: as shoh enmyn e inneenyn; Mahlah, Noah, as Hoglah, as Milcah, as Tirzah. 2As haink ad fenish Voses, as fenish Eleazar y saggyrt, as fenish ny princeyn, as y slane cheshaght, ec dorrys y chabbane-agglish, gra, 3Hooar yn ayr ain baase ayns yn aasagh, as cha row eh jeh’n cheshaght ocsyn, ren girree magh noi’n Chiarn, ayns sheshaght Chorah: agh hooar eh baase cadjin peccee elley, as cha row mec echey. 4Cre’n-fa veagh ennym yn ayr ain caillit mastey e chynney, son dy vel eh dyn mac? Cur dooin, er-y-fa shen, eiraght mastey braaraghyn nyn ayrey. 5Eisht hug Moses lesh y chooish oc roish y Chiarn.

6As loayr y Chiarn rish Moses, gra, 7Ta inneenyn Zelophehad ’sy chair: ver oo, son shickyrys, cummal eiraght daue, mastey braaraghyn nyn ayrey; as ver oo shickyrys daue ayns eiraght nyn ayrey. 8As nee oo loayrt rish cloan Israel, gra, My yiow dooinney baase gyn mac, eisht ver shiu er yn eiraght dy huittym gys yn inneen. 9As mannagh bee inneen echey, eisht ver shiu yn eiraght da e vraaraghyn. 10As my t’eh gyn braaraghyn, eisht ver shiu yn eiraght da braaraghyn e ayrey. 11As mannagh vel braaraghyn ec e ayr, eisht ver shiu yn eiraght da’n dooinney-mooinjerey sniessey jeh e chynney, as bee’n eiraght leshyn: as bee shoh da cloan Israel ny slattys dy vriwnys, myr hug y Chiarn sarey da Moses.

12As dooyrt y Chiarn rish Moses, Immee seose er y chronk shoh Abarim, as gow shilley jeh’n cheer, ta mish er choyrt da cloan Israel. 13As erreish dhyt v’er vakin eh, bee uss myrgeddin er dty haglym gys dty phobble, myr va Aaron dty vraar. 14Son cha dug shiu biallys da’n sarey aym’s (ayns faasagh Zin, ayns irree-magh y cheshaght) liorish nagh dug shiu onnor dou ec yn ushtey, roish ny sooillyn oc: ta shen, ushtey Meribah ec Kadesh, ayns faasagh Zin.

15As loayr Moses rish y Chiarn, gra, 16Lhig da’n Chiarn, Jee spyrrydyn dy chooilley eill, dooinney y hoiaghey harrish y pobble, 17Oddys goll magh as stiagh roue, as dy leeideil ad magh, as dy choyrt lesh ad stiagh: nagh bee sheshaght y Chiarn myr kirree fegooish bochilley.

18As dooyrt y Chiarn rish Moses, Gow hood Joshua mac Nun, dooinney ta’n spyrryd (dy chreenaght) ayn, as lhie dty laue er. 19As lhig da cheet kionfenish Eleazar y saggyrt, as fenish ooilley’n cheshaght: as cur e churrym da kiongoyrt roo. 20As ver oo ayrn jeh dty ooashley hene ersyn, dy vod ooilley sheshaght cloan Israel ve biallagh dasyn. 21As nee eh shassoo fenish Eleazar y saggyrt, nee shirrey coyrle er e hon, liorish briwnys yn Urim, kiongoyrt rish y Chiarn: ec y fockle echeysyn hed ad magh, as ec y fockle echey hig ad stiagh, chammah eh hene, as ooilley cloan Israel mârish, eer yn slane sheshaght. 22As ren Moses myr va’n Chiarn er harey da: as ghow eh Joshua, as hoie eh eh kiongoyrt rish Eleazar y saggyrt, as kiongoyrt rish ooilley’n cheshaght. 23As lhie eh e laueyn er, as livrey eh da e churrym, myr hug y Chiarn sarey, liorish laue Voses.