CAB. XXVIII

1As loayr y Chiarn rish Moses, gra, 2Cur sarey da cloan Israel, as abbyr roo, My hebbal, as m’arran son my ourallyn jeant lesh aile, son soar millish, ver shiu tastey dy hebbal dou ayns nyn imbagh cooie. 3As nee oo gra roo, Shoh yn oural jeant lesh aile, nee shiu chebbal da’n Chiarn: daa eayn jeh’n vleïn shen gyn lheamys, gagh laa, son chebbal-losht kinjagh. 4Yn derrey eayn nee oo chebbal ’sy voghrey, as yn eayn elley nee oo chebbal ec yn astyr; 5As yn jeihoo ayrn jeh ephah dy flooyr, son oural-arran, lesh yn chiarroo ayrn dy hin jeh’n ooil s’miljey ny-chione. 6Te oural-losht gagh-laa, va er ny oardaghey ayns cronk Sinai, son soar millish, oural jeant liorish aile gys y Chiarn. 7As bee’n oural-feeyney echey, yn chiarroo ayrn dy hin son un eayn: ayns yn ynnyd casherick nee oo yn feeyn lajer y gheayrtey magh gys y Chiarn, son oural-iu. 8As yn eayn elley nee oo chebbal ec yn astyr: myr oural-arran y voghrey, as myr yn oural-jough, nee oo chebbal eh ny oural jeant lesh aile, son soar millish roish y Chiarn.

9As er y doonaght, daa eayn jeh’n vleïn shen gyn lheamys, as ephah dy flooyr meein, son oural-arran, lesh ooil ny-chione, as son yn oural-feeyney. 10Shoh’n oural-losht son dy chooilley ghoonaght, cheu-mooie jeh’n oural-losht gagh-laa, as yn oural-arran mârish.

11As ayns toshiaght dagh mee, nee shiu chebbal oural-losht gys y Chiarn: daa ghow aeg, as un rea, shiaght eayin jeh’n vleïn shen gyn lheamys. 12As three omeryn dy flooyr, son oural-arran, mestit lesh ooil, son un dow, as daa omer dy flooyr, son oural-arran, mestit lesh ooil, son un rea: 13As omer elley dy flooyr lesh ooil ny-chione, son oural-arran, son un eayn, dy ve oural-losht dy hoar millish, oural jeant lesh aile gys y Chiarn. 14As bee ny ourallyn-jough oc, lieh hin feeyney son dow, as yn trass ayrn dy hin son rea, as y chiarroo ayrn dy hin son eayn: shoh oural-losht dy chooilley vee ’sy vleïn. 15As un vannan jeh ny goair, vees er ny hebbal, son oural-peccah gys y Chiarn, marish yn oural-losht gagh-laa, as yn oural-feeyney. 16As er yn chiarroo laa yeig jeh’n chied vee, vees caisht y Chiarn. 17As er y wheiggoo laa yeig jeh’n vee shoh, ta’n feailley: shiaght laa vees arran gyn soorit er ny ee. 18Er yn chied laa, bee chaglym casherick; er cha jean shiu monney erbee dy obbyr tooilleilagh: 19Agh nee shiu chebbal oural jeant lesh aile, son oural-losht gys y Chiarn: daa ghow aegey, as un rea, as shiaght eayin jeh’n vleïn shen: bee ad gyn lheamys. 20As bee’n oural-arran oc jeh flooyr lesh ooil ny-chione; three omeryn nee shiu chebbal son dow, as jees son rea. 21As Omer elley harrish nee oo chebbal son dagh eayn; son ny shiaght eayin er-lheh. 22As un ghoayr son oural-peccah, dy yannoo lhiasaghey er nyn son. 23Nee shiu chebbal ad shoh, harrish as erskyn yn oural-losht ’sy voghrey, ta son oural-losht gagh-laa. 24Er yn aght shoh, nee shiu chebbal dagh laa, trooid y chiaghtin, yn bee-oural jeant lesh aile, son soar millish gys y Chiarn: bee eh er ny hebbal marish yn oural-losht gagh-laa, as e oural-feeyney. 25As er y chiaghtoo laa, bee eu chaglym y feailley casherick; er cha jean shiu obbyr tooilleilagh erbee.

26Myrgeddin er feailley ny chied-vessyn, tra ta shiu cur lhieu oural dy arran noa gys y Chiarn, ec kione ny shiaghtinyn, bee eu chaglym-cooidjagh casherick er cha jean shiu obbyr cadjin erbee. 27Agh nee shiu chebbal yn oural-losht, son soar millish roish y Chiarn: daa ghow aegey, un rea, shiaght eayin jeh’n vleïn shen: 28As yn oural-bee oc dy flooyr lesh ooil ny-chione, three omeryn son un dow, daa omer son un rea, 29Omer elley son un eayn, son ny shiaght eayin er-lheh: 30As un vannan veih ny goair, dy yannoo lhiasaghey er nyn son. 31Nee shiu chebbal ad, cheu-mooie jeh’n oural-losht gagh-laa, as yn oural-arran (lhig daue ve gyn lheamys) as nyn ourallyn-feeyney mâroo.