CAB. XXIX

1As ’sy chiaghtoo vee, er y chied laa jeh’n vee, bee meeiteil casherick eu; er cha jean shiu obbyr erbee doccaragh: te laa diu son sheidey ny trumpetyn. 2As nee shiu chebbal oural-losht, son soar millish, roish y Chiarn, un dow aeg, un rea, as shiaght eayin jeh’n vleïn shen gyn lheamys: 3As bee’n oural-arran oc dy flooyr lesh ooil ny-chione, three omeryn son dow, as daa omer son rea, 4As un omer son un eayn, gour ny shiaght eayin er-lheh. 5As un vannan veih ny goair son oural-peccah, dy yannoo lhiasaghey er nyn son: 6Cheu-mooie jeh oural-losht y vee, as yn oural-arran, as yn oural-losht gagh-laa, as e oural-arran lesh, as nyn ourallyn-feeyney, cordail rish yn oardagh, son soar millish, oural jeant lesh aile gys y Chiarn.

7As bee eu, er y jeihoo laa jeh’n chiaghtoo vee shoh, meeiteil casherick; as nee shiu nyn anmeenyn y injillaghey: er cha jean shiu monney erbee dy obbyr. 8Agh nee shiu chebbal oural-losht da’n Chiarn, son soar millish, un dow aeg, un rea, as shiaght eayin jeh’n vleïn shen, bee ad gyn lheamys: 9As bee’n oural-arran oc jeh flooyr lesh ooil ny-chione, three omeryn son dow, as daa omer son un rea, 10Omer elley son eayn, son ny shiaght eayin er-lheh. 11Un vannan veih ny goair, son oural-peccah, marish yn oural-peccah son lhiasaghey, as yn oural-losht kinjagh, as yn oural-arran lesh, as nyn ourallyn-feeyney.

12As er y wheiggoo laa yeig jeh’n chiaghtoo vee, bee meeiteil casherick eu; cha jean shiu obbyr cadjin erbee, as nee shiu feailley ’reayll da’n Chiarn shiaght laa. 13As nee shiu chebbal oural-losht, oural jeant lesh aile, son soar millish, roish y Chiarn; three-jeig dy ghew aegey, daa rea, as kiare eayin jeig jeh’n vleïn shen, bee ad dyn lheamys: 14As bee’n oural-arran oc jeh flooyr lesh ooil ny-chione, three omeryn lesh dagh dow jeh ny three dew jeig, daa omer lesh dagh rea, 15As omer elley lesh dagh eayn jeh ny kiare eayin jeig, 16As un vannan veih ny goair, son oural-peccah, marish yn oural-losht gagh-laa, e oural-arran, as e oural-feeyney.

17As er y nah laa, nee shiu chebbal daa stott jeig, daa rea, kiare eayin jeig jeh’n vleïn shen gyn lheamys: 18As nyn oural-arran, as nyn ourallyn-feeyney, lesh ny dew, lesh ny reaghyn, as lesh ny eayin, vees cordail rish yn earroo oc, lurg yn oardagh: 19As un vannan veih ny goair son oural-peccah, marish yn oural-losht gagh-laa, as yn oural-arran lesh, as nyn ourallyn-feeyney.

20As er yn trass laa, un dow jeig, daa rea, kiare eayin jeig jeh’n vleïn shen fegooish lheamys: 21As yn oural-arran, as ny ourallyn-feeyney oc, lesh ny dew, lesh ny reaghyn, as lesh ny eayin, vees cordail rish yn earroo oc, lurg yn oardagh: 22As un ghoayr son oural-peccah, cheu-mooie jeh’n oural-losht gagh-laa, as e oural-arran, as e oural-feeyney.

23As er y chiarroo laa, jeih dew, daa rea, as kiare eayin jeig jeh’n vleïn shen fegooish lheamys: 24Ny ourallyn-arran, as nyn ourallyn-feeyney, lesh ny dew, lesh ny reaghyn, as lesh ny eayin, vees cordail rish yn earroo oc, lurg yn oardagh: 25As un vannan veih ny goair son oural-peccah, marish yn oural-losht gagh-laa: e oural-arran, as e oural-feeyney.

26As er y wheiggoo laa, nuy dew, daa rea, as kiare eayin jeig jeh’n vleïn shen fegooish lheamys. 27As nyn oural-arran, as nyn ourallyn-feeyney, lesh ny dew, lesh ny reaghyn, as lesh ny eayin, vees cordail rish nyn earroo, lurg yn oardagh: 28As un ghoayr son oural-peccah, marish yn oural-losht kinjagh, as e oural-arran, as e oural-feeyney.

29As er y cheyoo laa, hoght dew, daa rea, as kiare eayin jeh’n vleïn shen fegooish lheamys: 30As yn oural-arran, as yn oural-feeyney oc, lesh ny dew, lesh ny reaghyn, as lesh ny eayin, vees cordail rish yn earroo oc, lurg yn oardagh: 31As un ghoayr son oural-peccah, marish yn oural-losht gagh-laa, yn oural-arran as yn oural-feeyney.

32As er y chiaghtoo laa, shiaght dew, daa rea, as kiare eayin jeig jeh’n vleïn shen gyn lheamys: 33As yn oural-arran, as yn oural-feeyney oc, lesh ny dew, lesh ny reaghyn, as lesh ny eayin, vees cordail rish yn earroo oc, lurg yn oardagh: 34As un ghoayr son oural-peccah, marish yn oural-losht gagh-laa, yn oural-arran, as yn oural-feeyney. 35Er yn hoghtoo laa, bee meeiteil casherick eu: er cha jean shiu monney erbee dy obbyr cadjin. 36Agh nee shiu chebbal oural-losht, oural jeant lesh aile, son soar millish roish y Chiarn; un dow, un rea, shiaght eayin jeh’n vleïn shen gyn lheamys. 37Yn oural-arran oc, as yn oural-feeyney, lesh y dow, lesh y rea, as lesh ny eayin, vees cordail rish yn earroo oc, lurg yn oardagh: 38As un ghoayr son oural-peccah, marish yn oural-losht gagh-laa, as yn oural-arran, as yn oural-feeyney. 39Ny reddyn shoh nee shiu chebbal gys y Chiarn, er ny feaillaghyn pointit, marish ny breearraghyn, as ny chebballyn-arryltagh eu, son ny ourallyn-losht, as son ny ourallyn-arran, as son ny ourallyn-feeyney, as son ny ourallyn-shee eu. 40As dinsh Moses da cloan Israel, cordail rish ooilley ny hug y Chiarn ayns sarey da Moses.