CAB. III

1SHOH neesht sheelogheyn Aaron as Voses, ec y traa ren y Chiarn loayrt rish Moses ayns cronk Sinai. 2As shoh enmyn mec Aaron; Nadab yn fer shinney, as Abihu, Eleazar, as Ithamar. 3Shoh enmyn mec Aaron, ny saggyrtyn va er ny ooilaghey, ren eh hene y chasherickey dy hirveish ayns oik y taggyrtys. 4As hooar Nadab as Abihu baase kiongoyrt y Chiarn, tra heb ad aile neu-chooie roish y Chiarn, ayns faasagh Sinai, as v’ad gyn sluight: as ren Eleazar as Ithamar shirveish ayns oik y taggyrtys kionfenish Aaron nyn ayr. 5As loayr y Chiarn rish Moses, gra, 6Cur lhiat tribe Levi er-gerrey, as cheb ad kionfenish Aaron y taggyrt, dy vod ad shirveish fo. 7As gowee ad yn currym orroo mârishyn, as currym yn slane pobble roish cabbane-agglish yn cheshaght, dy chooilleeney shirveish y chabbane-agglish: 8As gowee ad kiarail jeh ooilley jeshaghtyn chabbane-agglish y pobble, as bee currym cloan Israel orroo, dy yannoo shirveish y chabbane-agglish. 9As ver oo ny Leviteyn da Aaron as da e vec: dasyn t’ad dy slane livreït, veih mastey cloan Israel. 10As nee oo pointeil Aaron, as e vec, as nee adsyn cooilleeney oik y taggyrtys; as bee’n joarree hig er-gerrey, er ny choyrt gy-baase.

11As loayr y Chiarn rish Moses, gra, 12As mish, cur-my-ner, ta mish er ghoaill ny Leviteyn veih mastey cloan Israel, ayns ynnyd ooilley ny ta hoshiaght-ruggit, ta fosley’n vreïn mastey cloan Israel; shen-y-fa, lhiam’s vees ny Leviteyn. 13Er-yn-oyr dy vel ooilley ny ta hoshiaght-ruggit lhiam’s; son er y laa stroie mee ooilley ny va hoshiaght-ruggit ayns cheer Egypt, ren mee casherickey dou hene ooilley ny va hoshiaght-ruggit ayns Israel, chammah dooinney as baagh, lhiam’s vees ad: Mish y Chiarn. 14As loayr y Chiarn rish Moses ayns faasagh Sinai, gra, 15Gow earroo cloan Levi, rere thie nyn ayraghyn, lurg nyn lught-thie: dy chooilley fyrrynagh veih mee d’eash as erskyn, nee oo ad nyn earroo. 16As ren Moses ad y earroo, cordail rish goo’n Chiarn, myr v’eh er harey. 17As shoh va mec Levi, liorish nyn enmyn; Gershon, as Kohath, as Merari. 18As shoh enmyn mec Ghershon, liorish nyn lught-thie, Libni as Shimei. 19As mec Kohath, liorish nyn lught-thie; Amram, as Izehar, Hebron, as Uzziel. 20As mec Merari liorish nyn lught-thie; Mahli as Mushi: shoh lught-thieyn ny Leviteyn, lurg thie nyn ayraghyn. 21Jeh Gershon va kynney ny Libniteyn, as kynney ny Shimiteyn: ad shoh lughtyn-thie ny Gershoniteyn. 22V’adsyn va er nyn earroo jeu, cordail rish earroo ooilley ny fyrrynee veih mee d’eash as erskyn, ta shen, adsyn va er nyn earroo jeu, shiaght thousaneyn as queig cheead. 23Nee lught-thie ny Gershoniteyn grunt y ghoaill son nyn gabbaneyn cooyl y chabbane-agglish, lesh y neear. 24As ard-chaptan thie ayr ny Gershoniteyn, vees Eliasaph mac Lael. 25As currym mec Ghershon, ayns cabbane y cheshaght, vees y chabbane, as y fastee, yn coodagh echey, as y curtan son dorrys chabbane-agglish y cheshaght. 26As curtanyn y chooyrt, as coodagh son dorrys ny cooyrtey, ta liorish y chabbane-agglish, as mygeayrt-y-mysh yn altar, as ny coyrdyn, son ooilley’n chirveish echey.

27As jeh Kohath va kynney ny Amramiteyn, as kynney ny Izehariteyn, as kynney ny Hebroniteyn, as kynney ny Uzzieliteyn: shoh kynneeyn ny Kohathiteyn: 28Ayns earroo ooilley ny fyrrynee veih mee d’eash as erskyn, va hoght thousaneyn as shey cheead, goaill currym yn ynnyd casherick. 29Nee lught-thie mec Kohath goaill grunt er cheu y chabbane-agglish my-yiass. 30As ard-chaptan thie ayrey lught-thie ny Kohathiteyn vees Elizaphan mac Uzziel. 31As er yn currym oc vees yn arg, as y boayrd, as y kainlere, as ny altaryn, as siyn yn ynnyd casherick lhieu t’ad shirveish, as y coodagh, as ooilley ny ta son y chirveish echey. 32As bee Eleazar mac Aaron y saggyrt yn ard-er harrish leeideilee ny Leviteyn, as bee eh ny oaseir orroosyn ta goaill currym yn ynnyd casherick.

33Jeh Merari, va kynney ny Mahliteyn, as kynney ny Mushiteyn; shoh kynneeyn Merari. 34As v’adsyn v’er nyn earroo jeu, cordail rish earroo ooilley ny fyrrynee veih mee d’eash as erskyn, shey thousaneyn as daa cheead. 35As ard-chaptan thie ayr kynneeyn Merari, va Zuriel mac Abihail: nee ad shoh goaill grunt er cheu yn chabbane-agglish my-hwoaie. 36As fo currym as kiarail mec Merari, vees buird y chabbane-agglish, as ny barryn, as ny pillaryn, as ny socketyn, as ooilley ny siyn echey, as ooilley ny ta bentyn rish. 37As pillaryn y chooyrt runt mygeayrt, as ny socketyn, as ny pinnaghyn, as ny coyrdyn oc. 38Agh adsyn nee campal roish y chabbane-agglish lesh y niar, ta shen, shiar jeh cabbane-agglish y cheshaght, vees Moses as Aaron, as e vec, goaill orroo kiarail yn ynnyd casherick, lesh currym cloan Israel; as bee’n joarree hig ny choair er ny choyrt gy-baase. 39Ooilley ny va er nyn earroo jeh ny Leviteyn, ren Moses as Aaron nyn earroo ec sarey’n Chiarn, trooid ooilley nyn lught-thie, ooilley ny fyrrynee veih mee dy eash as erskyn, va daa housane as feed.

40As dooyrt y Chiarn rish Moses, Gow earroo ooilley’n chied-ruggit ta fyrrynee jeh cloan Israel, veih mee dy eash as erskyn, as gow coontey ny enmyn oc. 41As nee oo goaill ny Leviteyn er my hon hene (mish y Chiarn) ayns ynnyd ooilley ny ta hoshiaght-ruggit mastey cloan Israel; as ollagh ny Leviteyn, ayns ynnyd ooilley ny ta hoshiaght-ruggit mastey ollagh cloan Israel. 42As ghow Moses yn earroo oc, myr hug y Chiarn sarey da: ooilley ny va hoshiaght-ruggit mastey cloan Israel. 43As va ooilley ny fyrrynee va hoshiaght-ruggit, liorish coontey nyn enmyn, veih mee d’eash as erskyn, jeusyn v’er nyn earroo, daa housane as feed daa cheead as three-feed as three-jeig.

44As loayr y Chiarn rish Moses, gra, 45Gow ny Leviteyn ayns ynnyd ooilley ny ta hoshiaght-ruggit mastey cloan Israel, as ollagh ny Leviteyn ayns ynnyd yn ollagh oc, as bee ny Leviteyn lhiam’s: Mish y Chiarn. 46As er son ad shen, ta jeh’n daa cheead as three-feed as three-jeig, dy ve er nyn veaysley, jeusyn ta hoshiaght-ruggit jeh cloan Israel, ta ny shlee na ny Leviteyn: 47Nee oo eer goaill queig shekelyn y kione, son dagh unnane, cordail rish shekel yn ynnyd casherick nee oo goaill ad: ta shekel feed gerah. 48As nee oo cur yn argid, lesh t’ou feaysley yn earroo coayr, da Aaron, as da e vec. 49As ghow Moses yn argid-feaysley ocsyn va harrish as erskyn ad shen, va er nyn veaysley liorish ny Leviteyn. 50Jeusyn va hoshiaght-ruggit jeh cloan Israel ghow eh yn argid; thousane three cheead as three-feed as queig shekelyn, cordail rish shekel yn ynnyd casherick. 51As hug Moses yn argid ocsyn v’er nyn veaysley, da Aaron, as da e vec, cordail rish goo’n Chiarn, myr hug y Chiarn sarey da Moses.