CAB. XXX

1As loayr Moses rish leeideilee ny tribeyn, mychione cloan Israel, gra, Shoh’n red ta’n Chiarn er harey. 2My nee dooinney jannoo breearrey gys y chiarn, ny goaill loo, dy chiangley e annym lesh gialdynys; cha jean eh brishey e ockle, nee eh cooilleeney ooilley ny t’eh er ghra. 3My ta moidyn myrgeddin jannoo breearrey gys y Chiarn, as cur ee hene fo kiangley, ayns thie e ayrey, ayns yn aegid eck; 4As e ayr clashtyn y breearrey eck, as e gialdynys, liorish t’ee er chiangley ee hene, as e ayr ve ny host: eisht bee ooilley ny breearraghyn eck mie, as nee dy chooilley vreearrey, lioroo t’ee er chiangley ee hene, shassoo mie. 5Agh my nee yn ayr eck mee-lowal j’ee, er y laa t’eh clashtyn eh, cha jean veg jeh ny breearraghyn, ny jeh dy chooilley chiangley t’ee fo, shassoo: as nee’n Chiarn leih jee, son dy ren yn ayr eck mee-lowal j’ee. 6As my ta ben-phoost jannoo breearrey, ny gialdynys erbee, dy choyrt ee hene fo kiangley; 7As dy ren y sheshey eck clashtyn jeh, as gyn eh dy vee-lowal j’ee, er y laa cheayll eh jeh: eisht nee ny breearraghyn eck shassoo, as bee ny kianglaghyn t’ee fo, er ny yannoo mie. 8Agh my ta e sheshey mee-lowal j’ee, er y laa cheayll eh jeh; eisht nee eh jannoo yn breearrey eck, as shen t’ee er loayrt lesh e meillyn, dy chiangley yn annym eck, dy ve gyn bree; as nee’n Chiarn leih jee. 9Agh nee breearrey dy chooilley ven-treoghe, as breearrey ben scarrit, lesh t’ad er chiangley ad hene, shassoo mie. 10As my ren ee breearrey ayns thie e sheshey, ny kiangley ee hene lesh loo; 11As dy cheayll e sheshey jeh, as gyn eh dy loayrt n’oïee as nagh ren eh mee-lowal j’ee: eisht nee ooilley ny breearraghyn eck shassoo, as bee dy chooilley chiangley, ta’n annym eck fo, jeant mie. 12Agh my ta’n sheshey eck er n’yannoo ad dy bollagh gyn bree, er y laa cheayll eh ad; eisht cha jean cre-erbee t’ee er loayrt, mychione e breearraghyn, ny mychione yn kiangley t’ee fo, shassoo ayns bree: ta’n sheshey eck er chur ad naardey, as nee’n Chiarn leih jee. 13Dy chooilley vreearrey, as dy chooilley loo, dy heaghney yn annym, bee eh lurg aigney’n sheshey eck, dy yannoo mie, ny dy vrishey. 14Agh mannagh vel e sheshey er loayrt n’oïee son laa ny jees, eisht t’eh niartaghey ooilley ny breearraghyn, as ooilley ny kianglaghyn t’ee fo: t’eh jannoo ad mie, son nagh loayr eh n’oïee, er y laa ren eh clashtyn ad. 15Agh my nee eh, er aght erbee, jannoo ad gyn bree, erreish da ve er chlashtyn ad: eisht bee’n loght ecksh ersyn. 16Ad shoh ny slattyssyn, hug y Chiarn ayns sarey da Moses, eddyr dooinney as e ven, eddyr yn ayr as e inneen, choud as t’ee ’syn aegid eck ayns thie e ayrey.