CAB. XXXI

1As loayr y Chiarn rish Moses, gra, 2Gow cooilleeney son cloan Israel er ny Midianiteyn: lurg shen vees oo er dty haglym gys dty phobble. 3As loayr Moses rish y pobble, gra, Lhig da paart jiu ve eïllit son y chaggey, as lhig daue goll noi ny Midianiteyn, as goaill cooilleeney da’n Chiarn, er Midian. 4Thousane jeh dagh tribe, trooid ooilley tribeyn Israel, ver shiu gys y chaggey. 5Myr shen va er ny hayrn ass thousaneyn Israel, thousane jeh dagh tribe, daa housane jeig eïllit son caggey. 6As hug Moses ad magh gys y chaggey, thousane jeh dagh tribe, marish Phinehas mac Eleazar y saggyrt, gys y chaggey, lesh ny jeshaghtyn casherick, as ny trumpetyn ayns e laue, dy heidey. 7As ren ad caggey noi ny Midianiteyn, myr hug y Chiarn sarey da Moses; as varr ad ooilley ny deiney. 8As varr ad reeaghyn Vidian, mâroosyn huitt ayns caggey; ta shen dy ghra, Evi, as Rekem, as Zur, as Hur, as Reba, queig reeaghyn Vidian: Balaam myrgeddin mac Beor varr ad lesh y chliwe. 9As ghow cloan Israel ooilley mraane Vidian nyn gappeeyn, as y chloan veggey oc, as ghow ad ayns spooilley ooilley’n ollagh, as ooilley ny shioltaneyn, as ooilley’n chooid oc. 10As losht ad ooilley ny ard-valjyn raad v’ad cummal, as ooilley ny cashtallyn lajer oc losht ad lesh aile. 11As ghow ad ooilley’n spooilley, as ooilley’n chragh, chammah deiney as maase. 12As hug ad lhieu ny cappeeyn, as y chragh, as y spooilley gys Moses as Eleazar y saggyrt, as gys slane sheshaght cloan Israel, gys y champ ec thalloo-rea Voab, ta liorish Jordan, er-gerrey da Jericho.

13As hie Moses as Eleazar yn saggyrt, as ooilley ard-gheiney yn pobble magh nyn guail, cheu-mooie jeh’n champ. 14As va Moses corree rish leeideilee yn cheshaght-chaggee, rish ny captanyn harrish thousaneyn, as captanyn-keead, haink veih’n chaggey. 15As dooyrt Moses roo, Vel shiu er hauail ooilley ny mraane bio? 16Cur-my-ner, ad shoh hug er cloan Israel, liorish coyrle Valaam, dy yannoo peccah noi’n Chiarn ayns cooish Peor, as va’n chramp fud sheshaght y Chiarn. 17Nish er-y-fa shen, marr-jee dy chooilley lhiannoo-mac mastey’n chloan, as marr-jee dy chooilley ven ta er lhie marish dooinney [dy chleayney eh gys jalloonys]. 18Agh ooilley ny inneenyn, nagh vel dooinney er lhie mâroo freayll-jee bio diu hene. 19As fuirree-jee cheu-mooie jeh’n champ shiaght laa: quoi-erbee ta er varroo persoon erbee, as quoi-erbee ta er ventyn rish corp marroo jean-jee glenney, chammah shiu hene, as ny cappeeyn eu, lesh yn ushtey casherick, er y trass laa, as er yn chiaghtoo laa. 20As glen-jee ooilley nyn goamrey, as ooilley ny ta jeant jeh craitnyn, as dy chooilley nhee ta jeant dy gheaysh ghoair, as dy chooilley red jeant jeh fuygh.

21As dooyrt Eleazar y saggyrt rish ny sidooryn hie gys y chaggey, Shoh oardaghey yn leigh, hug y Chiarn ayns sarey da Moses; 22Er-lhimmey jeh’n airh, as yn argid, yn phrash, yn yiarn, yn stainney, as y leoaie, 23Dy chooilley red oddys surranse yn aile, ver shiu er dy gholl trooid yn aile, as bee eh glen: ny-yeih, bee eh er ny ghlenney lesh yn ushtey casherick: as ooilley nagh vel surranse yn aile, ver shiu er dy gholl trooid yn ushtey. 24As niee-jee nyn eaddagh er y chiaghtoo laa, as bee shiu glen, as ny lurg shen hig shiu stiagh ’sy champ.

25As loayr y Chiarn rish Moses, gra, 26Gow coontey jeh’n spooilley v’er ny ghoaill, chammah jeh dooinney as baagh, uss as Eleazar y saggyrt, as ard ayraghyn y cheshaght: 27As rheynn-jee yn spooilley ayns daa ayrn; eddyr adsyn va ayns y chaggey, as eddyr ooilley’n cheshaght; 28As trog keesh da’n Chiarn jeh ny deiney, hie magh gys y chaggey: un dooinney ass queig cheead; chammah jeh ny persoonyn, as jeh ny dew, as jeh ny assylyn, as jeh ny kirree. 29Gow eh veih’n lieh ocsyn, as cur eh da Eleazar y saggyrt, son chebbal-troggit-seose da’n Chiarn. 30As jeh’n lieh t’ec cloan Israel, nee oo goaill un ayrn ass jeih as da-eed, jeh ny persoonyn, jeh ny dew, jeh ny assylyn, as jeh ny shioltaneyn, jeh dy chooilley horch dy vaagh, as ver oo ad da ny Leviteyn, ta freayll currym chabbane-agglish y Chiarn. 31As ren Moses, as Eleazar y saggyrt, myr hug y Chiarn sarey da Moses. 32As y spooilley, ta shen, yn chooid elley jeh’n chragh va ny deiney-caggee er ghoaill, va shey cheead thousane as three-feed as queig thousane jeig keyrragh, 33As three-feed as daa housane jeig dy ghew, 34As three-feed as un thousane assyl, 35As daa housane jeig as feed ayns ooilley, dy vraane nagh row enney oc er dooinney, liorish lhie mârish. 36As y lieh, va’n ayrn ocsyn hie magh gys caggey, ve ayns earroo three cheead thousane as shiaght thousaneyn jeig as feed as queig cheead baagh keyrragh; 37As va keesh y Chiarn jeh ny kirree, shey cheead as three-feed as queig-jeig. 38As va ny dew shey thousaneyn jeig as feed, jeu va keesh y Chiarn three-feed as ghaa-yeig. 39As va ny assylyn jeih thousaneyn as feed as queig cheead, jeu va keesh y Chiarn three-feed as unnane. 40As va ny persoonyn shey thousaneyn jeig, jeu va keesh y Chiarn daa phersoon jeig as feed. 41As hug Moses yn cheesh, va troggit seose son y Chiarn, da Eleazar y saggyrt, myr hug y Chiarn sarey da Moses. 42As jeh lieh cloan Israel, ren Moses y hroggal veih ny deiney-caggee, 43(Nish yn lieh va bentyn da’n cheshaght, va three cheead thousane as shiaght thousaneyn jeig as feed as queig cheead baagh keyrragh, 44As shey thousaneyn jeig as feed dy ghew, 45As dy assylyn, jeih thousaneyn jeig as feed as queig cheead, 46As shey thousaneyn jeig dy leih.) 47Eer jeh lieh cloan Israel, ghow Moses un ayrn ass jeih as da-eed, chammah jeh dooinney as baagh, as hug eh ad da ny Leviteyn, va goaill currym chabbane-agglish y Chiarn; myr hug y Chiarn sarey da Moses.

48As haink ny leeideilee va harrish thousaneyn y cheshaght-chaggee, captanyn ny thousaneyn, as captanyn-keead, er-gerrey da Moses: 49As dooyrt ad rish Moses, Ta dty harvaantyn er ghoaill coontey ny deiney-caggee, ta fo’n churrym ain, as cha vel shin er choayl dooinney. 50Ta shin, er-y-fa shen, giootal oural-arryltagh da’n Chiarn, jeh shen ta dagh dooinney er chosney, jewellyn as linkyn airhey, as braceletyn, fainaghyn, as jewellyn cleayshey, as broachyn airhey, diuish dy yannoo lhiasaghey son nyn mioys, roish y Chiarn. 51As ghow Moses as Eleazar y saggyrt yn airh voue, ta shen, ooilley ny jewellyn obbrit. 52As ooilley airh yn oural, ren ad chebbal gys y Chiarn, veih ny captanyn-thousane, as ny captanyn-keead, va shey thousane jeig shiaght cheead as jeih shekelyn as da-eed. 53(Son va ny deiney-caggee er ghoaill spooilley, dagh dooinney da hene). 54As ghow Moses as Eleazar yn saggyrt yn airh veih captanyn ny thousaneyn, as keeadyn, as hug ad lhieu eh stiagh ayns y chabbane-agglish, son imraa kinjagh da cloan Israel, fenish y Chiarn.