CAB. XXXII

1Nish va ec cloan Reuben, as cloan Ghad earroo feer vooar dy ollagh: as tra honnick ad dy row thalloo Jazer, as thalloo Ghilead, pastyr mie son ollagh: 2Haink cloan Ghad, as cloan Reuben, as loayr ad rish Moses, as rish Eleazar y saggyrt, as rish leeideilee’n cheshaght, gra, 3Ta Ataroth, as Dibon, as Jazer, as Nimrah, as Heshbon, as Elealeh, as Shebam, as Nebo, as Beon; 4Eer y cheer, hug y Chiarn fo-chosh roish cloan Israel, cheer mie son ollagh, as ta mooarane ollagh ec dty harvaantyn. 5Shen-y-fa, dooyrt ad, My ta shin er gheddyn foayr ayns dty hilley, lhig da’n cheer shoh ve er ny choyrt da dty harvaantyn son cummal, as ny cur lhiat shin harrish Jordan.

6As dooyrt Moses rish cloan Ghad, as rish cloan Reuben, Jed ny braaraghyn eu gys y chaggey, as shiuish dy ve ayns shoh nyn daaue? 7As cre’n-oyr ta shiu cur cloan Israel ass cree, dy gholl harrish gys y cheer ta’n Chiarn er choyrt daue? 8Shoh myr ren nyn ayraghyn, tra hug mish ad veih Kadesh-barnea, dy scrial y cheer: 9Son tra hie ad seose lesh coan Eshcol, as honnick ad y cheer, hyndaa ad cree cloan Israel noi goll seose gys y cheer, va’n Chiarn dy choyrt daue. 10As va corree’n Chiarn er ny vrasnaghey yn traa cheddin, as loo eh, gra, 11Son shickyrys, cha jean veg jeh ny deiney haink seose ass Egypt, veih feed bleïn dy eash as erskyn, fakin y cheer loo mee da Abraham, da Isaac, as da Jacob; kyndagh nagh vel adsyn dy slane er n’eiyrt orrym: 12Er-lhimmey jeh Caleb mac Jephunneh yn Kenezite, as Joshua mac Nun, son t’ad dy kinjagh er n’eiyrt da’n Chiarn. 13As va corree’n Chiarn brasnit noi Israel, as hug eh orroo rouail noon as noal ’syn aasagh da-eed bleïn, derrey va ooilley’n cheeloghe shen, va er n’yannoo olk ayns shilley’n Chiarn, er n’gholl naardey. 14As cur-my-ner, ta shiuish er droggal ayns ynnyd nyn ayraghyn, sluight noa dy ghrogh gheiney, dy ghoostey reesht corree dewil y Chiarn noi Israel. 15Son my hyndaa-ys shiu ersooyl voishyn, faagee eh ad reesht ’syn aasagh, as nee shiuish stroie ooilley’n pobble shoh.

16As haink ad er-gerrey da, as dooyrt ad, Troggee mayd ayns shoh bwoailtchyn son y maase ain, as baljyn son nyn gloan. 17Agh hem mayd hene ayns slane eïlley-caggee roish cloan Israel, derrey vees mayd er chur lhien ad gys nyn gummal: as faag mayd nyn gloan veggey ayns ard-valjyn voallit, er-aggle jeh cummaltee’n cheer. 18Cha jig mayd back gys nyn dhieyn hene, derrey vees dy chooilley ghooinney jeh cloan Israel er ny hickyraghey ayns e eiraght hene: 19Son cha shir mayd eiraght mâroosyn er y cheu elley dy Yordan, ny harrish; er-yn-oyr dy vel yn eiraght ain er duittym hooin er y cheu shoh dy Yordan, lesh y niar.

20As dooyrt Moses roo, My nee shiu shoh, my hed shiu eïllit roish y Chiarn gys y chaggey, 21As dy jed shiu ooilley ayns order-caggee harrish Jordan roish y Chiarn, derrey vees eh er n’imman magh e noidyn kiongoyrt rish, 22As dy bee yn cheer er ny ghoaill roish y Chiarn: eisht hig shiu thie, as bee shiu neu-chyndagh fenish y Chiarn, as kiongoyrt rish Israel; as bee’n cheer shoh nyn eiraght roish y Chiarn. 23Agh mannagh jean shiu shoh, cur-my-ner, nee shiu peccah noi’n Chiarn: as bee shiu shickyr dy jean nyn beccah berraghtyn erriu. 24Trog-jee ard-valjyn da nyn gloan, as bwoailtchyn da ny kirree eu: as cooilleen-jee ny ta shiu er ghra. 25As loayr cloan Ghad, as cloan Reuben rish Moses, gra, Nee dty harvaantyn myr ta my hiarn er harey. 26Faagee mayd nyn gloan, nyn mraane, nyn shioltaneyn, as ooilley’n maase ain, ayns ard-valjyn Ghilead. 27Agh hed dty harvaantyn harrish, dagh dooinney ayns coamrey-caggee, fenish y Chiarn gys y vagher-caggee, myr ta my hiarn dy ghra. 28Myr shoh doardee Moses mychione oc, da Eleazar y saggyrt, as da Joshua mac Nun, as da ard ayraghyn tribeyn cloan Israel: 29As dooyrt Moses roo, My hed cloan Ghad, as cloan Reuben mêriu harrish Jordan, dy chooilley ghooinney ayns e choamrey-caggee roish y Chiarn, as dy bee’n cheer er ny ghoaill kiongoyrt riu; eisht ver shiu daue thalloo Ghilead son eiraght: 30Agh mannagh jed ad harrish mêriu gys y chaggey, bee eiraght oc ny mast’ eu ayns cheer Chanaan. 31As dreggyr cloan Ghad, as cloan Reuben, gra, Myr ta’n Chiarn er ghra rish dty harvaantyn, shen myr nee mayd. 32Hem mayd harrish eïllit roish y Chiarn gys cheer Chanaan, dy vod cummal yn eiraght ain ve er y cheu shoh dy Yordan. 33As hug Moses daue, ta shen dy ghra, da cloan Ghad, as da cloan Reuben, as da lieh-tribe Vanasseh mac Yoseph, reeriaght Sihon ree ny Amoriteyn, as reeriaght Og ree Vashan, yn cheer lesh e ard-valjyn, ayns ny ardjyn, eer ard-valjyn y cheer ooilley mygeayrt.

34As hrog cloan Ghad Dibon, as Ataroth, as Aroer, 35As Atroth, Shophan, as Jaazer as Jogbehah, 36As Beth-nimrah, as Beth-haran, ard-valjyn voallit: as bwoailtchyn keyrragh. 37As hrog cloan Reuben Heshbon, as Elealeh, as Kirjathaim, 38As Nebo, as Baal-meon (ny enmyn oc caghlaït) as Shibmah: as hug ad enmyn elley er ny ard-valjyn ren ad troggal. 39As hie cloan Machir mac Vanasseh gys Gilead, as ghow ad eh, as deiyr ad magh ny Amoriteyn v’ayn. 40As hug Moses Gilead da Machir mac Vanasseh, as va shen e chummal. 41As hie Jair mac Vanasseh, as ghow eh ny baljyn-cheerey v’ayn, as ren eh genmys ad Havoth-jair. 42As hie Nobah, as ghow eh Kenath as ny baljyn-cheerey v’ayn, as denmys eh eh Nobah, lurg e ennym hene.