CAB. XXXIII

1Shoh jurnaaghyn cloan Israel, hie magh ass cheer Egypt, lesh nyn armeeyn, fo laue Voses as Aaron. 2As scrieu Moses coontey nyn gampal rere nyn yurnaaghyn, liorish sarey’n Chiarn: as shoh ny jurnaaghyn oc cordail rish nyn immeeaght. 3As daag ad Rameses ’sy chied vee, er y wheiggoo laa yeig jeh’n chied vee: yn laa er-giyn lurg y chaisht, hie cloan Israel magh lesh laue ard, ayns shilley ooilley ny Egyptianee. 4(Son va ny Egyptianee goanluckey ooilley ny mec shinney oc, va’n Chiarn er stroie ny mast’ oc: er ny jeeghyn oc myrgeddin va’n Chiarn er chooilleeney e vriwnyssyn.) 5As ren cloan Israel scughey veih Rameses, as ren ad campal ayns Succoth. 6As hrog ad veih Succoth, as ren ad campal ayns Etham, ta er oirr yn aasagh. 7As scugh ad veih Etham, as hyndaa ad reesht gys Pi-hahiroth, ta roish Baal-zephon: as champ ad roish Migdol. 8As jimmee ad roue veih Pi-hahiroth, as hie ad trooid yn aarkey gys yn aasagh, as ghow ad jurnah three laa ayns faasagh Etham, as ren ad campal ayns Marah. 9As scugh ad veih Marah, as haink ad gys Elim; as ayns Elim va daa hibbyr jeig ushtey, as three-feed billey-palm as jeih, as ren ad campal ayns shen. 10As scugh ad veih Elim, as ren ad campal liorish y Faarkey Jiarg. 11As hrog ad veih’n Aarkey Jiarg: as ren ad campal ayns faasagh Sin. 12As ghow ad nyn yurnah veih faasagh Sin, as champ ad ayns Dophkah. 13As jimmee ad veih Dophkah, as ren ad campal ayns Alush. 14As scugh ad veih Alush, as ren ad campal ec Rephidim, raad nagh row ushtey da’n pobble dy iu. 15As jimmee ad roue veih Rephidim, as ren ad campal ayns faasagh Sinai. 16As scugh ad veih faasagh Sinai, as ren ad campal ec Kibroth-hattaavah. 17As hie ad veih Kibroth-hattaavah, as camp ad ec Hazeroth. 18As jimmee ad veih Hazeroth, as ren ad campal ayns Rithmah. 19As daag ad Rithmah, as ren ad campal ec Rimmon-parez. 20As hie ad roue veih Rimmon-parez, as champ ad ayns Libnah. 21As scugh ad veih Libnah, as ren ad campal ec Rissah. 22As ghow ad nyn yurnah veih Rissah, as ren ad campal ayns Kehelathah. 23As hrog ad veih Kehelathah, as ren ad campal ayns cronk Shapher. 24As scugh ad veih cronk Shapher, as ren ad campal ayns Haradah. 25As hie ad veih Haradah, as ren ad campal ayns Makheloth. 26As ren ad scughey veih Makheloth, as campal ec Tahath. 27As hrog ad veih Tahath, as ren ad campal ec Tarah. 28As scugh ad veih Tarah, as champ ad ayns Mithcah. 29As hie ad veih Mithcah, as ren ad campal ayns Hashmonah. 30As hrog ad veih Hashmonah, as ren ad campal ec Moseroth. 31As jimmee ad veih Moseroth, as ren ad campal ayns Bene-jaakan. 32As scugh ad veih Bene-jaakan, as champ ad ec Hor-hagidgad. 33As hrog ad veih Hor-hagidgad, as ren ad campal ayns Jotbathah 34As scugh ad veih Jotbathah, as ren ad campal ec Ebronah. 35As jimmee ad roue veih Ebronah, as ren ad campal ec Ezion-gaber. 36As scugh ad veih Ezion-gaber, as ren ad campal ayns faasagh Zin, ta shen Kadesh. 37As scugh ad veih Kadesh, as champ ad ayns cronk Hor, er slyst cheer Edom. 38As hie Aaron yn saggyrt seose er cronk Hor, ec sarey’n Chiarn, as hooar eh baase ayns shen, ’sy da-eedoo vleïn, lurg da cloan Israel ve er jeet ass cheer Egypt, er y chied laa jeh’n wheiggoo vee. 39As va Aaron shey-feed bleïn dy eash as three, tra hooar eh baase er cronk Hor. 40As cheayll ree Arad yn Canaanite (va reill my-yiass, ayns cheer Chanaan) jeh cheet cloan Israel. 41As jimmee ad veih cronk Hor, as ren ad campal ayns Zalmonah. 42As hrog ad veih Zalmonah, as ren ad campal ayns Punon. 43As jimmee ad veih Punon, as ren ad campal ayns Oboth. 44As hrog ad veih Oboth, as champ ad ayns Ije-abarim, rish oirr Voab. 45As jimmee ad veih Iim, as ren ad campal ayns Dibon-gad. 46As scugh ad veih Dibon-gad, as champ ad ayns Almon-diblathaim. 47As scugh ad veih Almon-diblathaim, as ren ad campal ayns sleityn Abarim, roish Nebo, 48As jimmee ad veih sleityn Abarim, as champ ad ayns cheer-rea Voab, liorish Jordan, roish Jericho. 49As ren ad campal liorish Jordan, veih Beth-jesimoth gys Abel-shittim, ayns cheer-rea Voab.

50As loayr y Chiarn rish Moses, ayns thalloo-rea Voab, liorish Jordan, er-gerrey da Jericho, gra, 51Loayr rish cloan Israel, as abbyr roo, Tra vees shiu er gholl harrish Jordan, ayns cheer Chanaan; 52Eisht nee shiu geiyrt magh ooilley cummaltee yn cheer veih kiongoyrt riu, as stroie ooilley caslyssyn ny jeeghyn oc, as ooilley ny jallooyn lheït, as dy bollagh skaa sheese ooilley ny ynnydyn ard oc. 53As nee shiu yn cheer y reaghey jeh e chummaltee, as baghey ayn: son ta mish er choyrt diu yn cheer son eiraght. 54As nee shiu yn cheer y rheynn liorish lot, son eiraght mastey ny kynneeyn eu, as da mooarane ver shiu ny smoo dy eiraght, as da’n veggan, ver shiu ny sloo: bee eiraght dagh dooinney raad ta e chronney tuittym: cordail rish tribeyn nyn ayraghyn, vees nyn eiraght. 55Agh mannagh n’eiyr shiu magh cummaltee yn cheer veih kiongoyrt riu; eisht hig eh gy-kione, dy bee adsyn aagys shiu er-mayrn, son gah ayns nyn sooillyn, as jilg ayns nyn lhiattee, as ver ad sneih erriu, ’sy cheer raad nee shiu cummal. 56Myrgeddin, hig eh gy-kione, dy Jean-yms riuish, myr smooinee mee dy yannoo roosyn.