CAB. XXXIV

1As loayr y Chiarn rish Moses, gra, 2Cur sarey da cloan Israel, as abbyr roo, Tra hig shiu gys cheer Chanaan (shoh’n cheer nee tuittym hiu son eiraght, ta shen, cheer Chanaan marish e ardjyn): 3Eisht bee’n kierroo jiass eu, veih faasagh Zin, seose rish slyst Edom: as y chagliagh jiass eu vees ec oirr sodjey magh y cheayn-sailley, lesh y niar. 4As nee’n chagliagh eu chyndaa veih’n jiass seose lesh Akrabbim as veih shen gys Zin: as bee’n lhiurid veih’n jiass gys Kadesh-barnea, as veih shen gys Hazar-addar, as harrish gys Azmon. 5As ver y chagliagh lesh cumbaase veih Azmon gys awin Egypt, as nee eh roshtyn gys yn aarkey. 6As er son y chierroo heear, bee’n aarkey mooar hene eu son cagliagh: shoh vees y kierroo heear eu. 7As shoh vees y chagliagh twoaie eu; veih’n aarkey mooar, roie-jee jeeragh er cronk Hor. 8Veih cronk Hor, nee shiu roie yn chagliagh eu derrey hig ee gys Hamath: as bee’n chagliagh veih shen gys Zedad. 9As nee’n chagliagh roie gys Ziphron; as nee eh roshtyn gys Hazar-enan: shoh vees y chagliagh twoaie eu. 10As nee shiu markal magh yn chagliagh har eu veih Hazar-enan gys Shepham. 11As hed y chagliagh sheese veih Shepham gys Riblah, er cheu-har jeh Ain; as nee’n chagliagh roie sheese, as roshtyn gys lhiattee cheayn Chinnereth, lesh y niar. 12As nee’n chagliagh roie sheese gys Jordan, as roshtyn gys y Faarkey Sailley: shoh vees y cheer eu, lesh ny ardjyn echey ooilley mygeayrt. 13As hug Moses sarey da cloan Israel, gra, Shoh yn cheer nee shiu y ghoaill son eiraght liorish lot, doardee’n Chiarn dy ve er ny choyrt da ny nuy tribeyn, as da’n lieh-tribe. 14Son ta tribe cloan Reuben, cordail rish thie nyn ayrey, as tribe cloan Ghad, cordail rish thie nyn ayrey, er gheddyn nyn eiraght, as ta lieh-tribe Vanasseh er gheddyn nyn eiraght. 15Ta’n daa hribe, as y lieh-tribe er gheddyn nyn eiraght, cheu shoh dy Yordan, er-gerrey da Jericho, er y cheu-har, lesh irree ny greïney.

16As loayr y Chiarn rish Moses, gra, 17Shoh enmyn ny deiney nee rheynn y thalloo erriu: Eleazar y saggyrt, as Joshua mac Nun. 18As gowee shiu un phrince jeh dagh tribe, dy rheynn y thalloo son eiraght. 19As shoh enmyn ny deiney: jeh tribe Yudah, Caleb mac Jephunneh. 20As jeh tribe cloan Simeon Shemuel mac Ammihud. 21Jeh tribe Venjamin, Elidad mac Chislon. 22As prince tribe cloan Dan, Bukki mac Jogli. 23Prince cloan Yoseph, son tribe cloan Vanasseh, Hanniel mac Ephod. 24As prince tribe cloan Ephraim, Kemuel mac Shiphtan. 25As prince tribe cloan Zebulun, Elizaphan mac Parnach. 26As prince tribe cloan Issachar, Paltiel mac Azzan. 27As prince tribe cloan Asher, Ahihud mac Shelomi. 28As prince tribe cloan Naphtali, Pedahel mac Ammihud. 29Shoh adsyn, daue hug y Chiarn sarey dy rheynn yn eiraght er cloan Israel, ayns cheer Chanaan.