CAB. XXXV

1As loayr y Chiarn rish Moses, ayns thalloo-rea Voab, liorish Jordan, er-gerrey da Jericho, gra, 2Cur sarey da cloan Israel, dy der ad da ny Leviteyn, ass eiraght nyn gummal, ard-valjyn dy chummal ayndoo: as ver shiu myrgeddin da ny Leviteyn gleebyn, son ny ard-valjyn ooilley mygeayrt-y-moo. 3As ny ard-valjyn vees oc dy vaghey ayndoo, as bee ny gleebyn son yn ollagh, son y chooid, as son ooilley’n maase oc. 4As nee ny gleebyn mysh ny ard-valjyn, ver shiu da ny Leviteyn, roshtyn veih voalley’n ard-valley jeeragh magh, daa housane cubit ooilley mygeayrt. 5As nee shiu towse, magh voish yn ard-valley, er y cheu-har daa housane cubit, as er y cheu-heear daa housane cubit, as er y twoaie daa housane cubit: as bee’n ard-valley ’sy vean; shoh vees oc son gleebyn mygeayrt ny ard-valjyn. 6As mastey ny ard-valjyn ver shiu da ny Leviteyn, bee shey ard-valjyn son sauchys, ad shoh nee shiu pointeil dasyn varrys dooinney ayns marranys, dy vod eh chea gys shen: as ver shiu daue harrish as erskyn, daa ard-valley as da-eed. 7Myr shoh, bee ooilley ny ard-valjyn, ver shiu da ny Leviteyn, hoght as da-eed; ad shoh lesh nyn gleebyn. 8As bee ny ard-valjyn ver shiu daue, jeh eiraght cloan Israel: vouesyn ta mooarane oc, nee shiu mooarane y ghoaill; agh vouesyn ta’n veggan oc, cha jean shiu agh beggan y ghoaill: ver shiu ooilley ayrn jeh nyn ard-valjyn da ny Leviteyn, cordail rish nyn eiraght.

9As loayr y Chiarn rish Moses, gra, 10Loayr rish cloan Israel, as abbyr roo, Tra vees shiu er jeet harrish Jordan, gys cheer Chanaan; 11Eisht nee shiu soiaghey magh ard-valjyn diu, dy ve ard-valjyn sauchey er nyn son; dy vod eshyn, ta marroo persoon erbee trooid taghyrt, roie er-chea gys shen. 12As bee ad diu ard-valjyn son sauchys veih’n cooilleeneyder-folley; nagh bee’n marrooder er ny choyrt dy baase, derrey nee eh shassoo fenish y cheshaght ayns briwnys. 13As jeh ny ard-valjyn shoh ver shiu daue, bee shey jeu son sauchys. 14Ver shiu daue three ard-valjyn cheu shoh dy Yordan, as three ard-valjyn ver shiu daue ayns cheer Chanaan, vees ard-valjyn son sauchys. 15Bee ny shey ard-valjyn shoh son sauchys, chammah da cloan Israel, as da’n joarree, as son y troailtagh ta cummal ny mast’ oc: dy vod dagh unnane, ta marroo persoon erbee ayns marranys, chea gys shen. 16As my t’eh er woalley eh lesh greïe yiarn, (dy ve oyr baaish da) t’eh ny ghunver: bee’n dunver son shickyrys er ny choyrt dy baase. 17As my t’eh bwoalley eh lesh clagh-laue (dy ve oyr e vaaish) as dy vow eh baase, dunver eh; bee’n dunver dy shickyr er ny choyrt dy baase. 18Ny my nee eh bwoalley eh lesh wappin-maidjey (dy ve oyr e vaaish) as dy vow eh baase, dunver eh: bee’n dunver dy shickyr er ny choyrt dy baase. 19Nee’n cooilleeneyder-folley hene cur y dunver dy baase: tra hig eh ny raad, ver eh dy baase eh. 20Agh my t’eh tuittym er trooid goanlys, ny ceau red erbee er, liorish lhie cooyl-chlea er e hon, dy vow eh baase; 21Ny ayns noidys bwoalley eh lesh e laue, dy vow eh baase: bee eshyn woaill eh dy shickyr er ny choyrt dy baase; son she dunver eh: ver y cooilleeneyder-folley yn dunver dy baase, tra t’eh meeiteil rish. 22Agh my t’eh er roie er doaltattym, fegooish noidys, ny er cheau red erbee er, fegooish lhie cooyl-chlea; 23Ny lesh clagh erbee, liorish oddys dooinney v’er ny varroo, gyn fakin eh, as shen ve ceaut er, dy vow eh baase, as nagh row eh e noid, chamoo v’eh shirrey skielley y yannoo da; 24Eisht nee ny briwnyn yn chooish y vriwnys, eddyr yn marrooder as yn cooilleeneyder-folley, cordail rish ny briwnyssyn shoh. 25As nee’n whaiyl livrey yn marrooder veih laue yn cooilleeneyder-folley, as ver ad reesht eh gys ard-valley e hauchys, raad v’eh er-chea: as nee eh tannaghtyn ayn, derrey baase yn ard-saggyrt, va er ny ooilaghey lesh yn ooil casherick. 26Agh my hig y marrooder ec traa erbee cheu-mooie jeh cagliagh ard-valley e hauchys, raad v’eh er-chea; 27As dy vow’n cooilleeneyder-folley eh, cheu-mooie jeh cagliaghyn yn ard-valley dy hauchys, as dy jean yn cooilleeneyder-folley cur dy baase yn marrooder; cha bee eh kyndagh jeh fuill: 28Son dy lhisagh eh ve er hannaghtyn ayns ard-valley e hauchys, derrey baase yn ard-saggyrt: agh lurg baase yn ard-saggyrt, hig y marrooder reesht gys cheer e chummal hene. 29Shoh myr vees ny cooishyn shoh son slattys dy vriwnys diu, trooid ny sheelogheyn eu, ayns ooilley nyn gummallyn. 30Quoi-erbee ta marroo persoon erbee, bee’n dunver er ny choyrt dy baase, liorish beeal feanishyn: agh cha bee un feanish fondagh noi persoon erbee, dy choyrt eh dy baase. 31Ny-sodjey, cha jean shiu goaill coonrey erbee son bioys yn dunver, ta toilchin baase: agh bee eh son shickyrys er ny stroie. 32As cha jean shiu goaill coonrey erbee er y hon-syn ta er hea gys ard-valley e hauchys, eh dy heet reesht dy vaghey ’sy cheer, derrey baase yn ard-saggyrt. 33Myr shoh cha dayrn shiu mollaght er y cheer ta shiu cummal ayn: son ta fuill jannoo yn cheer an-chasherick: as cha vod yn cheer v’er ny ghlenney, veih’n uill ta er ny gheayrtey ayn, agh liorish yn uill echeysyn ren y gheayrtey eh. 34Ny jean-jee yn cheer, er-y-fa shen, neu-ghlen, raad ta shiu cummal, ayn ta my enish: son ta Mish y Chiarn cummal mastey cloan Israel.