CAB. XXXVI

1As haink ny ard ayraghyn jeh kynneeyn cloan Ghilead, mac Machir, mac Vanasseh, jeh sluight thie mec Yoseph, er-gerrey, as loayr ad fenish Voses, as ny princeyn ard ayraghyn cloan Israel: 2As dooyrt ad, Hug y Chiarn sarey da my hiarn dy rheynn y cheer, son eiraght liorish cronney er cloan Israel; as va my hiarn er ny harey liorish y Chiarn, dy chur eiraght Zelophehad nyn mraar, da e inneenyn. 3As my vees ad poost rish veg jeh mec tribeyn elley cloan Israel; eisht bee’n eiraght oc er ny ghoaill voish eiraght nyn ayraghyn, as bee eh er ny choyrt gys eiraght yn tribe, huggey t’ad er nyn ghoaill stiagh myr shen bee eh ny scarrey voish cronney yn eiraght ainyn. 4As tra hig y Jubile (bleïn y feaysley) son cloan Israel mygeayrt, eisht bee’n eiraght oc shoh er ny choyrt gys eiraght y tribe, ayn t’ad er nyn ghoaill stiagh: myr shen bee nyn eiraght er ny ghoaill voish eiraght tribe ny ayraghyn ainyn. 5As doardee Moses da cloan Israel, cordail rish goo yn Chiarn, gra, Ta tribe mec Yoseph er loayrt dy mie. 6Shoh myr ta’n Chiarn sarey mychione inneenyn Zelophehad, gra, Lhig daue poosey lurg nyn aigney hene: ny-lomarcan rish deiney-mooinjer jeh tribe nyn ayrey nee ad poosey. 7Myr shoh cha jean eiraght cloan Israel scughey veih tribe dy tribe: son nee dagh unnane jeh cloan Israel freayll eh hene gys eiraght tribe e ayraghyn. 8As bee dy chooilley inneen ta cummal eiraght ayns tribe erbee jeh cloan Israel, ny ben da fer jeh lught-thie ayns tribe e ayrey, dy vod cloan Israel freayll possession, dagh dooinney jeh eiraght e ayraghyn. 9Chamoo nee’n eiraght scughey veih tribe dy tribe; agh nee dagh unnane jeh tribeyn cloan Israel freayll eh hene gys e eiraght hene. 10Eer myr doardee yn Chiarn da Moses, shen myr ren inneenyn Zelophehad. 11Son va Mahlah, Tirzah, as Hoglah, as Milcah, as Noah, inneenyn Zelophehad, poost rish mec braar nyn ayrey. 12As v’ad poost rish deiney jeh lught-thie mec Vanasseh mac Yoseph, as ren yn eiraght tannaghtyn ayns tribe lught-thie nyn ayrey. 13Shoh ny oardaghyn as ny briwnyssyn, ren y Chiarn sarey liorish laue Voses, da cloan Israel, ayns cheer-rea Voab, liorish Jordan, er-gerrey da Jericho.