CAB. IV

1As loayr y Chiarn rish Moses, as rish Aaron, gra, 2Gow earroo mec Kohath veih mastey mec Levi, cordail rish nyn lught-thie, rere thie nyn ayrey. 3Veih jeig bleeaney as feed dy eash as erskyn, eer gys jeih bleeaney as da-eed, ooilley ny ta goll ’sy cheshaght, dy yannoo shirveish ’sy chabbane-agglish. 4Shoh vees shirveish mec Kohath ’sy chabbane-agglish, mysh ny reddyn smoo casherick.

5As tra ta’n camp dy gholl er y hoshiaght, hig Aaron as e vec, as nee ad goaill sheese yn coodagh, as coodee ad arg y chonaant lesh: 6As ver ad er yn coodagh dy chraitnyn broc; as skeaylee ad harrish eaddagh slane-gorrym, as ver ad ayn ny looghyn. 7As er boayrd yn arran casherick soit magh, nee ad skeayley coodagh dy eaddagh gorrym, as ver ad er ny claareeyn, as ny spainyn, as ny meilaghyn, as coodaghyn dy choodaghey lhieu: as bee’n arran kinjagh er. 8As skeaylee ad orroo eaddagh dy scarleod, as cur harrish shen coodagh dy chraitnyn broc, as ver ad ayn ny looghyn echey 9As gowee ad eaddagh gorrym, as coodee ad kainlere y toilshey, as e lampyn, as e smalyderyn, as e phlaityn cour ny smalyn, as ooilley ny siyn ooil, lhieu t’ad dy hirveish eh. 10As ver ad eh, as ooilley ny siyn echey ayns coodagh dy chraitnyn broc, as ver ad eh er barrey. 11As er yn altar airh skeaylee ad eaddagh gorrym, as coodee ad shen lesh craitnyn broc, as ver ad huggey e looghyn. 12As gowee ad ooilley jeshaghtyn y chirveish, lhieu t’ad shirveish ayns yn ynnyd casherick, as cur ad ayns eaddagh gorrym, as ver ad orroo coodagh dy chraitnyn broc, as ver ad eh er barrey. 13As gowee ad ersooyl yn leoie veih’n altar, as skeaylee ad harrish eaddagh gorrym-jiarg. 14As ver ad er ooilley ny siyn echey, lhieu t’ad shirveish mysh, ta shen, ny censeryn, ny aalyn, as ny sleaystyn, as ny basonyn, ooilley siyn yn altar; as skeaylee ad harrish coodagh dy chraitnyn broc, as ver ad huggey ny looghyn. 15As tra vees Aaron as e vec erreish coodaghey yn ynnyd casherick, as ooilley ny siyn casherick, myr ta’n camp dy gholl er y hoshiaght; lurg shen, hig mec Kohath dy choyrt lhieu eh; agh cha negin daue bentyn rish nhee casherick erbee, er-aggle dy vow ad baase. Ta ny reddyn shoh errey mec Kohath, ayns cabbane-agglish y cheshaght.

16As gys oik Eleazar mac Aaron y saggyrt, ta bentyn yn ooil son soilshey, as yn oural-millish, as yn oural-arran gagh-laa, as yn ooil casherick, as slane kiarail y chabbane-agglish, as ooilley ny t’ayn, ayns yn ynnyd casherick, as ayns ny siyn echey.

17As loayr y Chiarn rish Moses, as rish Aaron, gra, 18Ny jean-jee giarey jeh sluight kynney ny Kohathiteyn, veih mastey ny Leviteyn. 19Agh shoh myr nee shiu roo, dy vod ad ve bio, as gyn baase y gheddyn, tra hig ad er-gerrey gys ny nheeghyn smoo casherick; hed Aaron as e vec stiagh, as pointeil ad dagh unnane gys e hirveish, as gys e churrym. 20Agh cha jed ad stiagh dy yeeaghyn tra ta ny reddyn casherick er nyn goodaghey: er-aggle dy vow ad baase.

21As loayr y Chiarn rish Moses, gra, 22Gow myrgeddin coontey mee Ghershon, trooid ooilley thieyn nyn ayraghyn, rere nyn lught-thie; 23Veih jeih bleeaney as feed d’eash as erskyn, gys jeih bleeaney as da-eed d’eash, nee oo ad y earroo; ooilley ny ta goll stiagh dy chooilleeney yn chirveish, dy yannoo yn obbyr ayns cabbane-agglish y cheshaght. 24Shoh obbyr lught-thie ny Gershoniteyn, dy hirveish, as son carriads. 25As ver ad lhieu curtanyn y chabbane, as cabbane-agglish y cheshaght, yn coodagh echey, as y coodagh dy chraitnyn broc ta harrish, as curtan-dorrys chabbane-agglish y cheshaght. 26As curtanyn ny cooyrtey, as y curtan son dorrys giat ny cooyrtey ta liorish y chabbane, as liorish yn altar cruin mygeayrt, as ny coyrdyn oc, as ooilley jeshaghtyn y chirveish oc, as ooilley ny ta jeant nyn gour: shoh myr nee ad shirveish. 27Lurg oardagh Aaron as e vec vees ooilley shirveish mec ny Gershoniteyn, ayns ooilley nyn erraghyn, as ayns ooilley nyn shirveish, as nee shiuish pointeil ayns currym daue ooilley nyn erraghyn. 28Shoh shirveish lught-thie mec Ghershon, ayns cabbane-agglish y cheshaght: as bee’n currym ocsyn fo laue Ithamar mac Aaron y saggyrt.

29Er son mec Merari, nee oo ad y earroo cordail rish nyn lught-thie, rere thie nyn ayraghyn: 30Veih jeih bleeaney as feed d’eash as erskyn, eer gys jeih bleeaney as da-eed, gowee oo yn coontey oc, dagh unnane ta gentreil ’sy chirveish, dy yannoo obbyr chabbane-agglish y cheshaght. 31As shoh currym yn errey oc, cordail rish ooilley’n chirveish oc ayns cabbane-agglish y cheshaght: buird y chabbane-agglish, as ny barryn, as ny pillaryn, as ny socketyn echey, 32As pillaryn y chooyrt ooilley mygeayrt, as ny socketyn, as ny pinnaghyn, as ny coyrdyn oc, lesh ooilley nyn jeshaghtyn, as marish ooilley yn obbyr oc: as nee shiu genmys daue er-lheh, jeshaghtyn currym nyn errey 33Shoh shirveish lught-thie mec Merari, cordail rish ooilley’n chirveish oc ayns cabbane-agglish y cheshaght, fo laue Ithamar mac Aaron y saggyrt.

34As ren Moses as Aaron as ard-gheiney’n cheshaght, coontey ’ghoaill jeh mec ny Kohathiteyn, cordail rish y lught-thie oc, as rere thie nyn ayraghyn; 35Veih jeih bleeaney as feed d’eash as erskyn, gys jeih bleeaney as da-eed d’eash, dagh fer ta gentreil ’sy chirveish, son yn obbyr ayns cabbane-agglish y cheshaght: 36As v’adsyn va er nyn earroo jeu, lurg nyn lught-thie, daa housane shiaght cheead as jeih as da-eed. 37Shoh adsyn v’er nyn earroo jeh lught-thie ny Kohathiteyn, ooilley ny va son shirveish y yannoo ayns cabbane-agglish y cheshaght; ad ren Moses as Aaron nyn earroo, cordail rish sarey’n Chiarn, liorish laue Voses. 38As adsyn v’er nyn earroo jeh mec Ghershon, trooid nyn lught-thie, as rere thie nyn ayraghyn: 39Veih jeih bleeaney as feed dy eash as erskyn, gys jeih bleeaney as da-eed dy eash, dagh fer ta gentreil ayns y chirveish, son yn obbyr ayns cabbane-agglish y cheshaght: 40Ta shen, adsyn va er nyn earroo jeu, trooid nyn lught-thie, rere thie nyn ayraghyn, v’ad daa housane as shey cheead as jeih as feed. 41Shoh adsyn v’er nyn earroo jeh lught-thie mec Ghershon, jeh ooilley ny va son shirveish ayns cabbane-agglish y cheshaght, ad ren Moses as Aaron nyn earroo, cordail rish sarey’n Chiarn.

42As adsyn v’er nyn earroo jeh lught-thie mec Merari, trooid ny kynneeyn oc, rere thie nyn ayraghyn. 43Veih jeih bleeaney as feed dy eash as erskyn, derrey jeih bleeaney as da-eed, dagh unnane ta gentreil ’sy chirveish, son yn obbyr ayns cabbane-agglish y cheshaght: 44Ta shen, adsyn v’er nyn earroo jeu, cordail rish nyn lught-thie, v’ad three thousaneyn as daa cheead. 45Shoh adsyn v’er nyn earroo jeh lught-thie Merari, ren Moses as Aaron nyn earroo, cordail rish goo yn Chiarn, liorish laue Voses: 46Adsyn ooilley v’er nyn earroo jeh ny Leviteyn, ren Moses as Aaron as ard-gheiney Israel nyn earroo, cordail rish nyn lught-thie, as rere thie nyn ayraghyn; 47Veih jeih bleeaney as feed dy eash as erskyn, derrey jeih bleeaney as da-eed, dagh unnane haink dy yannoo obbyr y chirveish, as carriads yn errey, ayns cabbane-agglish y cheshaght: 48Adsyn v’er nyn earroo jeu, v’ad hoght thousaneyn as queig cheead as kiare-feed. 49Cordail rish sarey’n Chiarn, v’ad er nyn earroo fo laue Voses, dagh dooinney cordail rish e hirveish, as cordail rish e errey; myr shoh v’ad er nyn earroo liorishyn, myr hug y Chiarn sarey da Moses.