CAB. V

1As loayr y Chiarn rish Moses, gra, 2Cur sarey da cloan Israel, dy der ad ass y champ dy chooilley lourane, as dagh unnane ta fo doghan roie-folley, as quoi-erbee ta neu-ghlen liorish bentyn rish corp marroo. 3Chammah dooinney as ben ver shiu magh, cheu-mooie jeh’n champ ver shiu ad: nagh jean ad neu-chasherickey ny campyn oc, ny-vud oc ta my enish. 4As ren cloan Israel myr shen, as hug ad ad magh ass y champ: myr dooyrt y Chiarn rish Moses, myr shen ren cloan Israel. 5As loayr y Chiarn rish Moses, gra, 6Abbyr rish cloan Israel, Tra vees dooinney ny ben kyndagh jeh aggair erbee ta deiney cur-rish, dy yannoo peccah noi’n Chiarn, as dy bee’n persoon shen er ny gheddyn oolee; 7Eisht nee eh goaill-rish e pheccah, t’eh er n’yannoo: as nee eh slane cooilleeney yannoo son yn assee, as ver eh huggey yn wheiggoo ayrn jeh, as ver eh shoh dasyn t’eh er n’yannoo aggair da. 8Agh mannagh bee echey dooinney-mooinjerey erbee, dasyn dy yannoo cooilleeney son yn aggair, lhig da’n cooilleeney ’ve jeant da’n Chiarn, eer da’n taggyrt: cheu-mooie jeh rea son lhiasaghey, liorish vees lhiasaghey jeant er e hon. 9As bee dy chooilley oural, jeh nheeghyn casherick cloan Israel, v’er ad lhieu gys y taggyrt, leshyn. 10Leshyn vees cooid casherick dy chooilley ghooinney: shen ny ta dooinney erbee dy choyrt da’n taggyrt, bee eh leshyn.

11As loayr y Chiarn rish Moses, gra, 12Loayr rish cloan Israel, as insh daue, My ta ben ghooinney erbee goll er-shaghryn, as kyndagh jeh drogh-yannoo n’oï, 13As dy bee ee kyndagh jeh brishey-poosey rish dooinney erbee, as dy bee shoh keillit veih sooillyn e sheshey, as freilt follit, as ee jeant neu-ghlen, as nagh bee fenish erbee n’oïee, chamoo ee er ny ghoaill ayns e peccah. 14As dy jig y smooinaght dy eadaghey ayns e chree, as dy bee eh geadaghey mysh e ven, as ish kyndagh; ny my vees y smooinaght dy eadaghey ayn, as eh geadaghey mysh e ven, as nagh vel ee kyndagh; 15Eisht ver y dooinney lesh e ven gys y taggyrt, as ver eh lesh yn oural eck er e son, yn jeihoo ayrn jeh ephah dy veinn-oarn; cha deayrtee eh veg yn ooil er, ny cur frankincense er, son she oural-eadaghey t’ayn, as chebbal son imraa, cur lesh drogh-yannoo gys soilshey. 16As ver y saggyrt lesh ee er-gerrey, as soiaghey ee kiongoyrt rish y Chiarn. 17As nee’n saggyrt ushtey casherick y ghoaill ayns saagh craie, as jeh’n joan t’er laare y chabbane-agglish nee’n saggyrt goaill, as cur eh ayns yn ushtey. 18As nee’n saggyrt soiagh yn ven kiongoyrt y Chiarn, as roostey kione y ven, as cur y chebbal son briaght ayns ny laueyn, eck, ta shen, yn oural-eadagh: as bee ec y taggyrt ny laue yn ushtey sharroo ta cur y mollaght lesh. 19As ver y saggyrt currym urree liorish loo, as jir eh rish y ven, Mannagh vel dooinney erbee er lhie mayrt, as mannagh vel oo er n’gholl er-shaghryn gys neu-ghlennid rish dooinney elley, ayns ynnyd dty heshey, dy r’ou seyr veih’n ushtey sharroo shoh ta cur lesh y mollaght: 20Agh my t’ou er n’gholl er-shaghryn rish fer erbee, ayns ynnyd dty heshey, as uss er n’yannoo peccah, as dy vel ec dooinney ennagh dy yannoo rhyt, cheu-mooie jeh dty heshey hene: 21Eisht nee’n saggyrt currym y chur er y ven lesh breearrey dy vollaght, as nee’n saggyrt gra rish y ven, Dy jean y Chiarn uss y yannoo mollaghtagh, as dwoaiagh er coontey loo oaiagh mastey dty phobble, tra ver eh er dty lheeasid dy loau, as dty volg dy att; 22As dy jed yn ushtey shoh, ta cur lesh y mollaght ayns dty vynnagh, dy chur er dty volg dy att, as dty lheeasid dy loau: As nee’n ven, gra, Amen, Amen. 23As nee’n saggyrt scrieu ny mollaghtyn shoh ayns lioar, as nee eh dolley ad ass lesh yn ushtey sharroo: 24As ver eh er y ven dy iu yn ushtey sharroo, ta cur lesh y mollaght: as nee yn ushtey ta cur lesh y mollaght skeayley cheu-sthie j’ee, as hig eh dy ve sharroo. 25Eisht nee’n saggyrt goaill chebbal yn eaddagh ass laue y ven, as troggal eh seose dy ard kiongoyrt rish y Chiarn, as chebbal eh er yn altar. 26As nee’n saggyrt goaill lane doarn jeh’n chebbal, va dy vrah yn chooish, as lostey eh er yn altar, as lurg shen ver eh er y ven dy iu’n ushtey. 27As tra t’ad er chur urree giu yn ushtey, eisht hig eh gy-kione, my t’ee er ve kyndagh, as er n’yannoo aggair da e sheshey, dy jed yn ushtey ta cur lesh yn mollaght er cheu-sthie j’ee, as hig eh dy ve sharroo, as nee’n bolg eck gatt, as nee’n slheeasid eck loau: as bee’n ven ny mollaght mastey’n pobble eck. 28As mannagh vel y ven er ve kyndagh, agh glen, as ôney: eisht bee ee seyr, as nee ee sluight y ymmyrkey. 29Shoh’n leigh cour eadaghey, tra ta ben chyndaa ersooyl gys fer elley ayns ynnyd e sheshey, as er ny yannoo neu-ghlen; 30Ny tra ta’n spyrryd dy eadaghey dy ghoaill eh, as eh geadaghey mysh e ven, as dy choyrt lesh y ven roish y Chiarn, nee’n saggyrt cooilleeney urree ooilley’n leigh shoh. 31Eisht bee’n dooinney seyr veih’n aggair, agh nee’n ven shoh gymmyrkey yn vee-chairys eck.