CAB. VI

1As loayr y Chiarn rish Moses, gra, 2Loayr rish cloan Israel, as abbyr roo, Tra nee dooinney ny ben erbee kiangley ad hene, dy ghoaill orroo breearrey Nazarite, dy chasherickey ad hene gys y Chiarn: 3Nee eh freayll eh hene veih feeyn as jough lajer, cha jean eh giu vinegar-feeyney, ny vinegar dy yough lajer, chamoo nee eh giu soo erbee veih ny messyn-feeyney, ny gee messyn-feeyney lesh soo appee, ny chirrym. 4Ooilley ny laghyn t’eh fo’n chiangley shoh, cha jean eh gee veg ta cheet jeh’n villey-feeyney, veih’n mess hene eer gys y vleayst. 5Ooilley ny laghyn t’eh fo kiangley’n vreearrey shoh, cha jig razor er e chione: derrey vees ny laghyn harrish, ayndoo t’eh dy scarrey eh hene gys y Chiarn, bee eh casherick; as nee eh lhiggey da kiogyn folt e ching gaase. 6Ooilley ny laghyn t’eh dy chiangley eh hene gys y Chiarn; cha jig eh coair corp marroo erbee. 7Cha jean eh eh hene neu-ghlen son e ayr, ny son e voir, son e vraar, ny son e huyr, tra t’ad marroo: son dy vel cowrey-scarree e Yee er e chione. 8Ooilley ny laghyn t’eh fo’n chiangley shoh, t’eh casherick gys y Chiarn. 9As my nee dooinney erbee geddyn baase dy feer doaltattym liorish, as dy vel eh er neu-chasherickey cowrey-scarree e ching, eisht nee eh baarey e chione er laa e ghlenney, er y chiaghtoo laa nee eh baarey eh. 10As er yn hoghtoo laa ver eh lesh daa hurtle, ny daa chalmane aeg gys y taggyrt, gys dorrys chabbane-agglish y cheshaght. 11As nee’n saggyrt chebbal y derrey yeh son oural-peccah, as y jeh elley son oural-losht, as jannoo lhiasaghey er e hon, son dy ren eh peccah liorish y varroo, as nee eh e chione y chasherickey yn laa cheddin. 12As nee eh casherickey gys y Chiarn e laghyn-scarree, as ver eh lesh eayn jeh’n vleïn shen son oural-peccah: agh bee ny laghyn roish shen dy choayl da, son dy row e vreearrey er ny vrishey.

13As shoh leigh y Nazarite: tra ta laghyn e chasherickys er nyn gooilleeney, hig eh gys dorrys chabbane-agglish y cheshaght. 14As nee eh chebbal e oural gys y Chiarn, un eayn fyrryn jeh’n vleïn shen fegooish foill, son oural-losht, as un eayn bwoirryn jeh’n vleïn cheddin gyn foill, son oural-peccah, as un rea gyn foill, son ourallyn-shee. 15As baskad lesh arran-millish, berreenyn dy flooyr meein lesh ooil ny-chione, as keeakyn dy arran-millish slaiyt lesh ooil, marish nyn oural-arran, as nyn oural-jough. 16As ver y saggyrt lesh ad roish y Chiarn, as nee eh chebbal e oural-peccah, as e oural-losht. 17As nee eh chebbal y rea, son ourallyn-shee gys y Chiarn, lesh y vaskad dy arran-millish: nee’n saggyrt myrgeddin chebbal e oural-arran, as e oural-jough. 18As nee’n Nazarite baarey cowrey-scarree e ching, ec dorrys chabbane-agglish y cheshaght: as nee eh goaill folt-scarree e ching, dy choyrt eh ayns yn aile ta fo’n oural-shee. 19As nee’n saggyrt goaill shlingan vroie yn rea, as un verreen millish ass y vaskad, as un cheeak millish; as ver eh ad ayns laueyn y Nazarite, lurg da’n folt-scarree echey va baarit. 20As nee’n saggyrt troggal ad seose dy ard son oural gys y Chiarn; ta shoh casherick son y taggyrt, lesh y breast as y clingan er nyn graa, as troggit seose: as ny lurg shen, foddee’n Nazarite giu feeyn. 21Shoh leigh y Nazarite, t’er n’yannoo breearrey, as jeh’n oural echey gys y Chiarn son e chasherickys, cheu-mooie jeh shen nee e laue y chosney: cordail rish y breearrey t’eh er ghoaill, myr shen shegin da jannoo cordail rish leigh y Nazarite.

22As loayr y Chiarn rish Moses, gra, 23Loayr rish Aaron as rish e vec, gra, Er yn aght shoh nee shiu cloan Israel y vannaghey, gra roo, 24Dy jean y Chiarn dty vannaghey, as dty reayll: 25Dy der y Chiarn er e eddin dy hoilshean ort, as dy bee eh graysoil dhyt; 26Dy drog y Chiarn seose e eddin ort, as dy der eh dhyt shee. 27As ver ad m’ennym’s er cloan Israel, as neem’s ad y vannaghey.