CAB. VII

1As haink eh gy-kione er yn laa va Moses erreish dy slane er hoiaghey seose y chabbane-agglish, as er ooilaghey eh, as er chasherickey eh, as ooilley ny jeshaghtyn echey, chammah yn altar as ooilley ny siyn echey, as er n’ooilaghey as er chasherickey ad; 2Dy ren princeyn Israel, ard-gheiney thie nyn ayraghyn chebbal: (V’ad shoh princeyn ny tribeyn, as harroosyn va er nyn earroo): 3As hug ad lhieu nyn oural kiongoyrt rish y Chiarn, shey fainee coodit, as daa ghow jeig; fainagh eddyr jees jeh ny princeyn, as dow son dagh unnane: as hug ad lhieu ad roish y chabbane-agglish. 4As loayr y Chiarn rish Moses, gra, 5Gow ad shoh voue, dy vod ad ve gour shirveish chabbane-agglish y cheshaght; as ver oo ad da ny Leviteyn, da dagh dooinney cordail rish e hirveish. 6As ghow Moses ny fainee, as ny dew, as hug eh ad da ny Leviteyn. 7Daa fainagh as kiare dew hug eh da mec Ghershon, cordail rish nyn shirveish. 8As kiare fainee as hoght dew hug eh da mec Merari, cordail rish y chirveish oc, fo reill Ithamar mac Aaron y saggyrt. 9Agh da mec Kohath cha dug eh veg, er-yn-oyr dy row’n chirveish ocsyn mysh y chabbane-casherick, dy row ad dy choyrt lhieu eh er nyn gheayltyn.

10As ren ny princeyn chebbal son casherickey yn altar, er y laa ve er ny ooilaghey; ren ny princeyn chebbal nyn oural ec yn altar. 11As dooyrt y Chiarn rish Moses, Nee ad chebbal nyn oural, prince er dagh laa, son casherickey yn altar.

12As eshyn ren chebbal er y chied laa, va Nahshon mac Amminadab, jeh tribe Yudah. 13As va’n chebbal echey un chlaare mooar argid, yn trimmid echey va shey-feed as jeih shekelyn, un veiley argid va three-feed as jeih shekelyn, cordail rish shekel y chabbane-casherick, as ad ny-neesht lane dy flooyr meein lesh ooil ny-chione, son oural-arran: 14Un spain airh, jeh jeih shekelyn, lane dy incense: 15Un dow aeg, un rea, un eayn jeh’n vleïn shen, son oural-losht: 16Un vannan veih ny goair, son oural-peccah: 17As son ourallyn-shee, daa ghow, queig reaghyn, queig heurinyn, queig eayin jeh’n vleïn shen. Shoh va oural Nahshon mac Amminadab.

18Er y nah laa, ren Nethaneel mac Zuar, prince Issachar, chebbal. 19Va’n chebbal echey un chlaare mooar argid, yn trimmid echey va shey-feed as jeih shekelyn, un veiley argid va three-feed as jeih shekelyn, cordail rish shekel y chabbane casherick, as ad ny-neesht lane dy flooyr meein, lesh ooil ny-chione, son oural-arran: 20Un spain airh jeh jeih shekelyn, lane dy incense: 21Un dow aeg, un rea, un eayn jeh’n vleïn shen, son oural-losht: 22Un vannan veih ny goair, son oural-peccah. 23As son oural-shee, daa ghow, queig reaghyn, queig heurinyn, queig eayin jeh’n vleïn shen. Shoh va oural Nethaneel mac Zuar.

24Er y trass laa, ren Eliab mac Helon, prince cloan Zebulun, chebbal. 25Va’n chebbal echey un chlaare mooar argid, yn trimmid echey va shey-feed as jeih shekelyn, un veiley argid va three-feed as jeih shekelyn, cordail rish shekel y chabbane-casherick, as ad ny-neesht lane dy flooyr meein, lesh ooil ny chione son oural-arran: 26Un spain airh jeh jeih shekelyn, lane dy incense: 27Un dow aeg, un rea, un eayn jeh’n vleïn shen, son oural-losht: 28Un vannan veih ny goair, son oural-peccah: 29As son oural-shee, daa ghow, queig reaghyn, queig heurinyn, queig eayin jeh’n vleïn shen. Shoh va chebbal Eliab mac Helon.

30Er yn chiarroo laa, ren Elizur mac Shedeur, prince cloan Reuben, chebbal. 31Va’n chebbal echey un chlaare mooar argid, yn trimmid echey va shey-feed as jeih shekelyn, un veiley argid va three-feed as jeih shekelyn, cordail rish shekel y chabbane-casherick, as ad ny-neesht lane dy flooyr meein lesh ooil ny-chione, son oural-arran: 32Un spain airh jeh jeih shekelyn, lane dy incense: 33Un dow aeg, un rea, un eayn jeh’n vleïn shen, son oural-losht: 34Un vannan veih ny goair, son oural-peccah: 35As son oural-shee, daa ghow, queig reaghyn, queig heurinyn, queig eayin jeh’n vleïn shen. Shoh va chebbal Elizur mac Shedeur.

36Er y wheiggoo laa, ren Shelumiel mac Zurishaddai, prince cloan Simeon, chebbal. 37Va’n chebbal echey un chlaare mooar argid, yn trimmid echey va shey-feed as jeih shekelyn, un veiley argid va three-feed as jeih shekelyn, cordail rish shekel y chabbane-casherick; as ad ny-neesht lane dy flooyr meein lesh ooil ny-chione son oural-arran: 38Un spain airh jeh jeih shekelyn, lane dy incense. 39Un dow aeg, un rea, un eayn jeh’n vleïn shen, son oural-losht: 40Un vannan veih ny goair, son oural-peccah: 41As son oural-shee, daa ghow, queig reaghyn, queig heurinyn, queig eayin jeh’n vleïn shen. Shoh va oural Shelumiel mac Zurishaddai.

42Er yn cheyoo laa, ren Eliasaph mac Deuel, prince cloan Gad, chebbal. 43Va’n chebbal echey un chlaare mooar argid, yn trimmid echey va shey-feed as jeih shekelyn, un veiley argid, va three-feed as jeih shekelyn, cordail rish shekel y chabbane-casherick, as ad ny-neesht lane dy flooyr meein lesh ooil ny-chione, son oural-arran: 44Un spain airh, jeh jeih shekelyn lane dy incense: 45Un dow aeg un rea, un eayn jeh’n vleïn shen, son oural-losht: 46Un vannan veih ny goair, son oural-peccah: 47As son oural-shee, daa ghow, queig reaghyn, queig heurinyn, queig eayin jeh’n vleïn shen. Shoh va oural Eliasaph mac Deuel.

48Er y chiaghtoo laa, ren Elishama mac Ammihud, prince cloan Ephraim, chebbal. 49Va’n chebbal echey un chlaare mooar argid, yn trimmid echey va shey-feed as jeih shekelyn, un veiley argid va three-feed as jeih shekelyn, cordail rish shekel y chabbane-casherick, as ad ny-neesht lane dy flooyr meein lesh ooil ny-chione, son oural-arran: 50Un spain airh jeh jeih shekelyn, lane dy incense: 51Un dow aeg, un rea, un eayn jeh’n vleïn shen, son oural-losht: 52Un vannan veih ny goair, son oural-peccah: 53As son oural-shee, daa ghow, queig reaghyn, queig heurinyn, queig eayin jeh’n vleïn shen. Shoh va oural Elishama mac Ammihud.

54Er yn hoghtoo laa, ren Gamaliel mac Pedahzur, prince cloan Vanasseh, chebbal. 55Va’n chebbal echey un chlaare mooar argid, yn trimmid echey va shey-feed as jeih shekelyn, un veiley argid va three-feed as jeih shekelyn, cordail rish shekel y chabbane-casherick, as ad ny-neesht lane dy flooyr meein, as ooil ny-chione, son oural-arran: 56Un spain airh jeh jeih shekelyn, lane dy incense. 57Un dow aeg, un rea, un eayn jeh’n vleïn shen, son oural-losht: 58Un vannan veih ny goair, son oural-peccah: 59As son oural-shee, daa ghow, queig reaghyn, queig heurinyn, queig eayin jeh’n vleïn shen. Shoh va oural Gamaliel mac Pedahzur.

60Er y nuyoo laa, ren Abidan mac Gideoni, prince cloan Venjamin, chebbal. 61Va’n chebbal echey un chlaare mooar argid, yn trimmid echey va shey-feed as jeih shekelyn, un veiley argid va three-feed as jeih shekelyn, cordail rish shekel y chabbane-casherick, as ad ny-neesht lane dy flooyr meein as ooil ny-chione, son oural-arran: 62Un spain airh jeh jeih shekelyn, lane dy incense. 63Un dow aeg, un rea, un eayn jeh’n vleïn shen, son oural-losht: 64Un vannan veih ny goair, son oural-peccah: 65As son ourallyn-shee, daa ghow, queig reaghyn, queig heurinyn, queig eayin jeh’n vleïn shen. Shoh va oural Abidan mac Gideoni.

66Er yn jeihoo laa, ren Ahiezer mac Amishaddai, prince cloan Dan, chebbal. 67Va’n chebbal echey un chlaare mooar argid, yn trimmid echey va shey-feed as jeih shekelyn, un veiley argid va three-feed as jeih shekelyn, cordail rish shekel y chabbane-casherick, as ad ny-neesht lane dy flooyr meein lesh ooil ny-chione, son oural-arran: 68Un spain airh jeh jeih shekelyn, lane dy incense: 69Un dow aeg, un rea, un eayn jeh’n vleïn shen, son oural-losht: 70Un vannan veih ny goair, son oural-peccah: 71As son oural-shee, daa ghow, queig reaghyn, queig heurinyn, queig eayin jeh’n vleïn shen. Shoh va oural Ahiezer mac Amishaddai.

72Er yn un laa jeig, ren Pagiel mac Ocran, prince cloan Asher, chebbal. 73Va’n chebbal echey un chlaare mooar argid, yn trimmid echey va shey-feed as jeih shekelyn, un veiley argid va three-feed as jeih shekelyn cordail rish shekel y chabbane-casherick, as ad ny-neesht lane dy flooyr meein lesh ooil ny-chione, son oural-arran: 74Un spain airh jeh jeih shekelyn, lane dy incense: 75Un dow aeg, un rea, un eayn jeh’n vleïn shen, son oural-losht: 76Un vannan veih ny goair, son oural-peccah: 77As son oural-shee, daa ghow, queig reaghyn, queig heurinyn, queig eayin jeh’n vleïn shen. Shoh va oural Pagiel mac Ocran.

78Er y nah laa yeig, ren Ahira mac Enan, prince cloan Naphtali, chebbal. 79Va’n chebbal echey un chlaare mooar argid, yn trimmid echey va shey-feed as jeih shekelyn, un veiley argid va three-feed as jeih shekelyn, cordail rish shekel y chabbane-casherick, as ad ny-neesht lane dy flooyr meein lesh ooil ny-chione, son oural-arran: 80Un spain airh jeh jeih shekelyn, lane dy incense: 81Un dow aeg, un rea, un eayn jeh’n vleïn shen, son oural-losht: 82Un vannan veih ny goair, son oural-peccah: 83As son oural-shee, daa ghow, queig reaghyn, queig heurinyn, queig eayin jeh’n vleïn shen. Shoh va oural Ahira mac Enan. 84Shoh va ec casherickey yn altar (er y laa ve er ny ooilaghey) liorish princeyn Israel: daa chlaare mooar jeig argid, daa veiley jeig argid, daa spain jeig airh. 85Dagh claare argid towse shey-feed shekel as jeih, dagh meiley three-feed as jeih: ren ooilley ny siyn argid towse daa housane as kiare cheead shekel, lurg shekel y chabbane-casherick. 86Va ny spainyn airh ghaa-yeig, lane incense, towse jeih shekelyn y pheesh, lurg shekel y chabbane-casherick; va ooilley airh ny spainyn shey-feed shekel. 87Va ooilley ny dew son yn oural-losht daa ghow jeig, ny reaghyn ghaa-yeig, ny eayin jeh’n vleïn shen ghaa-yeig, marish nyn oural-arran: as ny mannanyn veih ny goair, son oural-peccah, ghaa-yeig. 88As va ooilley ny dew son ny ourallyn-shee, kiare dew as feed, ny reaghyn three-feed, ny heurinyn three-feed, ny eayin jeh’n vleïn shen three-feed. Myr shoh va’n altar er ny chasherickey, lurg da ve ooilit 89As tra va Moses er n’gholl stiagh ayns cabbane-agglish y cheshaght, dy loayrt rish (Jee;) eisht ren eh clashtyn coraa fer loayrt rish veih stoyl y vyghin va er arg y chonaant, veih eddyr y daa cherubim: as loayr eh rish.