CAB. VIII

1AS loayr y Chiarn rish Moses, gra, 2Loayr rish Aaron, as abbyr rish. Tra t’ou foaddey ny lampyn, ver ny shiaght lampyn soilshey erskyn y chainlere: 3As ren Aaron myr shen; ren eh foaddey ny lampyn echey erskyn y chainlere, myr hug y Chiarn sarey da Moses. 4As va’n cainlere shoh jeant dy airh obbrit; veih’n chass gys ny banglaneyn echey ayns blaa, v’ad obbrit magh; cordail rish y cummey va’n Chiarn er hoilshaghey da Moses, myr shen ren eh yn cainlere.

5As loayr y Chiarn rish Moses, gra, 6Cur lhiat ny Leviteyn veih mastey cloan Israel, as glen ad. 7As myr shoh nee oo jannoo roo, dy ghlenney ad; spreih yn ushtey casherick orroo, as lhig razor goll harrish ooilley’n corp oc, as lhig daue niee ooilley nyn eaddagh, as myr shen ad hene y ghlenney. 8Eisht lhig daue goaill dow aeg marish e oural-arran, ta shen, flooyr lesh ooil ny-chione; as dow aeg elley nee uss goaill son oural-peccah. 9As ver oo lhiat ny Leviteyn kiongoyrt rish y chabbane-agglish; as nee oo chaglym cooidjagh slane sheshaght cloan Israel: 10As ver oo lhiat ny Leviteyn roish y Chiarn, as ver cloan Israel nyn laueyn er ny Leviteyn: 11As nee Aaron chebbal ny Leviteyn kiongoyrt y Chiarn son oural cloan Israel, dy vod ad cooilleeney shirveish y Chiarn. 12As ver ny Leviteyn nyn laueyn er king ny dew: as nee oo chebbal y derrey yeh son oural-peccah, as y jeh elley son oural-losht gys y Chiarn, dy yannoo lhiasaghey son ny Leviteyn. 13As nee oo soiaghey ny Leviteyn kiongoyrt rish Aaron, as kiongoyrt rish e vec, as chebbal ad son oural gys y Chiarn. 14Myr shoh nee oo scarrey ny Leviteyn veih mastey cloan Israel; as bee ny Leviteyn lhiam’s. 15As lurg shen hed ny Leviteyn stiagh, dy yannoo shirveish y chabbane-agglish; as nee oo ad y ghlenney, as chebbal ad son oural. 16Son ta mee er ghoaill ad dy slane dou hene veih mastey cloan Israel; ’syn ynnyd ocsyn ta fosley’n vreïn, ayns ynnyd y chied-ruggit jeh ooilley cloan Israel, ta mee er ghoaill ad hym pene. 17Son ta ooilley’n chied-ruggit jeh cloan Israel lhiam’s chammah dooinney as baagh: er y laa ren mee stroie ooilley ny va hoshiaght-ruggit ayns cheer Egypt, ren mee ad y chasherickey dou hene. 18As ta mee er ghoaill ny Leviteyn ’syn ynnyd ocsyn ta hoshiaght-ruggit jeh cloan Israel. 19As ta mee er choyrt ny Leviteyn, myr gioot da Aaron, as da e vec, veih mastey cloan Israel, dy yannoo shirveish cloan Israel ayns y chabbane-agglish, as dy yannoo lhiasaghey son cloan Israel; nagh bee kerraghey trome erbee mastey cloan Israel, tra hig cloan Israel er-gerrey da’n ynnyd casherick. 20As ren Moses as Aaron, as ooilley sheshaght cloan Israel rish ny Leviteyn, cordail rish ooilley ny ren y Chiarn sarey Moses mychione ny Leviteyn, myr shen ren cloan Israel roo. 21As va ny Leviteyn er nyn glenney, as niee ad nyn eaddagh: as ren Aaron ad y hebbal myr oural kiongoyrt rish y Chiarn; as ren Aaron lhiasaghey er nyn son, dy ghlenney ad. 22As lurg shen hie ny Leviteyn stiagh dy chooilleeney nyn shirveish ’sy chabbane-agglish, fenish Aaron as e vec: myr doardee’n Chiarn da Moses mychione ny Leviteyn, myr shen ren ad roo.

23As loayr y Chiarn rish Moses, gra, 24Shoh currym ny Leviteyn, veih queig bleeaney as feed dy eash as erskyn, hed ad stiagh dy hendeil er shirveish chabbane-agglish y cheshaght: 25As veih jeih bleeaney as da-eed dy eash nee ad scuirr veih tendeil er y chirveish echey, as gyn shirveish arragh: 26Agh nee ad cooney lesh nyn mraaraghyn ayns cabbane-agglish y cheshaght, dy choyrt tastey da nyn gurrym, as cha jean ad obbyr erbee elley. Myr shoh nee oo rish ny Leviteyn mychione nyn gurrym.