CAB. IX

1As loayr y Chiarn rish Moses ayns faasagh Sinai, ayns yn chied vee jeh’n nah vleïn, lurg daue ve er jeet ass Egypt, gra, 2Lhig da cloan Israel myrgeddin freaylley’n chaisht ec yn imbagh cooie. 3Er y chiarroo laa yeig jeh’n vee shoh ec yn astyr, nee shiu freayll eh ’sy tra pointit: cordail rish ooilley ny oardaghyn, as cordail rish ooilley ny cliaghtaghyn echey nee shiu freayll eh. 4As loayr Moses rish cloan Israel, dy vreillagh ad y chaisht. 5As dreill ad y chaisht er y chiarroo laa yeig jeh’n chied vee ec yn astyr, ayns faasagh Sinai: cordail rish ooilley ny ren y Chiarn sarey Moses, myr shen ren cloan Israel.

6As va deiney dy row va jeant neu-ghlen liorish bentyn rish corp dooinney marroo, nagh voddagh, ad yn chaisht y reayll er yn laa shen, as haink ad fenish Voses, as Aaron er y laa cheddin. 7As dooyrt ny deiney shen rish, Ta shin neu-ghlen liorish dooinney marroo: cre’n-oyr dy vel shin er nyn lhiettal, veih chebbal oural y Chiarn ayns y traa pointit mastey cloan Israel? 8As dooyrt Moses roo, Fuirree-jee tammylt, as nee’m clashtyn cre nee’n Chiarn sarey mychione eu. 9As loayr y Chiarn rish Moses, gra, 10Loayr rish cloan Israel, gra, My vees dooinney erbee jiuish, ny jeh nyn sluight neu-ghlen, liorish cheet faare corp marroo, ny er jurnah foddey jeh, ny-yeih nee eh yn chaisht y reayll gys y Chiarn. 11Er yn chiarroo laa yeig jeh’n nah vee, ec yn astyr, nee ad y reayll eh, as gee eh lesh arran soorit as lossreeyn sharroo. 12Cha jean ad faagail veg jeh gys y voghrey, ny brishey craue jeh: cordail rish ooilley oardaghyn y chaisht nee ad freayll eh. 13Agh y dooinney ta glen, as nagh vel er e yurnah, as ta lhiggey shaghey dy reayll yn chaisht; bee’n eer annym shen er ny yiarey magh veih e phobble, son nagh dug eh lesh oural y Chiarn ayns y traa pointit er y hon: nee’n dooinney shen gymmyrkey e pheccah. 14As my vees joarree er e yurnah ny-vud eu, as aignagh dy reayll y chaisht gys y Chiarn, cordail rish oardagh yn chaisht, as cordail rish y cliaghtey, myr shen nee eh ’yannoo: bee’n un oardagh eu, chammah son y joarree, as son eshyn ta ruggit ’sy cheer.

15As er y laa va’n cabbane-agglish er ny hroggal seose, ren y bodjal coodaghey yn chabbane-agglish, ta shen, cabbane yn eanish; as ’syn astyr ve er y chabbane-agglish, myr veagh eh caslys aile, gys y voghrey. 16Myr shen ve kinjagh: ren y bodjal coodaghey eh ’sy laa, as y caslys aile ’syn oie. 17As tra ren y bodjal troggal jeh’n chabbane; eisht lurg shen, ren cloan Israel goaill nyn yurnah: as raad ren y bodjal shassoo, ayns shen ren cloan Israel soiaghey nyn gabbaneyn. 18Ec sarey’n Chiarn hie cloan Israel er nyn doshiaght, as ec sarey’n Chiarn ren ad campal: choud as va’n bodjal er y chabbane-agglish, ren ad tannaghtyn ayns ny cabbaneyn. 19As tra va’n bodjal er y chabbane-agglish son ymmodee laghyn, eisht ren cloan Israel freayll currym y Chiarn, as cha ghow ad jurnah. 20As myrgeddin ve, tra va’n bodjal son beggan dy laghyn er y chabbane: cordail rish sarey’n Chiarn duirree ad ayns nyn gabbaneyn, as cordail rish sarey’n Chiarn, ghow ad nyn yurnah. 21As myrgeddin ve, tra ren y bodjal tannaghtyn veih’n astyr gys y voghrey, as dy row’n bodjal er ny hroggal ’sy voghrey, eisht ghow ad nyn yurnah: edyr eh ve ’sy laa ny ’syn oie dy row’n bodjal er ny ghoaill seose, hie ad er nyn yurnah. 22Ny edyr eh ve daa laa, ny mee, ny bleïn, dy duirree’n bodjal er y chabbane, tannaghtyn er, duirree cloan Israel ayns nyn gabbaneyn, as cha ghow ad jurnah: agh tra ve er droggal, hie ad er nyn doshiaght. 23Ec sarey’n Chiarn ghow ad fea ayns nyn gabbaneyn, as ec sarey’n Chiarn ghow ad nyn yurnah: dreill ad currym y Chiarn, ec sarey’n Chiarn, liorish laue Voses.