CAB. I

1Paul as Timotheus sharvaantyn Yeesey Creest, gys ooilley ny nooghyn ayns Creest Yeesey, ta ec Philippi, marish ny aspickyn as shirveishee: 2Grayse dy row hiu, as shee veih Jee nyn Ayr, as veih’n Chiarn Yeesey Creest. 3Ta mee cur booise da my Yee dy chooilley cheayrt ta mee dy imraa shiu, 4(Dy kinjagh ayns ooilley my phadjeryn er nyn son eu ooilley, jannoo aghin lesh boggey) 5Son y co-ayrn eu ayns y sushtal veih’n chied laa gys nish; 6Myr ta shickyrys aym jeh’n eer red shoh, dy der eshyn ta er chur obbyr vie er y hoshiaght ny-vud eu, mullagh er derrey laa Yeesey Creest: 7Dy jarroo myr te jesh dooys yn smooinaghtyn shoh y ve aym mychione eu ooilley, er-y-fa dy vel shiu aym ec my chree, ayns wheesh as chammah ayns my gheulaghyn, as ayns fendeil as niartaghey yn sushtal, ta shiu ooilley paarteeassyn mârym jeh grayse. 8Son Jee my eanish, cre cha jeean as ta mee goaill foddeeaght nyn yeï eu ooilley ayns meiyghys Yeesey Creest. 9As shoh ta mee guee, dy vod y ghraih eu bishaghey foast ny smoo as ny smoo ayns fysseree, as ayns dy chooilley vriwnys: 10Dy vod shiu lowal jeh ny reddyn smoo ooasle, dy vod shiu ve ynrick, as shickyr gys laa Chreest; 11Lhieent lesh ny messyn dy chairys, ta liorish Yeesey Creest, gys gloyr as moylley Yee. 12Agh baillym shiu dy hoiggal, vraaraghyn, dy vel ny reddyn t’er jeet my raad, er jyndaa magh dy chur y sushtal ny smoo er y hoshiaght: 13Myr shen dy vel my gheulaghyn er coontey Chreest imraït ayns ooilley plaase y ree, as ayns dy chooilley ynnyd elley; 14As ta ymmodee jeh ny braaraghyn ayns y Chiarn, er n’aase dunnal liorish my gheulaghyn’s, foddey s’creeoil dy loayrt yn goo fegooish aggle. 15Ta paart dy jarroo preacheil Creest trooid eer troo as anvea; as paart myrgeddin trooid aigney-mie. 16Ta’n derrey yeh preacheil Creest trooid streeu, cha nee dy ynrick, er-chee dy chur trimmid gys my gheulaghyn: 17Agh y jeh elley trooid graih, myr ta fys oc dy vel mee er my phointeil son fendeilys y tushtal. 18Cre eisht? ny-yeih, er dy chooilley aght, edyr eh ve ayns foalsaght, ny ayns firrinys, ta Creest er ny phreacheil; as er y choontey shen ta mee goaill boggey, as dy jarroo nee’m boggey y ghoaill. 19Son ta fys aym dy jean shoh chyndaa gys my livrey-ys trooid y phadjer euish, as cooney Spyrryd Yeesey Creest, 20Cordail rish my yerkal jeean, as my hreishteil, nagh bee nearey orrym ayns nhee erbee, agh lesh dy chooilley ghunnallys, myr dy kinjagh, myr shen nish myrgeddin dy bee Creest er ny ghloyraghey ayns my chorp, edyr eh ve liorish bioys ny baase. 21Son dooys dy ve bio te [son] Creest, as dy gheddyn baase te cosney. 22Agh dy ve bio ’syn eill, shoh mess my laboraght: agh foast cre dy reih, cha s’aym. 23Son ta mee ayns chennid eddyr jees, aggindagh dy gholl roym, as dy ve marish Creest; ta foddey share: 24Ny-yeih, dy hannaghtyn ayns y challin, te ny s’vondeishee diuish. 25As ayns treishteil shickyr jeh shoh, ta fys aym dy bee’m bio as dy jean-ym tannaghtyn mêriuish ooilley, dy choyrt er y hoshiaght nyn moggey as nyn gredjue: 26Dy vod yn boggey euish ve foddey smoo ayns Creest Yeesey er my hon’s, tra hig-ym’s hiuish reesht. 27Erskyn ooilley, lhig da’n ymmyrkey-bea eu ve cordail rish sushtal Chreest: myr shen edyr mee dy heet dy yeeaghyn shiu, ny gyn cheet, dy voddym clashtyn jeh nyn stayd, dy vel shiu shassoo shickyr ayns un Spyrryd, lesh un aigney streeu cooidjagh son credjue yn tushtal; 28As gyn ve agglit ayns nhee erbee liorish nyn noidyn: yn chooid cheddin ta dauesyn cowrey cronnal dy hoyrt-mow, agh diuish dy haualtys, as shen veih Jee. 29Son diuish te er ny choyrt ass lieh Chreest, cha nee ny-lomarcan dy chredjal ayn, agh myrgeddin dy hurranse er y ghraih echey; 30Fakin dy vel shiu hene caggey fo’n seaghyn cheddin honnick shiu mish ayn, as nish clashtyn dy vel mee ayn.