CAB. II

1My ta er-y-fa shen gerjagh erbee ayns Creest, my ta eunys erbee dy ghraih, my ta sheshaght erbee gerjoil jeh’n Spyrryd, my ta meiyghys erbee as myghin; 2Jean-jee my voggey y yannoo magh, dy vod shiu ve jeh’n aigney cheddin, yn ghraih cheddin y ve eu, jeh un chree, jeh un smooinaghtyn. 3Ny lhig da nhee erbee ve jeant trooid anvea, ny mooaralys, agh ayns injillid-aigney lhig da dagh unnane soiagh ’yannoo jeh feallagh elley roish hene. 4Ny lhig da sooill ve ec dooinney erbee gys y foays echey hene [ny-lomarcan], agh dy chooilley ghooinney myrgeddin gys foays feallagh elley. 5Lhig da’n aigney shoh ve ayndiuish, va myrgeddin ayns Creest Yeesey: 6Quoi, myr v’eh ayns cummey Yee, nagh smooinee eh eh roosteyrys erbee dy ve corrym rish Jee: 7Ny-yeih hug eh eh-hene gyn veg, as ghow eh er cummey sharvaant, as v’eh er ny yannoo ayns caslys deiney: 8As er ny gheddyn ayns cummey myr dooinney, ren eh eh-hene y injillaghey, as haink eh dy ve biallagh gys baase, dy jarroo baase ny croshey. 9Shen-y-fa ta Jee myrgeddin er hoiaghey eh seose dy ard, as er choyrt da ennym ta erskyn dy chooilley ennym: 10Ec ennym Yeesey dy jinnagh dy chooilley ghlioon lhoobey, dy reddyn ayns niau, as reddyn er y thalloo, as dy reddyn fo’n thalloo; 11As dy lhisagh dy chooilley hengey goaill-rish dy nee Yeesey Creest yn Chiarn, gys gloyr Yee yn Ayr. 12Shen-y-fa, my chaarjyn, myr ta shiu dy kinjagh er ve biallagh, cha nee myr ayns my enish ny-lomarcan, agh nish foddey smoo myr ta mee veue; obbyr-jee magh nyn saualtys hene lesh aggle as atchim. 13Son she Jee ta gobbraghey ayndiu, chammah dy smooinaghtyn er, as dy yannoo jeh e aigney-mie hene. 14Jean-jee dy chooilley nhee fegooish jymmoose as argane: 15Dy vod shiu ve gyn loght as ôney, cloan dy Yee, fegooish oghsan ayns mean sheeloghe camlaagagh as roonagh, ny-vud oc ta shiu lossey myr soilshaghyn ’sy theihll: 16Sheeyney magh yn goo dy vea; dy voddym’s boggey y ghoaill ayns laa Chreest, nagh vel mee er roie ayns fardail, chamoo er laboragh ayns fardail. 17As, dy jarroo, my vees m’uill’s er ny gheayrtey magh er oural as shirveish y chredjue euish, ta mee dy my gherjaghey, as goaill boggey mêriu ooilley. 18Er y choontey cheddin bee-jee shiuish neesht er nyn gherjaghey, as gow-jee boggey mârym’s. 19Agh ta mee treishteil ayns y Chiarn Yeesey, dy chur Timotheus ayns traa giare hiuish, dy voddym’s myrgeddin ve dy yien mie, erreish dou v’er gheddyn toiggal jeh’n stayd eu. 20Son cha vel dooinney erbee aym wheesh gys m’aigney, vees cha dooghyssagh imneagh er nyn son eu. 21Son ta ooilley er nyn son hene, cha nee son ny reddyn ta bentyn rish Yeesey Creest. 22Agh ta prowal er ny ve eu jehsyn, myr mac marish e ayr, dy vel eh er hirveish mârym’s ayns y sushtal. 23Eshyn er-y-fa shen ta mee treishteil dy chur hiuish dy gerrit, cha leah as nee’m fakin cre s’erree dou. 24Agh ta mee treishteil ayns y Chiarn, dy jig-yms mee hene myrgeddin ayns traa giare. 25Ny-yeih ghow mee eh dy ve ymmyrchagh dy chur hiuish Epaphroditus, my vraar as co-labree, as my heshey-sidoor, agh y chaghter euish, as eh ren shirveish gys my ymmyrch. 26Son ghow eshyn foddiaght ny yeï eu ooilley, as v’eh lane dy hrimshey, er-yn-oyr dy row clashtyn eu dy row eh er ny ve ching. 27Son v’eh lhag dy jarroo as raad y vaaish: agh ren Jee myghin er; as cha nee ersyn ny-lomarcan, agh orrym’s myrgeddin, nagh beagh aym’s trimshey er trimshey. 28Va mee ny s’aggindee er-y-fa shen dy chur eh; tra hee shiu eh reesht dy vod shiu boggey ’ghoaill, as bee my hrimshey’s ny sloo. 29Gow-jee rish er-y-fa shen ayns y Chiarn lesh slane gennallys, as jeh nyn lheid jean-jee mooar y hoiaghey: 30Er-yn-oyr son obbyr Chreest v’eh ayns dangeyr baaish, gyn soiaghey jeh e vioys hene dy yannoo magh hym’s shen ny va shiuish ergooyl ayns nyn ghiastyllys.