CAB. III

1Ny-sodjey, my vraaraghyn, gow-jee boggey ayns y Chiarn. Dy scrieu ny reddyn cheddin hiuish, cha vel eh deinagh dooys, agh diuish te vondeishagh. 2Cur-jee twoaie jeh moddee, cur-jee twoaie jeh drogh-yantee, cur-jee twoaie jeh’n cowrey-foalley. 3Son ta shinyn yn giarey-chymmylt, ta cur ooashley da Jee ayns y spyrryd, as boggyssagh ayns Creest Yeesey, as cha vel shin coyrt barrant erbee gys yn eill: 4Ga dy voddin’s myrgeddin barrant y choyrt gys yn eill. My ta dooinney erbee elley smooinaghtyn dy vel oyr echey dy hreishteil ayns yn eill, ta ny smoo aym’s: 5Er my ghiarey-chymmylt yn hoghtoo laa, jeh kynney Israel, jeh sheeloghe Venjamin, Hebrew [dooie] jeh ny Hebrewnee; mychione my chredjue ’sy leigh, my Pharisee: 6Mychione jeeanid son y leigh, jannoo tranlaase er yn agglish; mychione y chairys ta liorish y leigh, gyn foill. 7Agh ny reddyn shen va cosney dooys, ad shen choont mee coayl er graih Chreest. 8As dy firrinagh, cha vel mee coontey dy chooilley nhee agh coayl, son y tushtey smoo ooasle jeh Creest Yeesey my Hiarn: er y hon ta mee er hurranse coayl dy chooilley nhee, as cha vel mee soiaghey jeu agh myr eoylley, dy voddym Creest y chosney, 9As ve er my gheddyn aynsyn, cha nee shassoo er my chairys hene, ta liorish y leigh, agh er shen ta liorish credjue ayns Creest, yn chairys shen ta veih Jee liorish credjue: 10Dy vod enney ’ve aym ersyn, as toiggal pooar yn irree-seose-reesht echey, as yn ayrn t’aym’s ayns e hurranse, dy ve er my yannoo casley rishyn ayns e vaase; 11Dy voddin liorish saase erbee cosney gys irree-reesht ny merriu: 12Cha nee myr dy beign hannah er chosney, ny foast er gheddyn yn slane leagh: agh ta mee chionney huggey, my she shen dy voddym tayrtyn shen, er y hon va mee er my hayrtyn liorish Creest Yeesey. 13My vraaraghyn, cha vel mee jeeaghyn orrym pene myr dy beign er roshtyn huggey: agh un red ta foym dy yannoo, jarrood ny reddyn shen ta my yeï, as sheeyney er my hoshiaght gys ny reddyn ta roym, 14Ta mee chionney gys y vark, son leagh yn eam hug Jee dou veih’n yrjid ayns Creest Yeesey. 15Lhig dooinyn er-y-fa shen, whilleen as ta dy slane ynsit, ve jeh’n aigney shoh: as my vees shiu ayns nhee erbee jeh aigney elley, nee Jee shoh myrgeddin y hoilshaghey diu. 16Ny-yeih, choud as ta shin er roshtyn huggey, lhig dooin gimmeeaght liorish y rule cheddin, lhig dooin tastey choyrt da’n red cheddin. 17Vraaraghyn, eiyr-jee ry-cheilley orrym’s, as cur-jee tastey dauesyn ta gimmeeaght myr shen, myr ta shinyn eu son sampleyr. 18(Son ta ymmodee gimmeeaght, my-nyn-gione ta mee er n’insh diu dy mennick, as nish lesh jeïr ginsh diu, dy nee ad noidyn crosh Chreest: 19Ta’n jerrey oc toyrt-mow, yn Jee oc ta nyn molg, as ta’n gloyr oc ayns nyn nearey, ta nyn aigney er nheeghyn seihltagh.) 20Son ta cairys cummaltee ain ayns niau, veih ta shin myrgeddin jeeaghyn son yn Saualtagh, yn Chiarn Yeesey Creest: 21Nee caghlaa yn corp marvaanagh ain dy vod eh ve er ny chummey casley rish e chorp gloyroil hene, cordail rish y phooar niartal liorish t’eh abyl dy jarroo dy injillaghey dy chooilley nhee huggey hene.