CAB. I

1Paul pryssoonagh Yeesey Creest, as Timothy nyn mraar, gys Philemon nyn mraar graihagh, as sheshey-shirveishagh [ayns y sushtal,] 2As gys nyn gaarjyn ennoil Apphia, as Archippus nyn sheshey-sidoor, as gys y cheshaght-chreestee ta ayns dty hie: 3Grayse dy row hiu, as shee voish Jee nyn Ayr, as y Chiarn Yeesey Creest. 4Ta mee coyrt booise da my Yee, dy kinjagh gimraa ort ayns my phadjeryn. 5Lurg clashtyn ve aym jeh dty chredjue ayns y Chiarn Yeesey, as jeh dty ghraih da ooilley ny nooghyn; 6Dy vod yn ayrn t’ayd’s mârin ’sy chredjue cadjin ve breeoil, gys goaill-rish dy chooilley nhee mie, ta nyn mast’ eu ayns Creest Yeesey. 7Son ta boggey as gerjagh mooar ain ayns dty ghraih, er-yn-oyr dy vel yeearreeyn ny nooghyn femoil er nyn ooraghey liort’s, vraar. 8Ga dy voddin er-y-fa shen goaill y daanys shen orrym ayns Creest, dy dty harey gys shen ta cooie dy ve jeant; 9Ny-yeih er graih ainjys [Creestee] ta mee goaill myr reih dy yannoo aghin hood’s, mish Paul ta my henn ghooinney, as nish myrgeddin pryssoonagh Yeesey Creest. 10Ta mee jannoo aghin hood ayns lieh my vac Onesimus, ta mee er gheddyn ayns y chredjue tra va mee ayns my gheulaghyn: 11Va ayns traa dy row neu-vondeishagh dhyt’s, agh nish vondeishagh dhyt’s as dooys: 12Eshyn ta mee er choyrt hood’s reesht: gow uss rishyn er-y-fa shen myr rish my chree hene. 13Eshyn veign er reayll mârym, ayns yn ynnyd ayd’s dy voddagh eh ve shirveishagh dou ayns geulaghyn y tushtal. 14Agh noi dt’aigney cha jinnin nhee erbee; nagh beagh dty aigney-mie myr êginit, agh dy arryltagh. 15Son foddee dy daag eh oo son traa giare, dy voddagh oo eh y reayll mayrt choud as s’bio eh; 16Cha nee nish myr sharvaant, agh erskyn sharvaant, braar ennoil, dooys er-lheh, agh foddey smoo dhyt’s, chammah ayns yn eill as ayns y Chiarn? 17My t’ou er-y-fa shen jeeaghyn orrym myr sheshey-creestee, gow rishyn myr rhym pene. 18My t’eh er n’yannoo aggair dhyt, ny my t’eh lhiastyn veg dhyt, cur shen gys y choontey aym’s. 19Ta mish Paul er scrieu eh fo my laue hene, cooilleen-yms eh: gyn dy insh dhyt dy vel uss cheu-mooie jeh shoh lhiastyn dooys eer oo hene. 20Dy jarroo, guee-ym ort, vraar, lhig da boggey ve aym jeed ayns y Chiarn: jean mian my chree y ooraghey ayns y Chiarn. 21Ayns slane treishteil jeh dty viallys, ta mee er scrieu hood, as s’mie ta fys aym dy jean uss eer ny smoo na ta mee shirrey. 22Agh marish shoh kiare aaght er my hon: son ta mee treishteil liorish ny padjeryn eu, trooid foayr Yee, dy jig-ym hiu reesht. 23Ta dy dty vannaghey Epaphras, my cho-phryssoonagh ayns Creest Yeesey; 24Marcus, Aristarchus, Demas, Lucas, my cho-labreeyn. 25Dy row grayse nyn Jiarn Yeesey Creest marish nyn spyrryd. Amen.