CAB. I

1Raaghyn creeney Solomon mac Ghavid ree Israel.

2Dy hoiggal creenaght as ynsagh, dy chur-my-ner ny goan dy hushtey. 3Dy ghoaill yn ynsagh, dy chreenaght, dy chairys, dy vriwnys, as dy chiartys. 4Dy choyrt keeayll da’n ôney, da’n dooinney aeg, toiggal as feeudys. 5Nee dooinney creeney geaishtagh, as cheet er e hoshiaght ayns ynsagh, as nee dooinney tastagh roshtyn gys coyrleyn creeney. 6Dy hoiggal raa-dorraghey, as y bun echey; goan y vooinjer chreeney, as nyn vocklyn dowin.

7Ta aggle y Chiarn toshiaght tushtey: agh ta ommydanyn soiaghey beg jeh creenaght, as ynsagh. 8My vac, eaisht rish ynsagh dty ayrey, as ny treig uss leigh dty vayrey. 9Son bee ad aalid dy ghrayse da dty chione, as myr boandey airhey mysh dty wannal.

10My vac, my ta drogh-yantee dy dty violaghey, ny cur dty aigney lhieu. 11My jir ad, Tar mârin, lhig dooin lhie cooyl-chlea son fuill, lhig dooin farkiaght gyn-yss, as dy follit son y vooinjer neu-chyndagh, gyn oyr. 12Lhig dooin ad y lhuggey seose bio myr yn oaie, as slane myr adsyn ta goll sheese gys ny merriu. 13Yiow mayd dy chooilley cheint dy chooid chostal, lhieenee mayd nyn dhieyn lesh spooilley. 14Ceau stiagh dty chronney ny mast’ ain, lhig yn un sporran ’ve ain ooilley. 15My vac, ny shooyl uss er y raad mâroo: freill dty chass veih’n chassan oc. 16Son ta ny cassyn oc roie gys olk, as jannoo siyr gys deayrtey folley. 17Shickyr ayns fardail ta’n lieen er ny skeayley ayns shilley eean erbee. 18As t’ad soiaghey ribbaghyn son yn uill oc hene, t’ad lhie cooyl-chlea dy follit noi nyn mioys hene. 19Lheid shoh ta raaidyn dagh unnane ta sondagh er cosney, ta goaill ersooyl bioys y vooinjer s’liesh eh. 20Ta creenaght geamagh cheu-mooie, t’ee troggal seose e coraa ayns ny straidyn. 21T’ee gyllagh ayns yn ynnyd smoo taaghit; ayns fosley ny giattyn: ayns yn ard-valley t’ee fockley magh ny goan eck, gra, 22Caïd, shiuish vee-hushtee ver shiu rish mee-hushtey? as craidoilee goaill taitnys ayns nyn graid, as ny ommydanyn cur feoh da tushtey? 23Chyndaa-jee ec my oghsan: cur-my-ner, deayrt-yms magh my spyrryd erriu, nee’m soilshaghey my ghoan diu.

24Er-y-fa dy ren mish geamagh, as ren shiuish gobbal; ta mee er heeyney magh my laue, as cha dug dooinney erbee geill da. 25Agh ta shiu er hoiaghey beg jeh ooilley my choyrle, as cha goghe shiu rish veg jeh my oghsan. 26Neem’s myrgeddin garaghtee ec ny seaghyn eu, nee’m craid tra hig yn aggle erriu. 27Tra ta’n aggle cheet erriu myr traartys, as nyn doyrt-mow myr geay-chassee: tra hig chennid as angaish erriu. 28Eisht nee ad geamagh orrym’s, agh mish cha der ansoor; nee ad m’y hirrey dy moghey, agh cha vow ad mee. 29Son dy dug ad dwoaie da tushtey, as cha ren ad reih aggle y Chiarn. 30Cha shirragh ad veg jeh my choyrle: ren ad beg y hoiaghey jeh my oghsan. 31Shen-y-fa nee ad gee jeh mess y raad oc hene, as bee nyn yeeilley oc jeh nyn groutyn hene 32Son nee shaghrynys y vooinjer vee-cheeayllagh ad-hene y chur naardey, as nee’n maynrys seihltagh ommydanyn ad-hene y stroie. 33Agh quoi-erbee eaishtys rhym’s, nee eh cummal dy sauchey, as bee eh ec fea veih aggle yn olk.