CAB. X

1Raaghyn creeney Solomon. Ta mac creeney gerjagh e ayrey; agh ta mac ommijagh trimshey da e voir. 2Cha vel tashtaghyn mee-chairagh gys veg yn ymmyd: agh ta ynrickys livrey veih baase. 3Cha lhig y Chiarn da annym yn er-crauee dy gholl naardey: agh t’eh skeayley cooid ny drogh-yantee. 4T’eh cheet gys boghtynid ta dellal lesh laue lhag: agh ta laue yn er tarroogh jannoo berchagh. 5Eshyn ta chaglym ’sy tourey, t’eh ny ghooinney creeney: agh eh ta liastey ’syn ouyr, t’eh ny vac naareydagh. 6Ta bannaghtyn er kione yn er-cairagh: agh ver tranlaase ny host beeal ny drogh-yantee. 7Ta imraa yn er ynrick bannit: agh nee ennym y vee-chrauee loau ersooyl. 8Nee adsyn ta creeney-chreeagh soiaghey jeh ny annaghyn: agh nee ommydan brynnagh tuittym. 9Eh ta shooyl dy jeeragh, t’eh shooyl shickyr: agh eshyn ta goaill ayns raaidyn cammey, bee eh cronnit. 10Eshyn ta meekey lesh e hooill, t’eh tayrn trimshey er hene; agh nee ommydan tutleragh tuittym. 11Ta beeal y dooinney cairagh chibbyr dy vioys: agh nee tranlaase coodaghey eddin y vee-chrauee. 12Ta myskid doostey streeu: agh ta graih coodaghey dy chooilley pheccah. 13Ayns ny meillyn echeysyn ta toiggalagh, ta creenaght er ny gheddyn: agh ta’n slatt son y dreeym echeysyn ta laccal tushtey. 14Ta deiney creeney stoyrey seose creenaght: agh ta beeal yn ommydan er-gerrey da toyrt-mow. 15Ta cooid y dooinney berchagh e ard-valley lajer: ta trimshey ny boghtyn yn êgin oc. 16Ta laboragh yn er-cairagh leeideil gys bea: cheet-stiagh ny mee-chrauee gys peccah. 17T’eh ayns raad y vea ta coyrt geill da ynsagh: agh eshyn obbys coyrle, t’eh er-shaghryn. 18Eshyn ta keiltyn myskid lesh meillyn breagagh, as eshyn ta cur scammylt er y hoshiaght, t’eh ny ommydan. 19Ayns ymmodee goan ta ymmodee peccah, agh eshyn smaghtys e veillyn, t’eh creeney. 20Ta chengey yn er-cairagh myr reih argid: s’beg feeu ta cree ny mee-chrauee. 21Ta meillyn y dooinney crauee dy ynsaghey ymmodee: agh ta ny mee-cheeayllee goll naardey son laccal creenaght. 22Ta bannaght y Chiarn berchagh, as cha vel eh coyrt seaghyn erbee lesh. 23Te myr gamman da’n ommydan dy yannoo olk: agh ec dooinney lowal ta creenaght. 24Berree aggle y vee-chrauee er: agh bee yeearree yn er-cairagh jeant magh. 25Myr ta’n gheay-chassee goll shaghey, cha leah shen ta ny mee-chrauee ec kione: agh ec yn er ynrick ta undin dy bragh farraghtyn. 26Myr vinegar da ny feeacklyn, as jaagh da ny sooillyn, myr shen ta’n litcher dauesyn ta dy choyrt eh er eilkin. 27Ta aggle y Chiarn beaynaghey laghyn: agh bee bleeantyn ny mee-chrauee goit giare. 28Bee boggey ayns treishteil y dooinney cairal: agh nee jerkal y vee-chrauee cherraghtyn. 29Ta raad y Chiarn niart dauesyn ta jeeragh: agh hig toyrt-mow er ny drogh-yantee. 30Cha bee yn vooinjer chairal dy bragh astyrit: as cha bee ny mee-chrauee foddey-beayn er y thalloo. 31Ta beeal yn er ynrick cur magh creenaght: agh bee yn chengey vee-reiltagh giarit ass. 32Ta meillyn y dooinney cairal toiggal ny ta mie: agh ta beeal y drogh ghooinney loayrt dy frourtagh.