CAB. XI

1Ta meihaghyn foalsey dwoaiagh da’n Chiarn: agh ta towse cairagh yn taitnys echeysyn. 2Raad ta moyrn, ta nearey mârish: agh ta creenaght marish ny imlee. 3Nee ynrickys y vooinjer yeeragh adsyn y leeideil, agh nee mee-reiltys drogh-yantee adsyn y stroie. 4Cha vel berchys jeh foays erbee ayns laa’n cherraghey, agh ta cairys livrey veih baase. 5Nee cairys y dooinney mie eh y choadey er y raad; agh nee yn vee-chrauee tuittym liorish e olkys hene. 6Nee cairys sleih ynrick geddyn feaysley daue: agh bee drogh-yantee goit ’sy volteyrys oc hene. 7Tra ta dooinney mee-chrauee geddyn baase, ta e yerkal cherraghtyn: as ta treishteil ny mee-ynrick goll naardey. 8Ta’n dooinney cairal livreit ass seaghyn, as ta’n drogh ghooinney cheet ’syn ynnyd echey. 9Ta kialgeyr lesh e veeal cur coayl da e naboo; agh liorish tushtey yiow yn fer-firrinagh livrey-ys. 10Tra te goll dy mie marish deiney mie, ta’n ard-valley goaill boggey: as tra ta ny mee-chrauee cherraghtyn, ta yllaghey [gennal]. 11Liorish bannaght deiney mie, ta’n ard-valley dy maynrey: agh te currit mow liorish beeal ny mee-chrauee. 12Ta’n dooinney mee-hushtagh soiaghey beg jeh e naboo: agh ta dooinney creeney ny host. 13Ta’n skeealleyder dy vrah cooishyn follit: agh ta dooinney treishteilagh keiltyn y chooish. 14Raad nagh vel coyrle, ta’n theay goll naardey: agh ayns ymmodee fir-choyrlee ta sauchys. 15Eshyn ta raane roish joarree, nee eh surranse er y hon; as eh ta shaghney raanteenys, t’eh shickyr. 16Ta ben ghraysoil geddyn ooashley, as deiney pooaral cosney berchys. 17Ta’n dooinney myghinagh jannoo mie da’n annym echey hene, agh ta’n dooinney dewil tayrn seaghyn er e chorp hene. 18Ta’n mee-chrauee gobbraghey obbyr volteyragh, agh ny chour-syn ta cuirr cairys bee leagh shickyr. 19Myr ta cairys leeideil gys bea: myr shen, eshyn eiyrys er yn olk, t’eh geiyrt er gys e hoyrt-mow hene. 20Adsyn ta jeh drogh chree, t’ad dwoaiagh da’n Chiarn: agh lheid as ta jeeragh ayns nyn raad, t’ad boggey da. 21Ga dy vel laue niartaghey laue, cha bee ny mee-chrauee gyn kerraghey, agh yiow sluight deiney cairal livrey-ys. 22Myr cliegeen dy airh ayns stroin muickey, myr shen ta ben aalin, fegooish ymmyrkey mie. 23Ta yeearree yn dooinney cairal ynrycan son mie: agh bee treishteil y drogh-yantagh ayns anvea. 24Ta fer ayn ta skeayley, as foast t’eh bishaghey: as ta ayn ta lhiettal ny smoo na ta cooie, agh te tayrn gys boghtynid. 25Bee’n dooinney feoiltagh jeant magh lesh sonnys, as eshyn ta gushtaghey, bee eh-hene er ny ooraghey. 26Eshyn ta keiltyn e stoyr arroo, nee yn pobble gwee mollaght er: agh bee bannaght er y chione echeysyn ta dy chreck eh. 27Eshyn ta dy imneagh shirrey mie y chur er y hoshiaght, t’eh cosney aigney-mie: agh eshyn eiyrys er yn olk, berree eh er. 28Tuittee eshyn ta coyrt e varrant er e verchys: agh nee yn dooinney crauee goaill blaa myr banglane. 29Eshyn ta tayrn seaghyn er e hie hene, hed eh lesh y gheay: as bee yn ommydan sharvaant dasyn ta creeney ayns cree. 30Ta mess y dooinney cairagh billey dy vea, as eshyn chosnys anmeenyn, t’eh creeney. 31Cur-my-ner, my ta deiney cairal seaghnit ’sy theihll shoh: foddey smoo ny mee-chrauee, as ny drogh-yantee.