CAB. XII

1Eshyn shynney lesh ynsagh, shynney lesh tushtey: agh eshyn nagh gow rish oghsan, t’eh ny volvane. 2Ta dooinney mie geddyn foayr veih’n Chiarn: agh y dooinney molteyragh nee eh y gheyrey. 3Cha bee dooinney er ny hickyraghey liorish mee-chraueeaght: agh cha bee fraue yn vooinjer chairagh er ny lhaggaghey. 4Ta ben vie myr attey aalin da’n sheshey eck: agh ish ta tayrn nearey er, t’ee myr loauid ayns e chraueyn. 5Ta smooinaghtyn y dooinney ynrick cairal: agh ta coyrleyn ny mee-chrauee son molteyrys. 6Ta goan ny mee-chrauee dy lhie farkiaght son fuill: agh nee beeal y chloan chairal adsyn y livrey. 7Ta ny mee-chrauee giarit jeh, as cha vel arragh jeu: agh nee thie yn vooinjer ynrick shassoo. 8Yiow dooinney moylley rere e chreenaght: agh bee eshyn ta jeh cree mitchooragh beg soit jeh. 9Ny share ta eshyn, ta ayns stayd injil, as son cooney lesh hene, na eshyn ta moyrnagh jeh hene, as laccal arran. 10Ta dooinney myghinagh soiaghey mooar jeh bioys e vaagh: agh ta myghinyn meiygh ny mee-chrauee dewilys. 11Bee eshyn ta laboragh e halloo jeant magh lesh arran: agh eshyn ta taaghey marish stroialtee, t’eh laccal tushtey. 12Ta drogh ghooinney geearree ribbey ny mee-chrauee: agh ta fraue y vooinjer chairagh gymmyrkey mess. 13Ta’n fer olk goit liorish mee-reiltys e veillyn hene: agh hig y vooinjer ynrick ass seaghyn. 14Bee dooinney jeant magh lesh mieys, liorish mess e veeal, as rere obbyr e laueyn bee dooinney cooilleenit. 15Ta raad ommydan jeeragh ayns e hooillyn hene; agh t’eshyn creeney eaishtys rish coyrle. 16Ta corree yn ommydan dy leah cronnit: agh ta dooinney creeney coodaghey nearey. 17Eshyn ta loayrt yn irriney, t’eh soilshaghey cairys; agh feanish foalsey, molteyraght. 18Ta fer ayn, ta loayrt goll-rish gyerid y chliwe: agh ta slaynt ayns chengey yn dooinney creeney. 19Bee meillyn ny firriney er ny hickyraghey son dy bragh: agh cha vel chengey vreagagh agh son tullogh. 20Ta foalsaght ayns y chree ocsyn ta kiarail olk: agh ta shee cour ny fir-choyrlee sheeoil. 21Cha jean olk erbee taghyrt da’n dooinney cairagh: agh bee ny mee-chrauee laadit lesh olk. 22Ta meillyn breagagh dwoaiagh da’n Chiarn, agh adsyn ta dellal dy firrinagh t’ad boggey da. 23Ta dooinney toiggalagh keiltyn tushtey, agh ta cree ny mee-chrauee fockley magh ommijys. 24Nee yn laue jeidjagh gymmyrkey reill, agh bee yn mee-rioosagh fo keeshyn. 25Ta trimshey ayns cree dooinney cur er croymmey: agh ta fockle dooie jannoo gennal jeh. 26Ta’n dooinney cairal ny s’ooasle na e naboo: agh ta raad ny mee-chrauee cur ad er-shaghryn. 27Cha vel yn er-liastey gaarlagh shen, ghow eh ayns shelg: agh ta cooid dooinney frioosagh bannaght da. 28Ayns raad yn ynrickys ta bea, as ayns y chassan shen cha vel nhee baasoil erbee.