CAB. XIII

1Ta mac creeney clashtyn rish ynsagh e ayr: agh cha vel y craidoilagh cur geill da oghsan. 2Yiow dooinney soylley dy chooid vie liorish mess e veeal: agh bee dewilys cronney anmeenyn ny drogh-yantee. 3Eshyn ta smaghtaghey e veeal, t’eh freayll e vioys: agh eshyn ta fosley lhean e veillyn, hig eh gys toyrt-mow. 4Ta annym y litcher geearree: agh cha vel eh cosney monney: agh bee annym y vooinjer tarroogh jeant sonney. 5Ta dwoaie ec y dooinney ynrick er breagyn: agh ta’n peccagh mee-chrauee feohdoil, as cheet gys nearey. 6Ta ynrickys dy choadey eshyn ta jeeragh ’sy raad: agh ta peccah cur naardey yn drogh-yantagh. 7Ta fer ayn ta lhiggey er dy ve berchagh, ga nagh vel monney echey: as ta fer ayn ta jannoo boght jeh hene ayns mean e verchys. 8Ta e verchys leagh son bioys y dooinney: agh noi’n voght cha vel plaiynt erbee. 9Ta soilshey yn chloan chrauee bio as gennal: agh bee cainle ny mee-chrauee currit ass. 10Ynrycan liorish moyrn ta anvea brishey magh: agh ta creenaght mâroosyn ta goaill coyrle vie. 11Nee’n verchys ta cosnit dy aggairagh lheïe ersooyl: agh eshyn ta chaglym lesh laue tarroogh ynrick, nee eh bishaghey. 12Ta’n treishteil ta lhiggit shaghey jannoo ching jeh’n chree: agh tra ta’n yeearree jeant magh, te eer billey dy vea. 13Quoi-erbee soie-ys beg jeh’n goo, hed eh naardey: agh eshyn t’ayns ammys ny annaghyn, yiow eh leagh. 14Ta’n leigh da’n dooinney creeney myr chibbyr y vea, dy hyndaa veih ribbaghyn y vaaish. 15Ta keeayl vie cosney foayr: agh s’doillee ta raad ny drogh-yantee. 16Ta dy chooilley ghooinney toiggalagh dellal lesh tushtey: agh ta’n ommydan dy vrah yn ommijys echey hene. 17Ta drogh chaghter duittym ayns olk: agh ta chaghter treishteilagh cur lesh foays. 18Ta boghtynid as nearey ny chour-syn obbys ynsagh: agh eshyn ver geill da oghsan, hig eh jeh dy mie. 19Ta’n yeearree cooilleenit eunyssagh da’n annym: agh te feohdoil da ny mee-chrauee dy haghney yn olk. 20Eshyn ta taaghey marish deiney creeney, bee eh creeney: agh bee sheshey ommydanyn currit naardey. 21Ta olk geiyrt er drogh-yantee: agh er y vooinjer chairal bee mie cooilleenit. 22Ta dooinney mie faagail eiraght da cloan e chlienney: as ta cooid y drogh-yantagh stoyrit cour yn er-cairagh. 23Ta nyn saie beaghey ayns farrysthie ny boghtyn: agh ta fer ayn, ta goll mow son laccal tushtey. 24Eshyn ta sparail e chlatt, cha nhynney lesh e vac: agh eshyn shynney lesh eh, t’eh dy smaghtaghey eh ayns traa. 25Ta’n dooinney cairal gee dy yannoo magh e yeearree: agh bee bolg ny mee-chrauee shang.