CAB. XIV

1Ta dy chooilley ven chreeney cummal seose e thie: agh ta’n unnane ommijagh dy phluckey neose eh lesh e laueyn. 2Eh ta gimmeeaght ayns ynrickys, t’eh goaill aggle roish y Chiarn: agh t’eshyn ta camlaagagh ayns e raaidyn soiaghey beg jeh. 3Ayns beeal yn ommydan ta slatt son e voyrn: agh nee meillyn yn vooinjer chreeney adsyn y choadey. 4Raad nagh vel dew, ta’n chratch follym: agh ta mooarane bishagh liorish niart y dow. 5Cha jean feanish firrinagh breg y insh: agh nee feanish foalsey fockley-magh breagyn. 6Ta’n kialgeyr shirrey creenaght, as cha vel eh cheet lesh: agh ta tushtey aashagh dasyn ta keeayl echey. 7Ny jean sheshaght rish dooinney ommijagh, my t’ou cur-my-ner nagh vel aynsyn ny meillyn dy hushtey. 8Ta creenaght yn er tushtagh dy hoiggal e raad: agh ta ommijys ny mee-chrauee, molteyrys. 9Cha vel ny mee-chrauee agh jannoo craid jeh peccah: agh ta foayr Yee mastey deiney cairal. 10Ta’n cree gennaghtyn e herriuid hene, as cha vel ec joarree dy yannoo rish e voggey. 11Bee thie ny mee-chrauee tilgit bun-ry-skyn: agh nee ynnyd-vaghee deiney mie blaaghey. 12Ta raad ayn, as er-lesh dooinney dy vel eh jeeragh: agh ta’n jerrey echey raaidyn y vaaish. 13Ayns eer garaghtee hene, ta’n cree trome, as ta trimshey ayns jerrey yn yennallys cheddin. 14Bee eshyn ta cooyl-skyrraghtyn ayns e chree, skee jeh ny raaidyn echey hene: agh bee dooinney mie jeant magh veih hene. 15Ta’n ommydan credjal dy chooilley ockle: agh ta’n dooinney creeney jeeaghyn dy mie gys e immeeaght. 16Ta dooinney creeney goaill aggle, as scarrey rish olk: agh ta’n ommydan dewil as daaney. 17Eshyn ta siyragh gys corree, t’eh ny ommydan, as dooinney lesh saaseyn olk, t’eh dwoaiagh. 18Ta’n mee-hushtagh jannoo ommijys e eiraght: agh ta’n vooinjer chreeney coamrit lesh tushtey. 19Ta’n olk croymmey roish y vie, as ny mee-chrauee ec giattyn deiney ynrick. 20Ta beg soit jeh’n voght liorish e naboo hene: agh t’ec y verchagh caarjyn dy liooar. 21Eshyn ta soiaghey beg jeh e naboo, t’eh jannoo peccah: agh eh ta chymmoil er ny boghtyn s’maynrey t’eh. 22Nagh vel ad er-shaghryn ta shêgin er olk? agh bee myghin as firrinys mâroosyn ta smooinaghtyn dy mie. 23Ayns dy chooilley laboraght ta vondeish: agh cha vel agh boghtynid ayns taggloo ny meillyn. 24Ta berchys attey aalin da sleih creeney: agh cha vel ad agh soilshaghey ommijys yn ommydan. 25Ta feanish firrinagh sauail bioys: agh ta feanish foalsey loayrt breagyn. 26Ayns aggle y Chiarn ta shickyrys treishteil: as ec y chloan echey vees boayl dy chemmyrk. 27Ta aggle y Chiarn farrane y vea, dy haghney ribbaghyn y vaaish. 28Ayns ymmodee pobble ta ooashley yn ree: agh ayns genney deiney ta prince goll naardey. 29Eshyn ta moal gys corree, t’eh dy hushtey vooar: agh ta’n dooinney jeh cree siyragh dy vrah yn ommijys echey hene. 30Ta cree follan slaynt y challin: agh ta troo, loauid ny craueyn. 31Eshyn ta tranlaasagh er y voght, t’eh goltooan e Er-croo: agh t’eh coyrt ooashley dasyn ta chymmoil er ny boghtyn. 32Ta’n mee-chrauee eiyrit ersooyl ayns e olkys: agh ec yn er-crauee ta treishteil eer ayns e vaase. 33Ta creenaght lhie dowin ayns cree yn pheccagh tushtagh: agh ta’n ommydan dy vrah e smooinaghtyn hene. 34Ta cairys niartaghey ashoon: agh ta peccah ny oltooan da pobble erbee. 35Ta’n ree goaill taitnys ayns shirveishagh creeney: agh ta e chorree n’oï-syn, t’eh goaill nearey jeh.