CAB. XV

1Ta ansoor meeley meeinaghey corree: agh ta goan fargagh doostey jymmoose. 2Ta chengey yn vooinjer chreeney cur tushtey er y hoshiaght: agh ta beeal ny mee-cheeayllee deayrtey magh ommijys. 3Ta sooillyn y Chiarn ayns dy chooilley voayl, cur-my-ner chammah sie as mie. 4Ta chengey gherjoilagh billey dy vea: agh ta lhag-smaght aynjee brishey yn spyrryd. 5Ta’n ommydan soiaghey beg jeh ynsagh e ayrey: agh eh ta beasagh gys oghsan, t’eh creeney. 6Ayns thie yn er-cairal ta cooid as couryn: agh boiraghyn ayns cheet-stiagh yn dooinney mee-chrauee. 7Ta ny meillyn creeney skeayley mygeayrt tushtey: agh cha vel cree ny mee-cheeayllee jannoo shen. 8Ta oural ny mee-chrauee dwoaiagh da’n Chiarn: agh t’eh goaill taitnys ayns padjer yn er ynrick. 9Ta raad y drogh pheccagh feohdoil da’n Chiarn: agh shynney lesh eh ta geiyrt er cairys. 10Ta smaght feohdagh dasyn ta treigeil y raad, as eshyn nagh gow rish oghsan hed eh naardey. 11Ta niurin as toyrt-mow kiongoyrt rish y Chiarn, cre wheesh smoo ta creeaghyn cloan gheiney. 12Cha vel craidoilagh booiagh jehsyn ta coyrt oghsan da, chamoo nee eh taaghey marish deiney creeney. 13Ta cree boggoil jannoo eddin gennal: agh liorish trimshey yn chree, ta’n spyrryd er ny vrishey. 14Ta’n cree echeysyn, ta keeayl echey, shirrey lurg tushtey: agh ta beeal ny mee-cheeayllee beaghey er ommijys. 15Ta ooilley laghyn yn ymmyrchagh seaghnagh: agh eshyn ta jeh cree gennal, t’eh dy kinjagh farrail dy mie. 16Ny share ta red castrey-cair lesh aggle y Chiarn, na mooarane berchys as seaghyn lesh. 17Ny share ta lhongey dy lossreeyn lesh aigney-mie, na brawn beiyht, as myskid lesh. 18Ta’n connyssagh doostey streeu: agh eshyn ta moal gys corree, t’eh cur streeu gy-kione. 19Ta raad y litcher myr cleiy drineagh: agh ta raad yn er-cairagh jeant rea. 20Ta mac creeney jannoo ayr gennal; agh ta dooinney ommijagh soiaghey beg jeh e voir. 21Ta ommijys boggey dasyn ta laccal tushtey: agh ta dooinney lowal gimmeeaght jeeragh. 22Fegooish coyrle ta kiarailyn deiney cheet gys veg: agh ayns ymmodee fir-choyrlee ta shickyrys. 23Ta boggey ec dooinney liorish ansoor e veeal as fockle loayrit ayns traa cooie, oh, cre cha mie as te! 24Ta’n dooinney creeney goll seose ayns raad-mooar y vea, as t’eh shaghney niurin heese. 25Stroie-ys y Chiarn thie ny mooaralee: agh nee eh niartaghey cagliagh y ven-treoghe. 26Ta smooinaghtyn ny mee-chrauee feohdoil da’n Chiarn: agh s’eunyssagh ny goan ta cheet veih cree glen. 27Eshyn ta shleeuit er cosney, t’eh tayrn seaghyn er e hie hene: agh nee eshyn tannaghtyn ta dwoaiagh er giootyn. 28Ta cree yn er-cairagh imneagh dy chur ansoor lowal: agh ta beeal y drogh ghooinney deayrtey magh goan nieunagh. 29Ta’n Chiarn foddey veih ny mee-chrauee: agh t’eh clashtyn padjer y vooinjer chairal. 30Myr ta soilshey ny sooillyn boggey da’n chree, shen myr ta goo mie ooraghey yn slane callin. 31Yn chleaysh ta coyrt geill da oghsan y vea, te lhiantyn gys y vooinjer chreeney. 32Eshyn obbys ynsagh t’eh soiaghey beg jeh e annym hene: agh eshyn verrys tastey da coyrle, t’eh geddyn tushtey. 33Ta aggle y Chiarn yn raad gys creenaght, as ta injillid leeideil gys ooashley.