CAB. XVI

1Ta smooinaghtyn y chree veih’n dooinney hene: agh ansoor y chengey veih’n Chiarn. 2Ta ooilley raaidyn dooinney glen ayns e hooillyn hene: agh ta’n Chiarn meihaghey ny spyrrydyn. 3Jean dty obbraghyn y hreishteil gys y Chiarn, as bee dty smooinaghtyn jeant mie. 4Ta’n Chiarn er n’yannoo dy chooilley nhee er e hon hene: eer ny drogh-yantee cour laa yn cherraghey. 5Ta dy chooilley ghooinney ard-chreeagh dwoaiagh da’n Chiarn: ga dy jean laue niartaghey laue, cha bee ad gyn kerraghey. 6Liorish myghin as firrinys ta mee-chairys er ny chastey, as liorish aggle y Chiarn ta sleih shaghney olk. 7Tra ta kenjallys y Chiarn er raaidyn dooinney, t’eh coyrt er eer e noidyn ’ve ec shee rish. 8Ny share ta red beg lesh cairys, na cosney mooar lesh aggair. 9Ta cree dooinney kiarail ro-laue: agh shee yn Chiarn ta reill e chesmadyn. 10Ta creenaght flaunyssagh ayns meillyn y ree: cha vel e veeal mee-chairagh ayns briwnys. 11Ta towse as meihaghyn kiart lesh y Chiarn: ta ooilley weightyn y phoagey yn obbyr echeysyn. 12Te dwoaiagh ayns reeaghyn, ad dy yannoo aggair: son ta’n stoyl-reeoil cummit seose liorish cairys. 13Ta reeaghyn goaill taitnys ayns meillyn ny firrinys, as shynney lhieu eshyn ta loayrt yn irriney. 14Ta jymmoose y ree myr chaghteryn baaish: agh nee dooinney creeney shen y veeinaghey. 15Ayns soilshey eddin y ree ta bea, as ta’n foayr echey myr bodjal y fliaghey souree. 16Cre-woad share te dy chosney creenaght na airh? as dy gheddyn tushtey, dy ve reiht roish argid. 17Te raad-mooar y dooinney ynrick dy hea veih olk: eshyn ta cummal ayns e raad, t’eh coadey e annym. 18Ta moyrn goll roish toyrt-mow; as cree mooaralagh roish lhieggey. 19Ny share te, dy ve jeh spyrryd injil marish ny imlee, na dy rheynn spooilley marish ny mooaralee. 20Eshyn ta gymmyrkey eh-hene dy creeney ayns cooish erbee, hig eh jeh dy mie; as quoi-erbee treishtys ayns y Chiarn, s’maynrey t’eh. 21Eh ta creeney ayns cree, vees enmyssit keeayllagh, as ta miljid glare ny meillyn bishaghey ynsagh. 22Ta tushtey chibbyr y vea dasyn s’liesh eh: agh te ayns fardail dy ynsaghey ommydanyn. 23Ta’n cree creeney freayll e veeal fo smaght, as coyrt toiggal da e veillyn. 24Ta goan gerjoilagh myr y kere-volley, millish da’n annym, as slaynt da ny craueyn. 25Ta raad ayn, as er-lesh dooinney dy vel eh jeeragh, agh ta’n jerrey echey raaidyn y vaaish. 26Ta’n dooinney tarroogh laboragh da hene, son ta e veeal dy êginaghey eh. 27Ta dooinney mee-chrauee imneagh son olk, ayns e veillyn ta aile loshtee. 28Ta’n er-connyssagh cuirr anvea, as ta’n scammyltagh jannoo scarrey eddyr eer caarjyn. 29Ta’n dooinney dewil dy violaghey e naboo, as leeideil eh gys raad nagh vel mie. 30T’eh meekey lesh e hooillyn, dy smooinaghtyn er olk, gleashagh e veillyn, t’eh cur yn olk er y hoshiaght. 31Ta’n kione lheeah attey dy ghloyr, my te ry-gheddyn ayns raad yn ynrickys. 32Eshyn ta moal gys corree, t’eh ny s’ooasle na’n er niartal, as eh ta freayll e spyrryd hene fo smaght, na eshyn ta goaill ard-valley. 33Ta ny lottyn ceaut ayns yn ught: agh ta’n slane reill oc veih’n Chiarn.