CAB. XVII

1Ny share ta greme chirrym (dy arran) as fea lesh, na lane thie dy yien mie, lesh anvea. 2Nee sharvaant creeney reill harrish mac, ta oyr nearey: as yiow eh ayrn jeh’n eiraght mastey ny braaraghyn. 3Myr ta’n coirrey-lheïe son glenney argid, as yn furnace son airh: shen myr ta’n Chiarn prowal ny creeaghyn. 4Ta drogh-yantagh cur geill da meillyn foalsey; as breagerey coyrt cleaysh da drogh hengey. 5Quoi-erbee chraidys mysh y voght, t’eh goltooan e Er-croo: as eh ta goaill boggey ayns seaghyn, cha bee eh gyn loght. 6Ta cloan chlienney ooashley da shenn gheiney: as ta ayraghyn gloyr nyn gloan. 7Cha vel goan creeney cooie da ommydan, foddey sloo ta meillyn breagagh lowal ayns prince. 8Ta gioot myr jewel costal ayns ny sooillyn echeysyn ta goaill eh: te goaill raad ayns dy chooilley chooish. 9Eshyn ta coodaghey foill, t’eh cosney aigney-mie: eshyn ta doostey’n chooish, t’eh jannoo brishey eddyr eer caarjyn. 10Ta coyrle vie goaill greme share er dooinney creeney, na keead builley er yn ommydan. 11Ta drogh ghooinney soit ynrycan er anvea: shen-y-fa bee chaghter dewil currit magh n’oï. 12Lhig da muc-awin t’er choayl e quallianyn ve quaaltagh dooinney, roish ommydan ayns farg. 13Quoi-erbee chooilleenys olk er son mie, nee’n olk lhiantyn gys e hie. 14Ta toshiaght streeu myr lhiggey raad da thooilley: shen-y-fa lhig voïd anvea, my jed eh er y hoshiaght. 15Eshyn ta seyrey ny oolee, as eh ta deyrey ny neu-chyndee, t’ad eer ny-neesht dwoaiagh da’n Chiarn. 16Cre-woad share ta ommydan jeh e verchys, fakin nagh vel cree echey dy chosney creenaght lesh? 17Ta carrey dooie ec dy chooilley hraa: agh t’eh myr dty vraar-ruggit ayns earish dty heaghyn. 18Ta’n dooinney lhag-hushtagh coyrt e laue, as t’eh goll raane fenish e charrey. 19Shynney leshyn anvea, ta goaill taitnys ayns streeu: as eshyn ta troggal ro ard e hie, t’eh tayrn assee er hene. 20Eshyn ta jeh cree roonagh, cha vow eh veg y vie, as ta’n chengey foalsey tuittym ayns olk. 21Eshyn ta geddyn mac mee-cheeayllagh, t’eh gys e hrimshey: as s’beg y gherjagh t’ec ayr yn ommydan. 22Ta cree gennal jannoo follan myr medshin: agh ta spyrryd brisht shirgaghey ny craueyn, 23Ta dooinney mee-chrauee goaill leagh dy follit, dy chassey raaidyn y vriwnys. 24Ta creenaght soilshean ayns eddin dooinney creeney: agh ta sooillyn ommydan rouail noon as noal er feaï-ny-cruinney. 25Ta mac neu-chreeney trimshey da e ayr, as sherriuid jeeish dymmyrk eh. 26Myrgeddin dy aagail magh yn ynrick, cha vel eh mie, ny dy oltooan princeyn son nyn gairys. 27Raad ta dooinney creeney ynsit, t’eh sparalagh jeh e ghoan: as ta dooinney tastagh jeh spyrryd smaghtit. 28Eer ommydan, tra t’eh ny host, t’eh coontit creeney: as eh ta dooney e veillyn, t’eh soit jeh myr dooinney toiggalagh.