CAB. XVIII

1Ta dooinney, lurg e aigney, scarrey eh-hene [veih cooishyn elley] as shirrey magh, as dellal ayns dy chooilley chreenaght. 2Cha vel taitnys ec ommydan ayns tushtey, agh ayns geiyrt er aigney e chree hene. 3Raad ta’n mee-chrauee cheet, ta faghid neesht cheet mârish, as oltooan lesh scammylt. 4Ta goan beeal dooinney myr ushtaghyn dowin, as farrane dy chreenaght myr strooan bio. 5Dy yannoo soiaghey jeh persoon ny mee-chrauee, cha vel shen mie, ny dy chastey yn dooinney cairal ayns briwnys. 6Ta meillyn yn ommydan dellal ayns streeu, as e veeal doostey bwoailtys. 7Ta beeal ommydan e hoyrt-mow, as ta e veillyn ribbey e annym. 8Ta focklyn skeealleyder myr lhottyn, as ta’n ghah oc roshtyn eer gys y chree. 9Eshyn neesht ta liastey ayns e obbyr, t’eh ny vraar da’n ard-stroialtagh. 10Ta ennym y Chiarn toor lajer: ta’n dooinney cairagh chea huggey, as t’eh ayns sauchys. 11Ta cooid y dooinney berchagh e ard-valley lajer, as er-lesh hene myr voalley ard. 12Roish toyrt-mow ta cree dooinney mooaralagh, as ta injillid goll roish ooashley. 13Eh ta coyrt ansoor ayns cooish, roish my t’eh clashtyn eh, te ommijys as nearey da. 14Nee spyrryd dooinney gymmyrkey lesh fo annooinid e ghooghys: agh spyrryd guint quoi oddys y ymmyrkey? 15Ta cree yn dooinney creeney cosney tushtey: as ta cleaysh y dooinney lowal shirrey son tushtey. 16Ta gioot dooinney jannoo raad da, as cur lesh eh gys sheshaght deiney mooarey. 17Eh ta loayrt hoshiaght ayns e chooish hene, er-lhiat dy vel eh ’sy chair: agh ta e naboo cheet, as dy rassey trooid eh. 18Ta lottyn coyrt streeughyn gy-kione, as reaghey boiraghyn eddyr deiney niartal. 19Ta braar, as corree er, ny s’doillee dy ve cosnit na ard-valley lajer: as ta mee-choardail braaraghyn myr boltyn cashtal. 20Bee jollys dooinney jeant magh lesh mess e veeal: as lesh bishagh e veillyn bee eh er ny ooraghey. 21Ta baase as bioys ayns pooar y chengey, as nee dooinney farrail rere myr t’eh jannoo ymmyd jeh. 22Quoi-erbee ta geddyn ben (vie) t’eh geddyn gioot mie, as cosney bannaght veih’n Chiarn. 23Ta’n boght guee as geearree: agh ta’n berchagh gansoor dy baggyrtagh. 24Eshyn ta caarjyn echey, shegin da jeeaghyn eh-hene myr carrey: as ta carrey ayn lhiannys hood ny s’chenney na braar erbee.