CAB. XIX

1Ny share ta’n boght ta gimmeeaght ayns e ynrickys, na eh ta camlaagagh ayns e veillyn, as ny ommydan. 2Myrgeddin dy bee yn annym fegooish ynsagh cha vel eh mie: as eshyn ta ro hiyragh, nee eh tuittym ayns peccah. 3Ta ommijys dooinney dy chassey e raad: as ta e chree tallagh noi yn Chiarn. 4Ta berchys jannoo myrgeddin ymmodee caarjyn: agh veih yn voght, ta eer e naboo chyndaa ersooyl. 5Cha bee feanish foalsey fegooish kerraghey, as ta smaght gyere cour y vreagerey. 6Nee ymmodee shirrey foayr y ree, as ta dy chooilley ghooinney ny charrey dasyn chebbys giootyn. 7Ta deiney-mooinjer y voght ooilley dy choyrt cooyl rish: cre-woad smoo ta e chaarjyn goll foddey veih? t’eh geiyrt orroo lesh e ghoan, agh cha vel geill oc da. 8Eh ta geddyn creenaght, shynney lesh e annym hene: eshyn freillys tushtey yiow eh mie. 9Cha bee feanish foalsey fegooish kerraghey, as nee yn breagerey dy shickyr cherraghtyn. 10Cha vel pooar cooie son ommydan: foddey sloo son sharvaant dy reill harrish princeyn. 11Ta keeayl dooinney dy chastey e chorree: as te yn ghloyr echey [ny cheayrtyn] dy lhiggey lesh yn aggair. 12Ta jymmoose y ree myr garveigagh y lion: agh ta’n foayr echey myr druight er y faiyr. 13Ta ommydan dy vac seaghyn e ayrey: as ta beealerey dy ven myr faarn kinjagh ayns thie. 14Ta thieyn as berchys eiraght ayraghyn: as ta ben lowal veih’n Chiarn. 15Ta litcheraght dy hilgey fer ayns cadley trome, as nee’n annym liastey surranse gortey. 16Eshyn freillys ny annaghyn, t’eh freayll yn annym echey hene: agh hed eshyn mow, nagh vel geill echey gys e raaidyn. 17Eshyn ta giastyllagh da ny boghtyn, t’eh geeasaght da’n Chiarn: as son shen t’eh myr shoh dy vaarail, bee eh er ny eeck da reesht. 18Smaghtee dty vac, choud as ta caslys dy yannoo mie jeh, agh ny cur raad da dewilys neu-chooie. 19Nee dooinney siyragh gys corree surranse seaghyn: son my livrey-ys oo eh, ny-yeih shegin dhyt jannoo eh reesht. 20Eaisht rish coyrle, as gow ynsagh, dy vod gerjagh ve ayd ayns jerrey dty laghyn. 21Ta ymmodee smooinaghtyn dowin ayns cree dooinney: ny-yeih she coyrle y Chiarn, shen nee shassoo. 22Te yeearree dooinney dy yannoo thurn mie: as ta’n boght ynrick ny share na’n berchagh breagagh. 23Ta aggle y Chiarn leeideil gys bea: s’maynrey vees e lheid, as shaghnee eh dagh olk. 24Ta’n litcher liastey follaghtyn e laue ayns e vroghil, as s’coan nee eh wheesh troggal eh gys e veeal. 25Smaghtee yn craidoilagh, as nee yn vooinjer ôney goaill tastey: as coyrlee dooinney toiggalagh, as gowee eh tushtey. 26Eshyn ta spooilley e ayr, as dy eiyrt ersooyl e voir, t’eh ny vac gyn-nearey as scammyltagh. 27Cur twoaie, my vac, nagh n’eaisht oo rish y drogh ynsagh shen, ver oo er-shaghryn voish coyrle vie. 28Cha vel feanish mee-chrauee agh jannoo craid jeh briwnys, as ta beeal y drogh-yantagh sluggey sheese mee-chairys. 29Ta kerraghey kiarit son ny craidoilee, as scuitchal son dreeym ny mee-cheeayllee.