CAB. II

1My vac, my nee oo soiaghey jeh my ghoan, as my annaghyn y reayll dowin follit ayns dty chree; 2Myr shen dy jean oo croymmey dty chleaysh gys creenaght, as chyndaa dty chree gys tushtey; 3Dy feer, my eïe-ys oo dy ard son keeayll, as my hroggys oo dty choraa son toiggal; 4My shirrys oo ee myr argid, as ronsaghey er y hon eck, myr son berchys follit; 5Eisht toiggee oo aggle y Chiarn, as yiow briaght jeh tushtey dty Yee. 6Son ta’n Chiarn coyrt creenaght: ass y veeal echeysyn ta cheet fysseree as tushtey. 7T’eh tashtey seose slane creenaght son y dooinney cairal: t’eh myr eilley-caggee dauesyn ta gimmeeaght dy jeeragh. 8T’eh dy reayll ny kesmadyn dy vriwnys, as coadey raad e nooghyn. 9Eisht nee oo toiggal cairys, as briwnys, as corrymid: dy jarroo dy chooilley raad mie.

10Tra ta creenaght gentreil stiagh ayns dty chree, as ta tushtey eunyssagh gys dty annym. 11Nee coyrle chreeney oo y choadey, bee tushtey dty endeilagh. 12Dy livrey oo veih raad y drogh ghooinney, veih’n dooinney ta loayrt goan cluicagh. 13Ta treigeil cassanyn yn ynrickys, dy huill ayns raaidyn y dorraghys. 14Ta goaill boggey dy yannoo olk, as taitnys oc ayns camlaagys ny drogh-yantee. 15Ta shooyl ayns raaidyn cammey, as t’ad condaagagh ayns nyn immeeaght. 16Dy livrey oo veih’n ven yoarree, dy jarroo veih’n ven-oainjyr ta brynneraght lesh e goan. 17Ta treigeil leeideilagh yn aegid eck, as jarrood yn conaant ren ee fenish Yee. 18Son ta’n thie eck ayns naboonys y vaaish, as ny kesmadyn eck leeideil gys ny merriu. 19Cha vel veg ta taaghey mâree chyndaa reesht, chamoo t’ad dy ghoaill ny cassanyn dy vea. 20Dy vod oo shooyl ayns raad deiney mie, as freayll kesmadyn y vooinjer chairal. 21Son nee deiney ynrick cummal ’sy cheer, as nee feallagh ny firrinys tannaghtyn ayn. 22Agh bee ny mee-chrauee giarit jeh veih’n thalloo, as bee ny drogh-yantee astyrit ass.