CAB. XX

1Ta feeyn ny chialgeyr, jough lajer te eulyssagh: as quoi-erbee ta mollit lioroo, cha vel eh creeney. 2Ta jymmoose y ree myr garveigagh y lion: quoi-erbee vrasnys e chorree, t’eh noid da e vioys hene. 3Te son goo mie dooinney dy chur streeu dy fea: agh bee dy chooilley pheeikear jannoo boirey. 4Cha jean y litcher traaue kyndagh rish y feayraght; shen-y-fa shooylee eh ny thieyn ’syn ouyr, agh cha vow eh monney. 5Ta coyrle ayns cree dooinney goll-rish ushtey dowin: agh nee dooinney schleioil tayrn magh eh. 6Nee yn chooid smoo dy leih fockley-magh, dagh unnane, e vieys hene: agh dooinney dy firrinagh (mie) s’doillee y gheddyn. 7Ta dooinney cairal shooyl ayns e ynrickys: ta e chloan bannit ny yeï. 8Yn ree ta ny hoie er stoyl y vriwnys, t’eh skeayley ersooyl dy chooilley olk lesh e hooillyn. 9Quoi oddys gra, Ta mee er ghlenney my chree, ta mee seyr veih my pheccah? 10Ta caghlaa meihaghyn, as caghlaa towseyn, ny-neesht co-laik dwoaiagh da’n Chiarn. 11Eer lhiannoo, as oddys baght ve goit jeh, liorish e ymmyrkey, vel caslys mie ny sie jeh. 12Yn cleaysh ta clashtyn, as y sooill ta fakin, she’n Chiarn t’er chiaddey ad ny-neesht. 13Ny cur rouyr raad da cadley er-aggle dy jig oo gys boghtynid: foshil dty hooillyn, as bee oo jeant magh lesh arran. 14Cha by-feeu eh, cha by-feeu eh, ta’n kionneyder dy ghra: agh tra t’eh er n’immeeaght, eisht t’eh boggyssagh. 15Ta airh ayn, as mooarane claghyn costal: agh ta ny meillyn lesh tushtey, roish ny jewellyn s’aalin. 16Gow yn garmad echeysyn ta raane roish joarree, as gow gioal jehsyn, ta coyrt fo laue son ben whuaagh. 17Ta arran dy volteyrys millish da dooinney, agh hig y traa, dy bee eh myr lane-beeal dy ghenniagh. 18Ta dy chooilley chiarail, liorish coonceil, er ny niartaghey: as lesh coyrle vie gow laue rish caggey. 19Eh ta goll mygeayrt myr skeealleyder, t’eh dy vrah folliaghtyn: er-y-fa shen, ny bee veg ayd dy yannoo rishyn, ta brynneraght lesh e veillyn. 20Quoi-erbee ghwee-ys mollaght da e ayr, ny e voir: bee’n lamp echeysyn er ny vooghey ayns y dooid dy ghorraghys. 21Foddee eiraght ve cosnit ayns traa giare ec y toshiaght: agh gyn bannaght cheet lesh ec y jerrey. 22Ny abbyr uss, Cooilleen-yms olk son olk: agh fark er y Chiarn, as nee eh dty livrey. 23Ta caghlaa meihaghyn dwoaiagh da’n Chiarn: as y towse foalsey cha vel eh mie. 24Ta kesmadyn dooinney fo reill y Chiarn, kys oddys dooinney eisht e raad hene y hoiggal? 25Te ribbey da’n dooinney ta spooilley cooid chasherick; as lurg breearraghyn, shirrey brishey ad. 26Ta ree creeney skeayley ny mee-chrauee, as tayrn y whueeyl harrystoo. 27Ta cooinsheanse dooinney hene cainle y Chiarn, ronsaghey magh eer folliaghtyn s’diuney yn chree. 28Ta myghin as firrinys coadey yn ree: as ta e stoyl-reeoil cummit seose liorish trocairys. 29Ta gloyr deiney aegey nyn niart, as ta’n kione lheeah aalid shenn gheiney. 30Ta smaght as buillaghyn lhiasaghey olk: myr shen ta seaghyn glenney broïd follit y chree.