CAB. XXI

1Ta cree y ree ayns laue y Chiarn, myr ny strooanyn ushtey: t’eh dy hyndaa ad raad saillish hene. 2Ta raaidyn dooinney ooilley jeeragh ayns e hooillyn hene: agh ta’n Chiarn ronsaghey ny creeaghyn. 3Dy yannoo cairys as briwnys kiart, te ny s’taitnyssagh da’n Chiarn na ourallyn costal. 4Ayns shilley ard, as cree moyrnagh, as eer ayns farrysthie ny mee-chrauee, ta peccah. 5Ta kiarail y dooinney jeidjagh leeideil gys sonnys: agh ta’n fer siyragh roie gour e vullee gys boghtynid. 6Lesh chengey vreagagh dy chosney berchys, te fardalys leaystey noon as noal mâroosyn ta geiyrt er toyrt-mow. 7Nee roosteyrys ny mee-chrauee stroie ad-hene: er-yn-oyr dy vel ad gobbal dy yannoo cairys. 8Ta raad y pheccagh camlaagagh as quaagh: agh er son yn er ynrick ta’n obbyr echey jeeragh. 9Te ny share dy chummal ayns corneil erbee mullagh thie, na marish ben veealeragh ayns thie mooar. 10Ta annym drogh ghooinney aggindagh er olk: cha vow e naboo foayr erbee ayns e hilley. 11Tra ta’n craidoilagh kerrit, ta’n aegid gaase creeney: as tra ta’n toiggalagh ynsit, t’eh goaill tushtey. 12Ta’n dooinney cairal dy creeney goaill huggey hene stayd drogh-sleih; dy vel Jee coyrt naardey drogh-yantee son nyn ghrogh-yannoo. 13Quoi-erbee dooinys e chleaysh noi eam yn ymmyrchagh, nee eshyn myrgeddin geamagh; agh cha vow eh clashtyn. 14Ta gioot follit mooghey jymmoose, as leagh ’syn oghrish corree hrome. 15Te boggey da dooinney cairal dy choyrt briwnys kiart: agh hig toyrt-mow er ny aggairee. 16Eshyn ta er-shaghryn veih’n raad dy hushtey, bee e chronney marish ny merriu deyrit. 17Eshyn ta geiyrt er gien mie, bee eh ny ghooinney boght: eshyn ta jollyssagh er feeyn as ooil, cha bee eh berchagh. 18Bee ny mee-chrauee son feaysley da’n chloan ynrick, as y tranlaasagh son y dooinney jeeragh. 19Te ny share dy chummal ’syn aasagh, na marish ben streeuagh as fargagh. 20Ta berchys ayn dy ve er ny yeearree, as ooil ayns cummal y dooinney creeney: agh ta’n ommydan dy yummal eh. 21Eshyn eiyrys er cairys as myghin, yiow eh bea, ynrickys, as ooashley. 22Ta dooinney schleioil cosney stiagh er ard-valley ny niartallee, as lhieggal troshid y treishteil oc. 23Quoi-erbee smaghtys e veeal, as e hengey, t’eh freayll e annym veih seaghyn. 24Craidoilagh moyrnagh as sonnaasagh ta’n ennym echeysyn, ta dy mooaralagh dellal ayns corree dewil. 25Ta mian y litcher dy choyrt eh naardey, son ta e laueyn chea obbyr. 26T’eh fo saynt jollyssagh fey-ny-laa: agh ta’n feoiltagh coyrt voish lesh laue foshlit. 27Ta oural ny mee-chrauee dwoaiagh: cre-woad smoo, tra t’eh dy hebbal eh lesh cree crauee-oalsey? 28Hed y feanish foalsey naardey: agh eh ta geill echey da’n irriney, t’eh loayrt dy shickyr. 29Ta’n drogh ghooinney staayney e eddin: agh son y dooinney onneragh, t’eh goll jeeragh er y raad. 30Cha vel creenaght, ny tushtey, ny coyrle, noi yn Chiarn. 31Ta’n niagh greihit cour laa yn chaggey: agh ta sauchys veih’n Chiarn.