CAB. XXII

1Ta goo mie dy ve er ny reih roish mooarane berchys: as kenjallys-ghraihagh roish argid as airh. 2Ta’n berchagh as y boght cheet dy cheilley: ta’n Chiarn yn Er-croo oc ooilley. 3Ta dooinney tastagh cronnaghey yn olk ro-laue, as shaghney eh: agh ta ny mee-cheeayllee roie er nyn gione, as t’ad seaghnit. 4Liorish injillid, as aggle y Chiarn ta cheet berchys, as ooashley, as bea. 5Ta drineyn, as ribbaghyn ayns raad ny camlaagee: agh eshyn ta jeeaghyn dy mie gys e annym hene vees foddey voue. 6Trog dty lhiannoo ’sy raad, lhisagh eh goaill: as tra t’eh shenn cha jean eh treigeil eh. 7Ta’n berchagh reill harrish y voght, as ta’n yeeaseyder ayns ammys yn yeeaseydagh. 8Eshyn ta cuirr mee-chairys, nee eh buinn fardalys: as bee soost e hranlaase er ny vrishey. 9Er y thooill feoilt hig bannaght ny ghaa: son t’eh shirveish kuse jeh e arran er ny boghtyn. 10Eiyr magh yn scammyltagh, as bee anvea ec kione: dy feer, streeu, as oltooan, nee ad scuirr. 11Eshyn by-haittin lesh glennid cree, son ynrickys e veillyn bee yn ree ny charrey da. 12Ta sooillyn y Chiarn coadey deiney creeney, as t’eh tilgey goan y tranlaasagh bun-ry-skyn. 13Ta’n litcher gra, Ta lion shooyl mooie, bee’m er my varroo ayns ny straïdyn. 14Ta beeal drogh ven ooig dowin: nee eshyn ta feohdagh da’n Chiarn tuittym ayn. 15Ta ommijys fraueit ayns cree paitchey: agh nee yn slatt smaghtee geiyrt magh eh. 16Eshyn ta jannoo tranlaase er y voght, dy vishaghey e chooid-seihlt, as eh ta slaa laue yn verchagh, hig eh-hene dy feer gys feme. 17Croym dty chleaysh, as eaisht rish goan deiney creeney, as chyndaa dty chree gys my ynsagh. 18Son s’eunyssagh vees eh dhyt, dy reayll ad mayrt, as dy bee ad cormit jesh gys dty veillyn. 19Dy vod dty varrant ve er y Chiarn, ta mee er hoilshaghey ad dhyt jiu, dy feer dhyt hene. 20Nagh vel mish er scrieu er dty hon’s ynsaghyn ooasle, ayns coyrleyn as tushtey? 21Dy chur dhyt toiggal shickyr ayns goan ny firriney; dy choyrt coyrle fondagh dauesyn shirrys hood. 22Ny jean spooilley yn boght, son dy vel eh boght: chamoo jean tranlaase er yn ymmyrchagh ayns briwnys. 23Son nee’n Chiarn y chooish oc y ghoaill seose, as spooillee eh yn annym ocsyn ren adsyn y spooilley. 24Ny jean caardys rish dooinney fargagh, as ny jean sheshaght rish fer anveagh. 25Er-aggle dy n’ynsee oo ny aghtyn echey, as dy dayrn oo ribbey er dty annym. 26Ny bee uss fer jeusyn ta coyrt fo nyn laue, ny jeusyn ta goll raane son feeaghyn. 27Mannagh vel fort ayd dy eeck, cre te eisht, agh dy gow eh voïd dty lhiabbee ta foyd? 28Ny jean scughey yn chenn chagliagh, ta dty ayraghyn er hoiaghey. 29Vel oo fakin dooinney jeidjagh ayns e obbyr? nee eh shassoo fenish reeaghyn, cha jean eh shirveish deiney donney.