CAB. XXIII

1Tra t’ou soie ec y voayrd marish ard-ghooinney, smooinee dy imneagh cre ta kiongoyrt rhyt. 2As cur skynn gys dty scoarnagh, my t’ou dty ghooinney jollyssagh. 3Ny bee miandagh er e yien mie, son te bee molteyragh. 4Ny jean rouyr siyr dy ve berchagh: ny cur slane treisht gys dty chreenaght hene. 5Jean oo dty hooillyn y hoiaghey er shen nagh vel farraghtyn? son ta berchys dy shickyr jannoo skianyn daue hene; t’ad getlagh ersooyl myr urley neealloo yn aer. 6Ny ee jeh arran fer y drogh-hooill, as ny lhig dty aigney ve miandagh er e vee blaystal. 7Son myr t’eh smooinaghtyn ayns e chree, shen myr t’eh: Ee as iu, jir eh rhyt, agh cha vel e chree lhiat. 8Yn greme t’ou er n’ee, nee oo tilgey, as caillee oo dty ghlare aalin. 9Ny loayr ayns clashtyn yn ommydan: son soie-ys eh beg jeh creenaght dty ocklyn. 10Ny scugh yn chenn chagliagh; as ny brish stiagh er magheryn y chloan gyn ayr. 11Son ta’n fendeilagh oc niartal; gowee eh seose yn chooish oc dt’oï. 12Croym dty chree gys ynsagh, as dty chleayshyn gys ny goan dy chreenaght. 13Ny freill smaght veih’n lhiannoo; son my chustys oo eh lesh y clatt, cha jean eh cherraghtyn. 14Kerree oo eh lesh y clatt, as nee oo livrey e annym veih niurin. 15My vac, my ta creenaght ayns dty chree, gowee my chree’s boggey, eer my chree hene. 16Dy jarroo, bee my veeghyn gennal, tra ta dty veillyn loayrt reddyn jeeragh. 17Ny lhig da dty chree troo mysh drogh-yantee: agh bee uss ayns aggle y Chiarn fey-yn-laa liauyr. 18Son shickyrys ta laa cooilleeney jerrinagh ry-heet; as cha bee dty yerkal er ny yiarey jeh. 19Eaisht, my vac, as gow keeayl, as reill dty chree ayns y raad. 20Ny jean taaghey marish iuderyn-feeyney, mastey eederyn-foalley jollyssagh. 21Son hig y meshtyllagh, as y glutterey gys boghtynid; as bee’n cadlag coodit lesh frytlagyn. 22Eaisht rish dty ayr ren dty gheddyn; as ny soie beg jeh dty voir, tra t’ee shenn. 23Kionnee yn irriney, as ny creck eh; myr-chaagh, creenaght, as ynsagh, as keeayl, 24Bee ayr mac crauee ayns ard-voggey jeh; as eh ta geddyn lhiannoo creeney, bee gerjagh echey jeh. 25Gowee dty ayr as dty voir boggey jeed, as bee oo gerjagh jeeish ren oo y ymmyrkey. 26My vac, cur dooys dty chree, as lhig da dty hooillyn cur tastey da my raaidyn. 27Son ta streebagh myr jeeig dowin, as yn oainjyr myr ribbey chion. 28T’ee myrgeddin soie cooyl-chlea myr son spooilley, as bishaghey drogh-yantee mastey deiney. 29Quoi ec ta seaghyn? quoi ec ta trimshey? quoi ec ta anvea? quoi ec ta beealeraght? quoi ec ta lhottyn gyn oyr? quoi ec ta jirgid sooillyn? 30Adsyn ta fuirriaght foddey ec y feeyn, adsyn ta geiyrt er feeyn lajer. 31Ny jeeagh uss er y feeyn ayns e yirgid, tra te soilshean ’sy chappan, tra te troggal e vree dy cooie. 32Ec y jerrey nee eh lhottey myr ard-nieu, as gaghey goll-rish adder. 33Bee dty hooillyn soit er drogh-vraane, as nee dty chree fockley magh camlaagys. 34Dy feer, bee oo myr fer ta baiht ayns grunt ny marrey, ny goll-rishyn ta ny chadley er cronnag lhuingey. 35T’ad er woalley mee, nee oo gra, as cha row mee guint; t’ad er my yeealley, as cha dennee mee eh: cuin nee’m doostey? shir-yms huggey reesht.