CAB. XXIV

1Ny jean troo mysh drogh gheiney, as ny shir dy ve mâroo. 2Son ta’n cree oc lhie ayns drogh-yannoo, as ta ny meillyn oc loayrt jeh molteyrys. 3Liorish creenaght ta thie troggit, as lesh tushtey te er ny chummey; 4As liorish keeayl bee ny shamyryn lhieent lesh dy chooilley chooid chostal as aalin. 5Ta dooinney creeney pooaral, as ta dooinney toiggalagh bishaghey ayns niart. 6Son lesh coyrle chreeney hed oo laue rish caggey: as ayns ymmodee fir-choyrlee ta sauchys. 7Ta creenaght erskyn roshtyn ommydan; cha vel eh fosley e veeal ’sy whaiyl. 8Eshyn ta baarail e cheeayl ayns jannoo olk, yiow eh shen yn goo dy ghooinney olkyssagh. 9Ta peccah ayns smooinaghtyn ommijagh; as ta’n craidoilagh dwoaiagh mastey deiney. 10My lhiggys oo dty chree voïd ayns laa dy heaghyn, s’beg ta dty niart. 11Ny bee uss liastey dy livrey adsyn ta deyrit dy baase, as adsyn ta faagit magh dy ve stroit: 12My jirrys oo, Cur-my-ner, cha row toiggal ain jeh: nagh vel eshyn ta ronsagh y chree, goaill baght jeed? as eh ta coadey dt’annym, nagh vel eh fakin shoh? as nagh jean eh cooilleeney dy chooilley ghooinney cordail rish e obbraghyn? 13My vac, ee uss mill, son dy vel eh mie; as y kere-volley, ta millish gys dty vlass: 14Myr shen vees yn fysseree dy chreenaght gys dty annym: tra t’ou er gheddyn eh, eisht bee leagh ayd, as cha bee dty yerkal er ny yiarey jeh. 15Ny lhie cooyl-chlea, O ghooinney mee-chrauee, noi thie yn er-cairagh; as ny cur mow e ynnyd-vaghee. 16Son ta’n dooinney cairagh tuittym ayns seaghyn shiaght keayrtyn, as t’eh girree reesht: agh nee drogh-sleih tuittym fo drogh haghyrtyn. 17Ny jean boggyssagh, tra huittys dty noid; as ny lhig da dty chree gatt, tra nagh vel eh cheet lesh: 18Er-aggle dy vaik y Chiarn eh, as dy gow eh olk rish, as dy jyndaa eh ort’s e chorree veihsyn. 19Ny bee uss fargagh kyndagh rish drogh-sleih; as ny jean troo mysh ny mee-chrauee. 20Son cha vel leagh erbee cour y drogh ghooinney, as bee cainle ny mee-chrauee currit ass. 21My vac, bee uss ayns aggle y Chiarn, as y ree: as ny bee veg ayd dy yannoo roosyn ta shirrey caghlaa. 22Son nee ny seaghyn oc cheet orroo doaltattym, as quoi ec ta fys, cre cha leah hig y drogh-yerrey orroo ny-neesht! 23Ta ny reddyn shoh neesht bentyn dauesyn ta creeney. Cha vel eh mie dy yannoo soiaghey jeh persoonyn ayns briwnys. 24Eshyn jirrys rish y vee-chrauee, T’ou uss cairagh; ersyn hig mollaght y theay, dwoaiyssee ashoonyn eh. 25Agh bee boggey ocsyn yiow foill da, as hig bannaght foddey beayn orroosyn. 26Nee dy chooilley ghooinney paagey ny meillyn echeysyn, ta coyrt briwnys cairal. 27Fow aarloo dty obbyr mooie, as jean dty chiartaghyn er y vagher, as lurg shen trog dty hie. 28Ny bee feanish noi dty naboo jeh dty yoïn; as ny jean foalsaght lesh dty veillyn. 29Ny abbyr, Nee’m rishyn, myr t’eh er n’yannoo rhym’s: cooilleen-yms yn dooinney cordail rish e obbyr. 30Hie mee shaghey magher y litcher, as liorish garey-feeyney yn ommydan. 31As cur-my-ner, ve ooilley er n’aase harrish lesh drineyn, as va’n slane eaghtyr echey coodit lesh undaagagh, as va’n voalley chloaie er duittym. 32Eisht yeeagh mee, as smooinee mee er shoh dy dowin; honnick mee shoh, as hooar mee ynsagh. 33Foast tammylt beg dy chadley, tammylt son saveenys, tammylt son filley ny laueyn dy chadley: 34Myr shen hig dty voghtynid ort myr troailtagh; as dty ymmyrch myr roosteyr caggee.