CAB. XXV

1T’ad shoh myrgeddin raaghyn creeney Solomon, ren deiney Hezekiah ree Yudah y scrieu. 2She gloyr Yee eh dy ve erskyn roshtyn dooinney: agh te onnor da reeaghyn dy ronsaghey magh cooishyn. 3Ta’n aer son yrjid, as y thalloo son diunid, as cree reeaghyn doillee dy ve cronnit. 4Scarr yn dross veih’n argid, as bee saagh aalin er ny chummey son y ghlenneyder. 5Scugh ny mee-chrauee veih fenish y ree, as bee e stoyl-reeoil er ny niartaghey ayns cairys. 6Ny jean boggyssagh jeed hene kiongoyrt rish y ree, as ny gow seose ynnyd deiney ooasle. 7Son te ny share, dy jir ad rhyt, Tar seose; na dy beagh oo currit sheese fenish y phrince, ta dty hooillyn er vakin. 8Ny gow magh dy siyragh gys streeu, er-aggle nagh bee fys ayd cre dy yannoo, my vees eh harrish, tra ta dty naboo er dty choyrt gys nearey. 9Jean dty chooish y phleadeil rish dty naboo hene; as ny insh da fer elley shen ny ta eddyr shiu: 10Er-aggle, dy der eshyn chlinnys eh nearey ort, as dy bee drogh ghoo ayd liorish. 11Fockle ta loayrit dy cooie, te goll-rish ooylyn airhey ayns baskadyn argid. 12Myr cliegeen airhey, as jewel soit ayns airh ghlen, myr shen ta coyrleyder creeney gys y chleaysh beasagh. 13Myr feayraght sniaghtee ayns chiass yn ouyr, myr shen ta chaghter treishteilagh dauesyn ta dy choyrt eh; son t’eh dy ooraghey annym e vainshteryn. 14Eshyn ta dy foalsey boggyssagh jeh’n feoiltys echey hene, t’eh goll-rish bodjallyn as geay gyn fliaghey. 15Liorish meenid ta prince er ny veiyghey, as ta chengey veeley brishey eer craueyn. 16Vel oo er gheddyn mill? ee wheesh as ta mie dhyt; er-aggle, my ee-ys oo rouyr jeh, dy dilg oo eh. 17Freill dty chass veih thie dty naboo: er-aggle dy bee eh skee jeed, as cur feoh dhyt. 18Dooinney ta gymmyrkey feanish foalsey noi e naboo, t’eh ny oayrd, as cliwe, as side gyere. 19Dy hreishteil ayns dooinney neu-firrinagh ayns earish dy heaghyn, te myr feeackle brisht, as cass ass ynnyd. 20Myr eshyn ta goaill ersooyl garmad ayns emshyr feayr, as myr vinegar er nitre; myr shen ta eshyn, ta goaill arraneyn gys cree trimshagh. 21My vees dty noid accryssagh, cur arran da dy ee, as my t’eh paagh, cur da ushtey dy iu. 22Son nee oo cruinnaghey smarageyn aile er e chione, as ver y Chiarn leagh dhyt. 23Ta’n gheay-twoaie cur lesh chiarrey; myr shen ta eddin fargagh cur ny host yn chengey chooyl-chassee. 24Te ny share dy vaghey ayns corneil erbee mullagh thie, na ’syn un thie marish ben veealeragh. 25Myr ushtey feayr da dooinney paagh; myr shen ta naight mie veih cheer foddey. 26Son dooinney cairagh dy huittym roish ny mee-chrauee, t’eh myr farrane ta seiyt, as chibbyr brisht. 27Cha vel eh follan dy ee rouyr mill; myr shen cha vel eh son goo dooinney, dy ve geiyrt dy gyere er e chione-ardys hene. 28Eshyn nagh vel echey reill harrish e spyrryd hene, t’eh myr ard-valley traartagh, as gyn voallaghyn.