CAB. XXVI

1Myr y sniaghtey souree, as fliaghey ’syn ouyr, myr shen cha vel ooashley cooie da ommydan. 2Myr ta’n ushag ayns rouail, as y ghollan-gheayee ayns getlagh, myr shen cha jig yn mollaght gyn-oyr. 3Ta kip son y chabbyl, streean son yn assyl, as slatt son dreeym yn ommydan. 4Ny freggyr ommydan cordail rish e ommijys, er-aggle dy bee oo hene casley rishyn. 5Cur ansoor da ommydan rere e ommijys, nagh bee eh creeney ayns e smooinaghtyn hene. 6Eh ta coyrt chaghteraght liorish laue ommydan, t’eh myr dy beagh ny cassyn giarit jeh, as t’eh geddyn coayl. 7Cha vel lurgaghyn y chroobagh corrym: myr shen ta raa creeney ayns beeal ny mee-cheeayllee. 8Myr eh ta ceau clagh chostal lesh sling: myr shen t’eshyn ver ooashley da’n yiare-cheeayllagh. 9Myr ta jolg roie ayns laue yn veshtyllagh, shen myr ta raa creeney [neu-yesh] ayns beeal yn ommydan. 10Yn Jee mooar ren dagh nhee y chroo, t’eh smaghtaghey chammah yn ommydan as ny drogh-yantee. 11Myr moddey ta chyndaa reesht gys e skeeah, shen myr ta’n mee-hushtagh chyndaa gys e ommijys. 12Vel oo fakin dooinney creeney ayns e smooinaghtyn hene? ta caslys share jeh’n vee-hushtagh na jehsyn. 13Ta’n litcher dy ghra, Ta lion ’sy raad; ta lion ayns ny straïdyn. 14Myr ta dorrys chyndaa er ny jeushanyn, myr shen ta’n litcher er e lhiabbee. 15Ta’n dooinney liastey follaght e laue ’sy oghrish: s’doillee lesh dy hroggal eh gys e veeal. 16Ta’n cadlag, er-lesh hene, ny s’creeney na shiaght deiney oddys resoon y choyrt stiagh. 17Eshyn ta trooid taghyrt goaill ayrn ayns streeu, nagh vel bentyn da, t’eh myr fer ta goaill moddey ry-chleayshyn. 18Myr dooinney baanrit, ta dy cheau mygeayrt ceabyn aile, side, as greïnyn baaish; 19Myr shen ta’n dooinney ta molley e naboo, as gra, Nagh vel mee ayns gamman? 20Raad nagh vel stoo loshtee, ta’n aile goll ass: myr shen raad nagh vel tutler, ta streeu goaill fea. 21Myr ta geayl gys smarageyn loshtee, as fuygh er aile: myr shen ta peccagh anveagh dy oaddey streeu. 22Ta goan y scammyltagh myr lhottyn, as t’ad broddey gys grunt y chree. 23Ta meillyn shliawn lesh cree olkyssagh, myr pash craie coodit lesh trustyr dy argid. 24Ta’n goanlyssagh brynneraght lesh e veillyn, as keiltyn e oalsaght cheu-sthie jeh; 25Tra t’eh coyrt glare aalin, ny cred eh: son ta olkys shiaght-filley ayns e chree. 26Eh ta keiltyn myskid lesh kialg, bee yn olkys echeysyn cronnit fenish yn slane theay. 27Quoi-erbee chleiys ooig, nee eh tuittym ayn: as eshyn rowlys clagh noi’n ughtagh, chyndaa-ee eh back er hene. 28Ta’n chengey vreagagh cur feoh dauesyn ta gortit liorish: as ta beeal foalsey gobbraghey toyrt-mow.