CAB. XXVII

1Ny jean boggyssagh jeed hene mychione y laa mairagh; son cha vel fys ayd, cre ver y laa lesh mygeayrt. 2Lhig da dooinney elley oo y voylley, as cha nee dty veeal hene; joarree, as cha nee ny meillyn ayd hene. 3Ta’n clagh trome, as ta’n genniagh errey doillee dy ymmyrkey: agh ta farg yn ommydan ny s’trimmey na ad ny-neesht. 4Ta jymmoose red eulyssagh, as corree mee-reiltagh; agh quoi oddys shassoo roish troo? 5Ta oghsan foshlit ny share na graih follit. 6S’firrinagh ta smaght carrey; agh ta paagey noid molteyragh. 7Ta’n annym lane jiooldey rish yn eer kere-volley; agh da’n accryssagh ta dy chooilley nhee sharroo, blaystal. 8Myr eean treigeil yn edd eck, shen myr ta’n dooinney ta rouail veih e ynnyd hene. 9Ta ooil spiceit, as soar millish, ooraghey yn chree: myr shen ta dooinney er ny gherjaghey liorish coyrle dooie e charrey. 10Dty charrey hene, as carrey dty ayr ny jean treigeil: as ny treisht gys thie dty vraarey son kemmyrk, ayns laa dty heaghyn: son ny share ta’n naboo ta liort, na braar ta foddey voïd. 11My vac, bee uss creeney, as jean boggey da my chree, dy voddym eddin y choyrt dasyn, nee m’y oltooaney. 12Ta dooinney tastagh cronnaghey yn olk ro-laue, as keiltyn eh-hene: agh ta ny giare-cheeayllee roie gour nyn mullee, as geddyn assee. 13Gow yn eaddagh echeysyn, ta goll raane roish joarree, as gow gioal jehsyn son drogh ven. 14Eshyn ta dy brynneragh fockley-magh goo mie e charrey, fey-ny-laa, cha vel eh agh scammylt da. 15Faarn kinjagh ayns laa dewil fliaghee, as ben anveagh, t’ad co-laik. 16Eshyn cheillys ish, keillee eh yn gheay, as soar ooil er e laue yesh, ta dy vrah eh-hene. 17Myr ta yiarn shleeu yiarn, myr shen ta dooinney gerjaghey eddin e ghooinney-mooinjer. 18Eshyn ta jeidjagh mysh e villey-figgagh, yiow eh soogh e vessyn: myr shen eshyn ta ayns ammys e vainshtyr, ta leagh mie ny chour. 19Myr ayns ushtey, ta eddin casley rish eddin, myr shen ta cree dooinney gys dooinney. 20Cha vel yn oaie ny’n baase dy bragh lane: myr shen cha vel sayntyn sooilley dy bragh jeant magh. 21Myr ta’n pot-lheïee son argid, as y furnace son airh, myr shen ta dooinney er ny phrowal liorish y veeal brynneragh. 22Ga dy jinnagh oo ommydan y vroo ayns mortar, mastey curnaght, lesh pestyl, foast cha jean eh scarrey rish e ommijys. 23Bee imneagh dy hoiggal stayd dty hioltaneyn, as freill sooill vie er dty hellooyn: 24Son cha vel berchys son dy bragh: as vel yn attey reeoil goll veih sheeloghe gys sheeloghe? 25Son mannagh vel y traagh cheet rish, as y faiyr meein cheet er-ash, as glassyraght ny sleityn chymsit, 26Bee ny eayin ta son dty choamrey caillit, as farvaalys aber dty ghoair. 27As bee dty haie bainney goair ayd son dty vee, dy yannoo magh dty lught-thie, as son beaghey dty inneenyn.