CAB. XXVIII

1Ta ny kyndee chea, tra nagh vel fer erbee er nyn eiyrt’s: agh ta’n ynrick creeoil myr lion. 2Son peccaghyn y cheer ta ny princeyn eck ymmodee: agh liorish dooinney creeney as tushtagh bee yn stayd eck foddey beayn. 3Dooinney boght ta jannoo tranlaase er boght, t’eh myr fliaghey dewil stroie yn slane troar. 4Adsyn ta treigeil y leigh, t’ad moylley ny mee-chrauee: agh lheid as ta freayll y leigh t’ad coyrt eddin daue. 5Cha vel deiney olkyssagh toiggal briwnys: agh adsyn ta shirrey yn Chiarn, t’ad toiggal dagh nhee. 6Ny share ta’n boght, ta shooyl ayns e ynrickys, na eshyn ta camlaagagh ayns e raaidyn, ga dy vel eh berchagh. 7Eshyn ta freayll y leigh, t’eh ny vac creeney: agh eh ta sheshey deiney jollyssagh, t’eh naaraghey e ayr. 8Eshyn ta liorish use trome, as cosney mee-chairagh, bishaghey e chooid, nee eh chaglym er e hon-syn, ghoys chymmey er ny boghtyn. 9Eh ta chyndaa ersooyl e chleaysh veih clashtyn y leigh, bee’n eer padjer echeysyn feohdoil. 10Eshyn ver deiney cairal er-shaghryn ayns drogh raad, tuittee eshyn ’syn ooig echey hene: agh ec y vooinjer yeeragh bee reddyn mie ayns nyn gummal. 11Ta’n dooinney berchagh creeney ayns e smooinaghtyn hene: agh yn boght ta tushtey echey, t’eh dy ronsaghey magh eh. 12Tra ta deiney ynrick ayns pooar, te ard-vaynrys: agh tra ta ny mee-chrauee troggal, ta dooinney mie goll dy lhiattee. 13Eh ta coodaghey e pheccaghyn cha jean eh bishaghey: agh quoi-erbee ghoys roo, as treigys ad, yiow eh myghin. 14S’maynrey yn dooinney ta dy kinjagh ayns aggle (Yee): agh nee eshyn, chreoghys e chree, tuittym ayns olk. 15Myr lion buirroogh, as muc-awin jollyssagh; myr shen ta fer-reill olkyssagh harrish theay seaghnit. 16Yn prince, ta laccal tushtey, t’eh myrgeddin ny ard-hranlaasagh: agh eh ta shaghney saynt, bee e laghyn foddey-beayn. 17Eshyn t’er n’yannoo dewlys er fuill dooinney erbee, bee eh eiyrit dy baase; ny lhig da dooinney erbee lhiettal eh. 18Eshyn ta shooyl dy jeeragh, bee eh sauchey: agh eh ta roonagh ayns e raaidyn, tuittee eh dy gerrit. 19Eshyn ta laboraght e halloo, bee sonnys arran echey: agh bee sheshey ny stroideryn boght dy liooar. 20Nee dooinney treishteilagh bishaghey ayns bannaghtyn: agh eshyn ta jannoo siyr dy ve berchagh, cha bee eh gyn-loght. 21Dy yannoo soiaghey jeh persoonyn deiney, cha vel eh mie: son eer greme dy arran nee yn dooinney shen cassey cairys. 22Eshyn ta shleeuit er berchys, ta drogh-hooill echey, as cha vel eh toiggal dy vod y voghtynid cheet er. 23Yiow eshyn ta geddyn foill, booise smoo ny lurg, na eshyn ta brynneraght lesh e hengey. 24Quoi-erbee speeinys e ayr, as e voir, as jirrys, Nagh vel skielley erbee ayn; ta’n fer shen sheshey yn stroider. 25Eshyn ta jeh cree mooaralagh, t’eh doostey anvea: agh eh verrys e varrant er y Chiarn, bee eh jeant magh lesh sonnys. 26Eh ta treishteil gys e chree hene, t’eh ny ommydan: agh bee eshyn sauchey ta shooyl dy creeney. 27Eshyn ta shirveish er ny boghtyn, cha jig y voghtynid er: agh yiow eshyn mollaght ny ghaa ta follaghey e hooillyn. 28Tra ta drogh gheiney ayns pooar, ta sleih chea voue: agh tra t’ad currit sheese, ta deiney mie bishaghey.