CAB. XXIX

1Eshyn ta dy mennick coyrlit, as creoghey e wannal, bee eh doaltattym er ny stroie, as shen fegooish couyr. 2Tra ta deiney cairal ayns pooar, ta’n theay goaill boggey: agh tra t’ad fo tranlaasagh, ta’n pobble dobberan. 3Eshyn shynney lesh creenaght, t’eh jannoo boggey da e ayr: agh eh ta freayll sheshaght streebee, t’eh jummal e chooid. 4Ta’n ree liorish briwnys [cairal] cummal seose y cheer; agh eh ta goaill sollaghey-laue, t’eh dy choyrt eh naardey. 5Dooinney ta brynneraght rish e naboo, t’eh skeayley lieen son e chassyn. 6Ayns mee-chairys drogh ghooinney ta ribbey: agh gowee yn dooinney mie arraneyn-moyllee dy gennal. 7Ta’n dooinney cairal goaill seose cooish yn ymmyrchagh: agh s’mooar lesh y drogh ghooinney dy hoiggal eh. 8Ta deiney boiragh cur yn ard-valley fo seaghyn: agh ta deiney creeney castey jymmoose. 9My ta dooinney creeney dellal rish ommydan, edyr eh ve corree ny craid cha der eh fea dhyt. 10Ta deiney folley as dwoaie oc er sleih ynrick: agh ta’n dooinney cairal shirrey foays e annym. 11Ta’n ommydan fockley magh ooilley e aigney: agh ta persoon creeney dy chummal sthie eh gys traa cooie. 12My ta fer-reill cur cleaysh da breagyn, bee ooilley e harvaantyn olk. 13Ta’n ymmyrchagh as y tranlaasagh cheet dy cheilley: agh she’n Chiarn ta coyrt soilshey daue ny-neesht. 14Yn ree ta dy firrinagh briwnys son ny boghtyn, bee yn stoyl-reeoil echeysyn er ny hickyraghey son dy bragh. 15Ta’n slatt as oghsan dy choyrt creenaght: agh ta lhiannoo faagit da hene tayrn nearey er e voir. 16Tra ta drogh-yantee bishaghey, ta drogh-yannoo goaill niart: agh hee sleih cairal yn lhieggey oc. 17Smaghtee dty vac as bee fea ayd; bee eh eer gerjagh da dty annym. 18Raad nagh vel goo Yee, ta’n pobble cherraghtyn: agh eh ta freayll yn leigh, s’maynrey t’eh. 19Cha vel drogh harvaant dy ve smaghtit lesh focklyn: son ga dy vel eh toiggal oo, cha jean eh freggyrt. 20Vel oo cur-my-ner dooinney ta siyragh ayns e ghoan? ta caslys share jeh’n voal-hushtagh na jehsyn. 21Eshyn ta dy keiyn troggal e harvaant veih e aegid, gowee eh er dy ve e vac ec y jerrey. 22Ta dooinney fargagh bioghey anvea, as ta’n eulyssagh cur olk er y hoshiaght. 23Tayrnys e voyrn dooinney sheese dy injil; agh eiyrys ooashley orroosyn ta imlee ayns cree. 24Quoi-theihll ta sheshey rish maarliagh, t’eh noid da e annym hene: t’eh er bree e loo, as cha vel eh soilshaghey yn ynrickys. 25Ta aggle dooinney dy hayrn eh ayns ribbey: agh bee kemmyrk echeysyn ver e varrant er y Chiarn. 26Ta ymmodee shirrey foayr y fer-reill; agh ta briwnys dy chooilley ghooinney cheet veih’n Chiarn. 27Ta dwoaie ec y dooinney onneragh er mitchoor, as ta’n drogh-er noid dasyn ta ynrick ayns e raaidyn.