CAB. III

1My vac, ny jarrood my leigh; agh lhig da dty chree freayll my annaghyn. 2Son lhiurid laghyn, as bea veayn, as shee, nee ad bishaghey ort. 3Ny lhig da myghin, as firrinys treigeil oo: kiangle ad mysh dty wannal, scrieu ad er glaare dty chree. 4Myr shen yiow foayr, as aigney-mie ayns shilley Jee as dooinney.

5Cur dty hreishteil ayns y Chiarn lesh ooilley dty chree; as ny cur barrant er dty hushtey hene. 6Ayns ooilley dty raaidyn gow rishyn, as nee eh leeideil dty chesmadyn. 7Ny bee creeney ayns dty hooillyn hene: gow aggle roish y Chiarn, as scarr rish yn olk. 8Bee eh slaynt gys dty challin, as smuir gys dty chraueyn. 9Cur ooashley da’n Chiarn lesh dty chooid-seihlt, as lesh ny chied-vessyn jeh ooilley dty vishagh. 10Myr shen bee dty hoaltyn lhieent lesh sonnys, as nee dty ghoaghyn-feeyney roie harrish lesh feeyn noa.

11My vac, ny jean uss beg y hoiaghey jeh smaght y Chiarn: as ny bee neu-hurransagh fo’n kerraghey echeysyn. 12Son quoi-erbee shynney lesh y Chiarn, t’eh dy smaghtaghey, eer myr ta ayr yn mac, ta e chree goaill boggey jeh.

13S’maynrey’n dooinney ta cosney creenaght, as y dooinney ta geddyn tushtey. 14Son ta’n cosney echey ny share na cosney argid, as y vondeish echey, na’n airh s’costal. 15T’ee ny s’costal na rubieyn: as dy chooilley nhee oddys oo y yeearree, cha vel ad dy ve soylit r’ee. 16Ta beaynid laghyn ayns y laue yesh eck, as ayns e laue chiare berchys as ooashley. 17Ta ny raaidyn ecksh raaidyn eunyssagh, as ooilley ny kesmadyn eck shee. 18T’ee yn billey dy vea dauesyn ta dy chosney ee, as s’maynrey ta dy chooilley unnane ta dy reayll ee. 19Ta’n Chiarn liorish creenaght er hickyraghey yn thalloo; liorish tushtey t’eh er choamrey ny niaughyn. 20Liorish yn tushtey echeysyn ta ny diunidyn brishey magh, as ta ny bodjallyn shilley neose yn druight.

21My vac, ny lhig ad ass dty hilley: freill yn ynrycan creenaght, as keeayll vie. 22Myr shen bee ad bea gys dty annym, as aalid gys dty wannal. 23Eisht nee oo gimmeeaght ayns dty raad dy sauchey, as dty chass cha jean snapperal. 24Tra t’ou lhie sheese, cha bee oo ayns aggle: dy feer, nee oo lhie sheese, as bee dty chadley kiune. 25Ny gow aggle roish seaghyn doaltattym, ny roish traartys ny mee-chrauee, tra te cheet orroo. 26Son bee yn Chiarn dty varrantagh, as nee eh freayll dty chass veih’n ribbey.

27Ny jean thurn mie y lhiettal vouesyn, daue te cair, tra te ayns pooar dty laue dy yannoo eh. 28Ny abbyr rish dty naboo, Royd oo, as tar reesht, as mairagh ver-yms dhyt eh: tra te ayd liort. 29Ny jean olk y chiarail noi dty naboo, fakin dy vel eh cummal dy sauchey liort.

30Ny jean streeu rish dooinney gyn oyr, tra nagh vel eh er n’yannoo aggair dhyt.

31Ny jean troo mysh y tranlaasagh, as ny jean reih veg jeh e raaidyn. 32Son ta’n tranlaasagh dwoaiagh da’n Chiarn; agh ta’n graih follit echey marish deiney cairal.

33Ta mollaght y Chiarn ayns thie yn vee-chrauee: agh t’eh bannaghey ynnyd-vaghee yn vooinjer ynrick.

34Shickyr t’eh jannoo faghid er ny craidoilee: agh t’eh coyrt grayse da ny imlee. 35Yiow yn chloan chreeney gloyr ayns eiraght, agh bee nearey er ooashley ny ommydanyn.